ZABURU 138

1 Zaburuna Daud. Iaku bhekusukuru i Ingkoo, E KAWASANA OPU, tee mpuu-mpuuna incaku. Iaku bhekulaguaka manga lagu kapujia to Ingkoo i aroana manga malaaʼekati. 2 Iaku bhekusuju tee kusomba kupoaro i Bhanuamu momangkilo tee kusukuru poose kupuji saromu roonamo kaasimu molagina tee umembali utoparacaea, sababuna Ingkoo padhamo ususuaka saromu tee janjimu alabhi minaaka i opeopeapo uka. 3 I eona kugora, Ingkoo ulawaniaku, tee Ingkoo upekatangka incaku tee kakaamu. 4 Bhari-bharia raja i alamu bheapuji Ingkoo, e KAWASANA OPU, roonamo manga incia padhamo arangoa manga janji ipakawaakamu. 5 Manga incia bhealaguaka opea mopadhana ipewauna KAWASANA OPU roonamo amaoge o kamuliangina KAWASANA OPU. 6 Moomini KAWASANA OPU sumai amalanga, maka Incia akamata mia momaidhiidhi, sainamo mia mosombo akamatea minaaka i karidhoana. 7 Moomini kudhadhi i nuncana kanarakaa, Ingkoo upotaangiaka dhadhiku; Ingkoo upaulu limamu to ubhali pamuruna manga musuku, tee o lima kaanamu mopasalaamatiaku. 8 KAWASANA OPU bheapamando haejatina to dhadhiku; E KAWASANA OPU, kaasimu abakaa saʼumurua; bholi uunto upewau sagala giu mopadhana ipewaumu to uumatimu.