Mark 7

1 (Pharisee ma mai Jew anatapuhi, muriyai da hita am, au naona, nimahi hina oghai. Me warihagha waghawaghahi ahi vaivai hi teretereiya nanaêarena. Maranaina boruwei he nene memei, egha hina am da au naona gobuhi hina ogha tawaneêi. Ahi ghoha maghamaghauhi ghehauhi maiteni hevo taghotaghohi, me ani am da ani uma, me he oghaêoghanei). Pharisee ma raugagayo tauvi haraharamanahi ghehauhi Jerusalemei hi nei Yesu awarina da hita rau-tanighanei ma hi inanai da ana tauvotaghotagho ana nima gobuhi hi amêam. 5 Ma tauhi Yesu hi rau-bayadei hipa, “Aiwaêi aubaina, am tauvotaghotagho waghawaghata ahi vaivai egha hita votaghotaghoi ma ana ura mirahi he amêam?" 6 Ma Yesu i pari-beyana, “Taumi morumorumi, God ana peroveta Isaiah i riwa kauwa, tauna i girugirumia nanaêarena, God i riwa, ‘Taumi gamomiyei o vovohepahepaêu, wate nuwanuwami au horana tapuna ava. 7 Tauhi rava ahi vaivai hevivi damani ma egha yamna God ana raugagayo. Yamna aubaina ahi vohepahepa yamna kwakwavina.’ 8 Taumi God ana raugagayo o teretere riyei ma taumi ami vaivai o vovo taghotaghoi." 9 Ma i riwana meyehi ipa, “Taumi ami haramanei God ana raugagayo o teretere riyei ma taumi ami vaivai o vovo taghotaghoi. 10 Moses God ana raugagayo i teretereiya yamna, ‘Amam ma ayom mavi virehi,’ ma ‘Aiyaêi amana ma ayona e enaena boêahi, tauna onavi hiragheni.’ 11 Wate taumi o viharaharamanihi da ayo ma ama he rau-rau boviyehi ma, God awarina; he amêam verena. 12 Ami viharaharamanei, tauhi ama ma ayo egha hita vohaguhi. 13 Ma weêi, viharaharamana taumi, rava auwarihi o vividamani ma God riwana o vivihamoaêi. Ma kauwa maghamaghauhi ghehauhi maitehi o kaukauwei." 14 Yesu patara i ghore meyehi ma ipa, “Ana tapumi ona rau-tanighaneu ma aiwaêi a ririwemi ona haramanei. 15 Aiwaêi da au gamomi e ruirui tauna egha itavivi miraimi ma aiwaêi da horamiyei e hopuhopu, tauna evivi miraimi, God au matana." 17 Yesu patara ivo terehi ma i naeme au numa ma ana tauvotaghotagho hivi taravirevirei da awanaina anona itavi heghehi. 18 Yesu ipa, “Taumi maiteni egha ota haramanei bo? Kauwa aiwaêi upuneêi rava au horahi e ruirui apo egha inavi mirai, anona yamna weêi kauwana egha tauna au nuwanuwana ita ruirui ma au manawana da e hopuhopu.” (Weêi riwanei Yesu yam anatapuhi ivi aninei da tauhi egha waêiyawa). 20 I amdabi ipa, “Aiwaêi rava horanei e hopuhopu yamna rava evivi mirai, God au matana. 21 Rava ghohaêapoapoe, nuwanuwahiyei hevivi tetei ma ghohana he ghohaghohai nota apoapoehi me, rauhoghara yabayababa, danene, vihiraghena, awadanene, 22 amboho, rau ivi apoapoe, moru, erawa, unura, terevaidegha, maeghaeghae ma buêuwa kauwahi. 23 Weêi ghohahi apoapoehi rava horahiyei he hopuhopu ma rava hevivi mirahi." 24 Ma naêi meyagaina i voterei ma i nae Tyre au paratana ma au numa i rui, aubaina egha ita ghohei da rava hita haramanei, wate tauna egha tagotagogina da ita rau-govagha. 25 Wavine tagogi Yesu tuyeghana i nonori ma i nei awarina, weêi wavinena tauna egha Jew, tauna eteni au Fonisia i tupuwa, Siria au paratana. We wavinena natuna wavinena haburuna aruwa-apoapoena, i ruini. Yamna aubaina ayona i nae Yesu awarina, au naona i raudune ma ivi baghai da aruwa-apoapoena natuna awarina ita vaina tawaneêi. 27 Yesu i haramanei da wavinena eteni, yamna aubaina i riwei, “Egha ita ahi da rowarowa ahi yam ana vaini ma ouêou ana verei, eêegha da, au naona rowarowa hina am hi yauwa." 28 Ma wavine i pari-beyei, “Bada, yamna riwa kauwa wate rowarowa ahi yam hamohamoghina kepakepa au gabaurina e dabadabarara yana ouêou he aniani." 29 Ma Yesu i riwei, “Ma naeme am au numa. Tam am paribeyana i ahi aubaina aruwa-apoapoena natum au horana tauna i hopuna tawaneêi." 30 Ma i nae me ana au numa ma i tuhaghai da teverana ana au ani eno i enoeno ma aruwa-apoapoena i hopu tawaneêi. 31 Yesu Tyre paratana i ne tawaneêi da au Sidon ma i kwaviviro da au Dekapolis Galili topana au ririvana. 32 Rava ghehauhi oroto tanighana potapotana ma menana birebirena hi neiai ma Yesu hivi baghai da urana au opina ita terei da itavi yawahani. 33 Yamna aubaina Yesu oroto i taravaina hopunei da tauhi ava ma ura gigina oroto au tanighana i tere ruêiyei ma ura gigina i hovai ma menana ivo dadani. 34 Ma au mara i inana ma nuwanuwana i boyai ma i yavutu tawanana ma oroto i riwei, “Efata,” weêi anona “Mawana tawaneêi." 35 Maratagogi tanighana i wanatawanei ma menana ivi dagudagu ma i dede kauwa. 36 Ma Yesu rava ivi ghaehi, i riwana guratehi da egha rava ghehauhi hina riwei da aiwaêi i tupuwa. Rava i riwana guratehi wate tauhi egha hita rau-tanighana ma hivi tuyetuyeghei. 37 Ma maranai rava weêi riwana hi nonori, tauhi hi bahana guratei ma i riwa, “Aiwaêi anatapuhi i kauwana anatapuna ahiêahina ava. Tauna rava tanigha potapotana ivi yawahani da e rau-tanighana ma menana birebirena e dedede kauwa."