Zabuli 93

1 Mkulu Nguluwi kangulongoza, nakevika ukulu ng’hatu. Mkulu Nguluwi nakavala ukulu na mong’ho. Nakayimiza nzinzili isi yeng’ha, nayo haitigasika hebu. 2 Chigoda cha hegwe cha undewa cha nzinzili kulawa katali, hegwe nawali baho mihela jeng’ha lojing’hali kuwa. 3 Mazi menji nagalavya lizi, gwa Mkulu Nguluwi, ena, nagakwiniza lizi lyake, mazi menji gangukwiniza kahi kubuma kwake. 4 Heye ndo mkulu kusinda kubogoma kwa mazi makulu, ndo mkulu kusinda nhigu za bahali, Mkulu Nguluwi yalingikala kuchanya kana mong’ho. 5 Gwa Mkulu Nguluwi, malajizo ga hegwe gema nzinzili, welile wa ng’handa ya hegwe wangunojeza mazuwa gose.