ZABURU 116

1 Iaku kumaasiaka KAWASANA OPU, sababuna Incia arango goraku tee bhari-bharia iemaniku. 2 Roonamo Incia aperangoiaku, sumaimo bhekugora i Incia saʼumurua dhadiku. 3 Manga katapu imateaka abulilingiaku, kanarakaa i nuncana koburu angkakanaiku, iaku kunamisi kaseke tee kaporo. 4 Kasiimpo kugoraaka sarona KAWASANA OPU, “E KAWASANA OPU, pasalaamatia o inyawaku!" 5 KAWASANA OPU satotuuna amalape tee abanara; Aulataʼalata satotuuna amaasiaka uumatina. 6 KAWASANA OPU ajagani manga mia inda momembalina motulungina karona. Wakutuuna inda tee kakaaku, Incia mopasalaamatiaku. 7 E ngangarandaku, tanangimo pendua roonamo KAWASANA OPU padhamo apewau malape tee ingkoo. 8 E KAWASANA OPU, Ingkoo padhamo upasalaamati inyawaku minaaka i mate, ujagani mataku mamudhaakana inda kutangi, tee upekatangka aeku mamudhaakana inda atosunu. 9 Iaku bhekudhala i aroana KAWASANA OPU, i lipuna manga mia modhadhi. 10 Iaku sadhaadhaa kuparacaea, moomini wakutuuna kupogau, “Iaku kunarakaa mpuu." 11 I wakutuuna kubingu kupogau, “Bhari-bharia mia inda amembali atoparacaea." 12 Opea buaka momembalina ipasombaakaku i KAWASANA OPU to kubalasiaka bhari-bharia kalapena incana to karoku? 13 Iaku bhekuangka tondena kasalaamati tee kugoraaka sarona KAWASANA OPU. 14 Iaku bhekutolosi tolauna oniku i KAWASANA OPU i aroana bhari-bharia uumatina. 15 Akoharagaa i matana KAWASANA OPU matena manga mia mosaalihi. 16 E KAWASANA OPU, satotuuna iaku sii o bhatuamu. Iakumo bhatuamu, o anana minaaka i bhatuamu bhawine. Ingkoo padhamo urambasakaaku minaaka i kabhokeku. 17 Iaku bhekupasombaaka kurubani sukuru to Ingkoo tee kugoraaka sarona KAWASANA OPU. 18 Iaku bhekutolosi tolauna oniku i KAWASANA OPU i aroana bhari-bharia uumatina, 19 i tanalapana Baitullana KAWASANA OPU, i tanga-tangamu, e Yerusalem! Pujimea o KAWASANA OPU!