Zabuli 61

1 Gwa Nguluwi, uhuliche kulila kwa heni, uhulichize kulanda kwa heni. 2 Kulawa kuli kuduma kwa isi ndangukulilila, mbele nweguche nhumbula. Undongoze mbaka kuchanya kuwele na italawe ikulu, hali honhu ha kubilimila kikala goya, 3 kwa vila hegwe ndo honhu ha heni ha kubilimila, ngome ya heni iwele nzinzili, wang’honyo hawoweza kufika heni. 4 Ndangulanda ndikale kuli ihema lya hegwe mazuwa gose, leka ndiwe hali kikala goya hanyi ha mabawa ga hegwe. 5 Gwa Nguluwi, nakuhulika chilaho cha heni, nakumha heni uhalizi wa wala walingukudumba. 6 Wonjeze ukomu wa mndewa uwe wa mazuwa menji, miyaka ja heye jiwe ja lulelo lwinji. 7 Yalongoze mazuwa gose hali hegwe, gwa Nguluwi, igano lya kwimilila na kukundigwa kwa hegwe vimwamile. 8 Ahyo ndokwimbila nzimbo za kulitogola itagwa lya hegwe, ndikweneza chilaho cha heni chila zuwa.