లూకా 22

1 పస్కా కరి ఏక్‍ పోంగ్యుకోయిన్తే ఆటోను పండగ కందే ఆయు. 2 ప్రాధనా యాజకుల్‍బి, షాస్త్రుల్‍ అద్మీయే దేఖిన్‍ ఢరీజైన్‍ యేసునా ధరనా కోహూయుని. కానీ యూవ్నే అజు కీమ్‍ మార్‍నూ కరి ఉపాయ్‍ ఢూండ్తార్హయా. 3 యత్రామా భారజణ షిష్యుల్‍మా ఆయోతే ఇస్కరియోతు కరి బోలాతే యూదామా సైతాన్‍ పేసిగయూ. 4 ఇనటేకె యో జైన్‍ యేసునా ఇవ్నాకనా కీమ్‍ ధరావ్‍నూకరీ వాతే బోలాన టేకె మందిర్ను అధిపతుల్‍ కనాబీ, షాస్త్రుల్‍ కనా గయో. 5 ఇనటేకె యూవ్నే ఖూషీహూయిన్‍, ఇనా రఫ్యా దేవానా ఒప్పిలీదా. 6 యుదా, యో వాత్‍నా ఒప్పిలిన్‍ యో ఇనకనా ఇనామాలం కోయిన్తే వఖాత్‍ యూవ్నా ధరవ్‍నూ కరి కావ్లీకాసిలిన్‍ జఫిరోతో. 7 పస్కానూ బోక్డానా బలిదేవనూ పోంగ్యు కోయిన్తే రోటొను పండగ కరనూ ధన్‍ ఆయు. 8 యేసు, పేతురు యేహాన్‍నా తూమే జైన్‍ అప్నా ఖావనాటేకె పస్కానా బణవో కరి బోలిమొక్‍ల్యొ. 9 యూవ్నే, హామే పస్కానా కేజ్జా కర్‍నూ కరి తూ సోచుకరస్‍ కరి పుఛవమా. 10 తూమే ఖాయార్మా జావను వోఖాత్‍ పాణీనూ బింది పళ్ళిన్‍ జాస్యేతే ఏక్‍ జణో తూమ్నా దేఖౌస్యే, తూమ్నా ఆడే ఆవ్‍సే, యో జైతే ఘర్‍మా తూమేబి ఇనాకేడె జైన్‍, 11 మే మార షిష్యుల్‍తి మళిన్‍ పస్కాను విందు ఖావన్‍ టేకె యో ఘర్‍నా మాలిక్‍తీ హామ్‍నా దేఖాఢ్‍ కరి బోలొ. 12 యో తూమ్‍నా ఘర్‍నూ మోట్టుమిద్ది పర్‍ దేఖాఢ్‍స్యే, ఏజ్గా పస్కానా కరో కరి బోల్యొ. 13 యూవ్నే జైన్‍ యో దేకిన్‍ మాలంకరీన్‍, యో బోల్యొ తిమ్మాస్‍ పస్కానా సీద్దం కర్య. 14 పస్కానా ఖావనూ వోహోఃత్‍ ఆవమా యోబి ఇనా షిష్యుల్‍ ఖావనా టేకె గుండ్‍ బేఠా. 15 తేదె మే ష్రమ పఢనా ఆగఢీ తూమారేతి ఆపస్కానా ఖాణు కరి ఆహ్‍ః కర్యొ. 16 పస్కాను విషయంనా దేవ్‍నూ రాజ్యంమా హువాతోడీ అజు కేధేబి ఆ ఖాణునా ఖైస్‍కోయిని కరి బోల్యొ. 17 యో గిన్నీనా పాఢీన్‍ దేవ్నా కృతజ్ఞాత కరీన్‍ తూమే ఆనా లీన్‍ పాంచీన్‍ ఖవో కరి బోల్యొ. 18 హంకేతూ దేవ్‍నూ రాజ్యం ఆవతోడీ మే అజు కేదెబి ద్రాక్చనూ రహ్‍ పీష్‍కోయిని కరి తూమారేతి బోలుకరూస్‍ కరి బోల్యొ. 19 ఇనబాద్‍మా ఏక్‍ రోటనా పాడీన్‍ దేవ్నా కృతజ్ఞత చెల్లించీన్‍, ఇనా తోఢీన్‍ యూవ్నా దీన్‍ తూమార టేకె దేవాంగ్రతే మారు ఆంగ్‍తన్‍ మన హఃయల్‍ కర్‍లేవనా టేకె ఆనా కరో కరి బోల్యొ. 20 ఇమ్మస్‍ ఖాణు ఖావనూ హూయిజావదీన్‍, ఏక్‍ గిన్నినా పాడీన్‍, ఆ తూమార టేకె ఛువడ్యోతే మారూ ల్హొయితి సీద్దం కర్యోతే నవూ నిబంధన. 21 హాదేక్‍ మన ధరౌస్యేతే అద్మి మారేతి ఖ్హాణు ఖావనా టేకె అజ్గ బేటోస్‍. 22 దేవ్‍ ఎంచిరాక్యుతీమ్‍స్‍ అద్మీనో ఛీయ్యో మర్జావను ఛా! యో కెహూ అద్మీనూ హాత్‍తీ ధరౌస్యేకీ యో అద్మినా ఘాణు ష్రమ కరి బోల్యో. 23 తేదె ఇవ్నే ఆ కామ్‍ కోన్‍కర్యు కరి ఏక్‍నా ఏక్‍ పుచైల్దు. 24 ఇవ్నామా కోన్‍ మోటు బోలౌస్యే కరి వాదించీలిదు, 25 యో యూవ్నేతి ఆమ్‍ బోల్యొ, అన్యుల్‍మా హూయితో రాజుల్‍ హీంసీచిన్‍ యూవ్నా యేల్యొ. పన్కీ యూవ్నఫర్‍ అధికారంతీ యూవ్నే ఖారావును కరి అద్మీయోమా దోస్తబోలానుకరి సోచ్ఛాస్‍. 26 కానీ తూమే ఇమ్‍ నార్హాను, తుమారమా మోట నామ్‍ ఛాతె అద్మి ఖారావ్తి న్హానా అద్మీయేనితర ర్హనూ, యాజమాని దాసుణ్‍నితర ర్హనూ. 27 కోన్‍ మోటు? ధాన్‍ ఖావనా బేటాతే యూవ్నేకీ నైతో ధాన్‍ నాఖాతే అద్మి? పన్కీ తుమారమ ధాన్‍ నాక్హా వాలుస్‍! కానీ మే తూమారకనా సేవ కరవాళోంతర ఛౌ. 28 తూమేబీ మారు కష్టాల్ క్హారమా కేడేస్‍ ర్హాసు. 29 ఇనటేకె మారో భా మన రాజ్యంనా దీదోతిమ్‍ మే బి తూమ్‍నా రాజ్యంనా దీస్‍. 30 తేదె తూమేబి మారు రాజ్యంమా మారేతీ బేసీన్‍ ధాన్‍ ఖాష్యు. రాజవ్‍ని బేంఛీయేఫర్‍ బేసీన్‍ భార వాంసాంను అద్మీయేఫర్‍ తీర్పు బోల్‍ష్యు కరి బోల్యొ. 31 సీమోన్‍, సీమోన్‍ హాఃజె సైతాన్‍ తూమ్‍నా ధరీన్‍ క్హేతార్‍ వాలో ఘౌనా ఛణ్కాతీమ్‍ ఛణక్‍నూ కరి తుమ్నా పరిక్చీంచును కరి దేవ్నా పుచ్చావాస్‍. 32 సిమోన్‍ తారు విస్వాసంకమ్‍ నాహోణుకరీ మే ప్రార్దన కర్యొ. తారు విస్వాసం ఘట్‍ హూయుతీమ్‍ తార భైయ్యెను విష్వాసంమతు నాపడిజానుతిమ్‍ ప్రార్థన కారిన్‍ ఘట్‍ కర్‍ కరి బోల్యొ. 33 తేదె సీమోన్‍ ప్రభు తారటేకె మే ఠాణామా ఆవ్‍కతోబి ఆయిస్‍, మర్‍కతోబి మరనాటేకెబి మేసిద్దం ఛౌకరీ బోల్యొ. 34 తేదె యేసు ఆమ్‍ బోల్యొ, ఆజ్నధన్నే పేతురూ తూ, మే మాలంకోయిని కరి తీన్‍ చోట్‍ బోలాతోడీ ముర్గు వాహ్‍ఃస్యే కరి తారేతి బొలుకరుస్‍. 35 బుజు యేసు యూవ్నేతీ, రఫ్యాసంచీ, హాత్‍నూ సంచీ, ఛేప్లె కోయినితిమ్‍ తూమ్‍నా బోలిమోకల్యొ తేదె తూమారు అవసరాల్‍ కోతీర్యున్నా? కరి పుఛాయో. కాయిబి కామ్‍ కోహుయునీ కరి యూవ్నే బోల్యు. 36 ఇనటేకె హంకే సంచీ ర్హవళు సంచీనా లీన్‍ జవో, ఛరీ కోయిన్తే అద్మీయే యూవ్నా లుంగ్ఢా ఏఛీన్‍ ఛరీ లేనూ; 37 యో అక్రమ కరతే అద్మీయేమా ఏక్‍నితర దేఖాయో, కరి లేకానంమా లీఖైర్యూతే వాతె మరకనా జరగ్‍స్యేకరి క్హాచీతీ బొలుకరుస్‍, కీమ్‍ కతో మార టెకెనూ వాతే ఖాతంహూయిజాస్యే కరి మే తూమారేతీ బోలుకరుస్‍ కరి బోల్యొ. 38 యూవ్నే “ప్రభు హమారకనా బే ఛరీ ఛాకరీ” బోలామా, “బైస్‍లా” కరి యో ఇవ్నేతీ బోల్యొ. 39 ఇనబాద్‍మా యూవ్నే ఏజ్గాతూ నీకీన్‍ రోజ్‍ జైతిమ్మస్‍ యో ధన్నేబి ఓలివనూ ఫహాఢ్‍ కనా జవమా ఇన సిష్యుల్‍బి ఇనా కేడే గయు. 40 యో ఫహాఢ్‍ కనా జైన్‍ యూవ్నేతి, తూమే షోధనమా నా జనూతీమ్‍ ప్రార్దన కరో. 41 యూవ్నకంతు ప్హాత్రో ప్హేకాతే ఏత్రు దూర్‍ జైన్‍ డూగ్నేఫర్‍ బేసీన్‍ ప్రార్దన కర్యో. 42 భా ఆ గిన్నీనా తూన ఇష్టం హూస్యేతో మార కన్‍తూ కణ్నాక్‍, రైతోబి మారు ఇష్టం కాహే, తారుస్‍ చిత్తంహూవదే కరి ప్రార్దన కర్యో. 43 తేదె స్వరగ్‍ మతూ ఏక్‍ దూత ఆయిన్‍, ఇనా దేక్హాయిన్‍ బలపరుచ్యు. 44 యో వేధన పఢీన్‍ అజు గ్హణు ప్రార్దన కరమా ఇనూ పస్నో లోహిను బుంధనితర జమీన్‍ ఫర్‍ పడ్యు. 45 ప్రార్ధన హూయిజవదీన్‍ యో ఉట్టీన్‍ సిష్యుల్‍ కనా ఆయిన్‍ దేఖామా, యూవ్నే దుఃఖంతీ థకిజైన్‍ ఖుత్యుథూ. 46 తేదె యూవ్నేతీ, తూమే ష్యాన ఖూత్యాస్‍? షోధనమా నా జనూకతో జాగీరైన్‍ ప్రార్ధన కరో. 47 యో బుజుబి ఇమ్మస్‍ వాతే బోలు కరతో, యత్రాస్‍మా అద్మీయే హాఃరు గుంబల్తీ భరైన్‍ ఆయు, భార జణా సిష్యుల్‍ ఏక్‍ జణొ ఇవ్నామా థో. యో యేసునా బుఛ్చా దేవనాటేకె ఆగడీ ఆయో. 48 యేసు యూదాతి, తూ బుఛ్చా దీన్‍ అద్మీనో ఛీయ్యోనా ధరైదేంక్రరస్‍నా కరి బోల్యొ. 49 ఇనా కేడె ఛాతే షిష్యుల్‍ యో ఖారు దేఖీన్‍, ప్రభూ ఆవ్నా ఛరీతీ ఖత్తర్‍నాఖేనా? కరి బోల్యు. 50 యత్రస్‍మా యూవ్నామనో ఏక్‍ జణొ ప్రధాన యాజకుడ్‍ను దాసుడ్‍ను ఖావత్‍నూ ఖాన్‍నా కత్తర్‍నాఖ్యు. 51 పన్కీ యేసు, భంధ్‍కరో అజు బైస్‍కరీ బోలిన్‍, ఇనా ఖాన్‍నా ఛీమీన్‍ అసేల్‍ కర్యో. 52 ఇనా ధరాన ఆయూతే అద్మీయేతి యో, ప్రధాన యాజకుల్‍, ఆలయంనూ మోటావ్‍తి తూమే ఛోర్‍నా ధరాన ఆయాతిమ్‍ ఛ్హారియేతిబి లాక్డీయోతీ, ఆయానా? 53 మే హార్‍ ధన్‍ తూమార షేడే ఆలయంమా థో కాని తూమే మన ధర్యాకోయిని. ఆ తూమారు సమయం అంధారనూ షక్తియేను సమయం కరి బోల్యొ. 54 యూవ్నే ఇనా ధరీన్‍ భందించిన్‍ ప్రధాని యాజకుడ్‍నా ఘర్‍మా లీన్‍ గయు, కాని పేతురు యూవ్నా పీటే ఢీలే ఛాల్తొఆయో. 55 తేదె థోడు అద్మీయే ఠణ్‍మా ఆగ్‍ షేకాన టేకె ఆగ్‍ బాళిన్‍ ఇన ఆష్పిస్‍ బేటూతో యూవ్నామా పేతురుబి జైన్‍ బేసిగయో. 56 తేదె ఏక్‍ బాయికో, యో ఆగ్‍నూ ఉజాళమా పేతురునా దేఖిన్‍ ఆ భి యేసుతి ర్హయ్యోస్‍హూయో కరి బోలి. 57 ఇనఖాజే పేతురు యో ఛోగిరితి యో కోన్‍కీ మన మాలం కోయిని కరి బోల్యొ. 58 బుజ్జరగఢీతీ అజేక్‍ జణుబి ఇన దేఖిన్‍ తూబి యూవ్నామా ఏక్‍ కరి బోలామా. ఇనాబి ఇమ్మస్‍ యో మే కాహే కరి బోల్యొ. 59 జరగడ్‍తూ బుజేక్‍ జణోబి దేఖిన్‍, “ఆ బి ఇనకేడే ర్హయ్యో, ఆ గలీలయనోస్‍ అద్మి” కరి ఘట్‍ బోల్యొ. 60 ఇనటేకె “పేతురూ తూమే ష్యాత్‍ బోలుకరస్‍కీ మన మాలంకోయిని కరి బోలుస్‍కర ముర్గు” వాష్యు 61 తేదె యేసు పేతురూ మ్హణీ పరీన్‍ దేక్యో, తేదె ప్రభు “ఆజ్‍ ముర్గు వాహఃను అగాడి మే కోన్‍కీ మాలంకోయిని కరి తీన్‍ చోట్‍ బోలిస్‍” కరి బోల్యొతె వాత్‍ పేతుర్‍నా హఃయాల్‍ ఆయూ. 62 తేదె యో బాధర్‍ జైన్‍ దుఃఖం పఢీన్‍ రోయ్యో. 63 యేసునా ధర్యుతే అద్మీయే ఇనా ఇజ్జాత్‍ కాడీన్‍ మారీన్‍. 64 ఇనూ ఢోలా భ్హాందిన్‍ తు ప్రవాక్తానీ, తూన మార్యుతే కోన్‍కీ బోల్‍ కరి బోల్యా. 65 బుజు విరోధ్‍తి కేత్రుకీ నక్‍ల్‍ కర్తుహూయిన్‍ వుజు ఆవుమానంను వాతే బోల్తు హుయిన్‍, దూషిస్తా ర్హయ్యా. 66 వ్హాణు హూస్‍కర యూదుల్‍నా మోటా, ప్రధాన యాజకుల్‍ షాస్ర్తుల్‍ ఖారు ఏక్‍ జోగోమా మళిన్‍, యేసునా మోటా సభమా బులాలిన్‍ ఆయూ. 67 ఏజ్గా యేసునా “తూ క్రీస్తు హూస్యేతో హమారేతి బోల్‍” కరి బోల్యు. తేదె యో “మే బోల్యొతోబి తూమే నమ్‍స్యు కోయిని కరి బోల్యొ. 68 మే తూమ్‍నా పుఛాయోతో తూమే మన జవాబ్‍ దిస్యుకోయిని. 69 కాని హంకేతూ ధరీన్‍ అద్మినొ ఛియ్యో సర్వోన్నత్ దేవ్‍ని ఖవ్వాహాత్‍ను మ్హాంఢీఫర్‍ బేహ్‍ఃస్యే” కరి బోల్యా. 70 ఇనటేకె యూవ్నే, ఇమ్‍ హూస్యేతో తూ దేవ్నొ ఛియ్యోనా? తూ బోల్యొతిమ్‍ యో మేస్‍కరీ యూవ్నేతి బోల్యొ. 71 తేదె యూవ్నే అజు అప్నా సాక్చల్‍తి కామ్‍ ష్యాత్‍? ఇనా మోఢవాటేస్‍ ఖంజకున్నా కరి బోల్యా.