ZABURU 2

1 Opea o sababuna manga lipu atobungke, tee manga raʼeatina lipu ahaejatiaka parakara mosia-sia? 2 Manga rajana dunia sii apasiapuaka karona, tee manga mokenina kuasa apomufakatimo gauna aewangi KAWASANA OPU tee raja ipilina. Pogauna manga incia, 3 “Mai tabhotukia o kabhokena KAWASANA OPU tee raja ipilina, tee tabhanakea o rabutana manga incia minaaka i ingkita!" 4 Incia mokokauncuramakana i sorogaa apotawa, Kawasana Opu aele-ele manga incia. 5 I wakutuu incia sumai Kawasana Opu bheafirimani i manga incia tee apatokidha manga incia tee pamuruna, 6 “Iaku padhamo kulanti rajaku i Sion, i gunuku momangkilona sumai." 7 Iaku bhekupogauaka opea mopadhana ipatotapuakana KAWASANA OPU. Incia padhamo afirimaniaku, “Ingkoomo anaku, i eo sii Iaku kupamembaliko anaku. 8 Emanimo i Iaku, Sumaimo bhekudhawuakako manga lipu to amembali tinaurakamu, tee saangua alamu kupamembalia pewauamu. 9 Ingkoo bheupahancuru manga incia tee katuko ase tee upasakia manga mboomo poluka reo." 10 Rampaakanamo sumai, e manga raja, pewaumo aarifu! Tarimamo kaadhari, e manga mokuasaina dunia! 11 Sombamo i KAWASANA OPU tee umaekaia, Rengkumo, tee upekatambe karomiu i aroana raja tee kaunde-unde. 12 Sombamo Incia tee kakatena totona incamu mamudhaakana Incia inda apamuru tee apabinasakomiu i dhala roonamo Incia amasimba mpuu aʼamara. Amasanaamo bhari-bharia mia mopeuluna i Incia!