Mark 15

1 Au maratomtom, piripirisi ghaeghaehi, babada ghehauhi, raugagayo tauvi haraharamanahi ma mai Jew ahi raugagayo babadahi anatapuhi hivi boru da Yesu me hita ghoanei. Tauhi hivi anina ma hi pani da hi amverenei Pilate awarina. 2 Pilate Yesu i rau-bayadei, “Tam anina, mai Jew ahi guyau bo?” Yesu i pari-beyei, “Anina, u riwa nanaêarena." 3 Piripirisi ghaeghaehi Yesu ghoha maghamagha aubaina, hivi wavui. 4 Pilate i rau-bayadana meyei, “ma inanai! Ghoha maghamagha aubaina hevivi wavum ma tam egha aiwaêi uta paripari-beyehi?" 5 Yesu egha aiwai itapari beyei ma yamna aubaina Pilate i bahei. 6 Mai Jew ahi vaivai da Raghona torehana au marana yamna, panipani tagogi, hevi viêinaghaniya ma hevivi bagheiya Pilate inavo tawanei. 7 Oroto wavana Barabas yana au panipani ma tauna gabemani ahi au vighahighahiyawa, ivi hiraghena. 8 Patara hi nae da Pilate hivi baghai da Raghona torehana, ma tauna maemae warihaghana ma apo ahi nuwahegoya ita kauwei. 9 Pilate yana i haramanei da piripirisi, Yesu hi unuêunurei ma aubaina ma hi amverenei tauna awarina. Ma yamna aubaina da rava i rau-bayadehi, “O ghoheghohei da mai Jew ahi guyau ana votawanei bo?" 11 Wate piripirisi ghaeghaehi patara hivi medihi da Pilate hivi baghai da Barabas ita votawanei ma egha Yesu. 12 Pilate patara i rau-bayadehi, “Ma tauna o ghoreghoreiya, mai Jew ahi guyau, aiwaêi o ghoheghohei da ana ghohai awarina?" 13 Hi garara ma hipa, “Ma tuparatui." 14 Ma Pilate tauhi i rau-bayadehi, “Aiwaêi aubaina? Aiwaêi apoapoena i ghohai?” Ma tauhi hi garara guraguratana, “Ma tuparatui!" 15 Ma Pilat i ghohei da patara itavi nuwahubahi, yamna aubaina da Barabas ivo tawanei. Ma i riwa da Yesu hi kwapui ma i am verenei da hita tuparatui. 16 Ghavighaviyahi Yesu hi taravainanaiyei Pilate ana au numa (wavana Praetorium) ma kampa ghavighaviyahi ghehauhi maitehi hivi tagogiyehi. 17 Ma gara vikabekaberona [me guyaguyau ahi gara], hivi oteni ma kunuteiya eyagi donadonana au koyana hi terei. 18 Ma we nanaêarena hivivi diboghi, “Ona inanai mai Jew ahi guyau!" 19 Kwapuweêi koyana hivi rau-rauwei, hi hovahovai, aetutuhi hi tapegharowei ma hivo hepahepa morumoruwei. 20 Maranaina hivi dibogha vorovei, gara vikabekaberona hivo tawanei ma ana gara ohohina hivi otena meyei ma tuparatuna aubaina, hi taravainanaiyei. 21 Simon tauna Sairiniyei (Alexander ma Rufus amahi) dobu ghehauwei inenei ma au etanai hi tuhaghai. Mai Rome ahi tauvi ghaviya, hi hegaradubadubari da Yesu ana korosi ita avarai. 22 Yesu hi taravainanaiyei au Golgota. (Golgota anona yamna unu gabuna) 23 Kampa wine, bunama megh maiteni hivi raviraiya hi verei da ita umai ma Yesu i geduaiyei. 24 Ma kampa Yesu hi tuparatui ma ana gara hivi kasiyei 25 Madegha i tugheêetai me 9 koroki ma Yesu hi tuparatui. 26 Ahi Viwavu riwana, we nanaêarena, hi girumi, “Mai Jew ahi Guyau." 27 Tau danedanene ruwagha maitehi hi tuparatuhi, tagogi au ahuohohinei ma ghehauna au ahukehakehanei 29 Rava ghehauhi hi veverauvirei ma hivi unukwadikwadi ma hi paripari-vaiapoapoeni, hipa, “Ha! Da! Tam u riwa da numa taparoro uta goruhi ma madegha tonugha au horana uta vowameyei 30 mavi yawahana meyem ma ma hopui!" 31 Piripirisi ahi babada ma raugagayo tauvi haraharamanahi we nanaêarena tauna hivivi diboghi, “Rava ghehauhi ivi yawahanihi ma egha tagotagogina da tauna inavi yawahana meyei. 32 Korosiyei ita hopui da tata inanai ma tata vitumaghanei da tauna God ana vinevine, mai Israel ahi guyau.” Tauhi ruwagha Yesu maiteni hi tupatuparatuiya maitehi hivi diboghi. 33 Ahubena au kayakayana ma dobuna ghaeghaenana i ravigimtonai ma nanaêarena i maêae da au hegoya, me 3 koroki nanaêarena. 34 Au hegoya ma Yesu ponana ghaeghaenei i garara, “Eloi! Eloi! Lama sabatani?” Riwana anona yamna, “Aêu God, Aêu God aiwaêi aubaina u votereu." 35 Taumahiri, hi nonora boêai ma hipa “Tauna Elijah e ghoreghorei." 36 Oroto tagogi i ruba da ani rauogha i vaini ma wain viêivohirahiraghena awarina ivi gayoi, eyagi au mutuna i avehi ma ivi yoyoi da Yesu ita uma. Tauna maiteni ipa, “Tana vipaipai mepa da Elijah ina nei ma ina terehopunei tana inanai." 37 Yesu, ponana ghaeghaenei i garara ma i hiraghe. 38 Gara numa taparoro au horana gabu au viyouyou ateêatena ani rughagharana, i wanatevai au tepana da au gabaurina da i rau-ruwaghei. 39 Tauvi ghaviya ahi bada ghehauna korosi au naona i mahimahiri i inanai da Yesu me i hiraghenei ma ipa, “Riwa kauwa, weêi orotona anina God natuna." 40 Waivine ghehauhi au ririva hi mahiri ma hivi neneghana. Ma kampa taumahiri au horahi yamna Mary Magdalene, Mary James haburuna ma Joses ayohi ma Salome. 41 We waivinehi yana au Galili Yesu hivo votaghonaiyei ma hivo vohagui. Waivine ghehauhi, au Jerusalem Yesu hivo votaghonaiyei, yamna maitehi kampa. 42 Paraide yana mai Jew ahi vokaukauwa marana, (au ibigabiga) 43 yamna aubaina Joseph tauna Arimatheayei ma boru badana ghehauna, wate tauna God ana vibadana ivi paipaiyei. Tauna tepatorei i nae ma Pilate ivi baghai Yesu tupuwana ita vaini aubaina. 44 Pilate Yesu hiraghena riwana i nonori ma egha itavi tumaghanei. Yamna aubaina da tauvi ghaviya badana, i ghorei ma i rau-bayadei da Yesu i hiraghe bo eêegha. 45 Maranaina Pilate, Yesu hiraghena riwa kauwana i nonori, yana Joseph ivi aninei da Yesu tupuwana ita vaini. 46 Anina ma Joseph gara araêarapoirina vouna i gimarai, Yesu tupuwana ivo tawanei, i humai ma au kokowaga me guba, kira au horana i gharagharaiyana kampa hivi enoi. Ma ghaêima ghaeghaena hivi toutouviranaiyei da metaeta hi rau-tomeni. 47 Mary Magdalene ma Joses ayona Mary hi inanai mepa Yesu hivi enoi.