LUKA 9

1 Ege E darabgerare abara kaimeg giz, tuelf le, ege E uiabim nakuarare abele adigiri, pako abele sirdam demoni giz uridili dituaki, pako gaire gim le giz uiabi idigiri. 2 Ege E uiabi namarida ko natomertare Ade ra baselaia ge, a uiabi idigiri gaire gim le. 3 Ege E uiabim detager, kega, Uaba nole lu aisare kak abele bakeamu, nole koket kak, nole epei kak, nole leuer kak, a nole mani kak; a nole neisi am uali ameare. 4 Uaba nerute meta ge badari, emeri abele, a iako bakeamu. 5 Uiaba le giz uabim agared kak, a nolea uabi asor kak, uaba bakeamu abele gedlam, sep ditkeda uaba teter gablam, uiabi atamelam. 6 Ege uiaba bakeauare, deraueli gaire ged, a natomertare Ade ra debe mer, a uiabi idigiri gaire gim le uridili. 7 Ege Heroda opole asoli gaire lu uridili emetu ikeli: epe abara nerkep au okasosok, abelelam uader detager, kega, Ioane Bapataiso ko eded akaida eudelam; 8 A uader detager, kega, Elia pedali paret kak; epe uader detager, kega, Nerute perofeta emeretlam, E ko eded akaida. 9 Heroda detager, kega, Kaka derapeida Ioane ra kerem: nete le kaka asoli gaire mer mokakalam? E lagelag abi dasmer. 10 Ege kaimeg giz ko takomeda, uiaba abim etomertare gaire lu uiaba emetu ikeli. Epe E uiabi ais nerute uteb, nolea le kak, abele ged nei atker Bethesaida. 11 Ege gaire le lakub uiaba emetu umele, a uiaba abi irmilare: ege E uiabi agiz, E uiabi detager tonar Ade ra baselaia ge, pako idigiri uader le lagelag eded. 12 Ege maike lem baraigida; epe gaire tuelf le tabarki, a abi detager, kega, Debele ma namarida gaire le lakub, iaueakai uiaba bakeauare gaire uteb, abele kebi uteb maike, uiaba emeri, a leuer deraimer: abelelam abele uteb nolea le kak. 13 Ege E uiabi detager, kega, Uaba uiabi leuer ikuar. Ege uiaba abi detager, kega, Meriba nolea leuer kak, no faif areto a lar neisi; debele keriba ko bakeamu leuer terapei uiabim peike gaire le lakub. 14 Abelelam mokakalam faif tausan le uridili. Ege E uiabim detager, kega, abara kaimeg giz, Uaba uiabim detager debele uiaba manoro emeri, fifte le gaire nosik. 15 Ege uiaba ikerare abkoreb mokakalam abara mer, a uiabim uridili detagereda, kega, Gaire nosik uaba mamoro emeri. 16 Epe E tais faif areto a lar neisi, E kotor dimirualu, a esoao, a itur; a uiabi nakuarare, abara kaimeg giz, a uiaba naisuerare abele gaire le lakub. 17 Ege uiaba eroare, ege uiaba uridili gem osmeda; epe uiaba kaier leuer arot epei ge, ege tuelf epei osmeda, leuer mogmog. 18 Nerut kerkerge, Iesu tebteb erkepasameirer. Ege memegle ko ge urder, ege eudi ge yabi nautmerda, “Nako legize detauteda kaka nete nali?" 19 Wige abi detagerda, “Kepkep legize detauteda mama Zone Baptaiso nali; a wader legize pe ikereda mama Elaiza nali; a wader legize pe detauteda mama au emeret peropeta nali ko ma idid akaida." 20 Ege yabi nautmerda, “A wape nako pewa detauteda ka nete nali?” Peterude abi detagri, “Mama Agudira Keriso nali." 21 Ege Iesude yabi kelarkelar daratagerda ko nole able mir waditauteda netat leem. 22 Ega yabi ko daratagerda, “Able Lera Werem e ya au asiasi wadigi, a Aule, a Kebi Kirim Merkem, a Aotale ya nole abi lagkak waurder. Abi ya waipitare, e neis a netat gergerge ya ko wayakai idid obai." 23 Ege ga akaida gair le daratagerda ge ge urder, “Nete laglag karidoge watabakiamu, e nole tababu obakepwarwa, tababu tabara satauro wepwa gair gegerge, a kari wanarmirwa. 24 Netide laglag tabara idid wakur, e ya weumi: nete ya karim weumi e ya tabara idid watirpei.” MIZMIZ 9 NOSIK 28-36 25 Abelelam, ese nerute le geseb ge uridili terapei, a abara mar abi, pako adem, nalu bodomalam abim? 26 Ese nerute le kari sirip ge, pako kara mer, abkoreb Le la Uerem ko abi sirip ge, E tabarki kemem gaire angela zogo, abara Aba zorom ge. 27 Ageakar, kaka uabim detager, kega, Uader peike, uiaba nole eud kak, kekiam uiaba Ade ra baselaia dasmerauem. 28 Able piripiri mokakalam 8 gerger barukdarda ge Iesude able lu daratautlare, ege Peteru, Zone a Zemis naisidare paserem ogidare erkepasamem. 29 Nade ga e erkepasameirer, abra op depigemelu a abra wali akaida mokakalam poni atkiredatkired perper. 30 Keserkeser neis le, Mose a Elaiza, ge daralei abi mir detagelei. 31 Wi batomerdariei yabi zoromide nadari, wige Iesui detagerlei nako abra ididira mop ya Yerusalemage waikereder muige Agudi mirapuge. 32 Peteru a nerut neis memegle wi ut nardeder, ege wi ekiamdare a Yesura zorom dasmerdare a neis le nakweireder abi kemem. 33 Nade able legize Iesui dikairetlei, Peterude abi ikailu, “Kirimle, e debele ike ki peki dale. Ki neis a netat mud akerdare, netat marim, netat Moseim a netat Elaizaim.” (E nole umerkak e nalu detauter.) 34 Nade ga e mena mir detauter, baz tikalu a abi mudide yabi natkamidare. Able memegle geumge bakerer ge yabi bazide nartidare. 35 Ege kodomir teosmeda bazlam, “Kara werem pedali, Kaka itutida. Abi asrawem!" 36 Nade ga kodomir esemuda, Yesu ga tebteb ikweireder. Ege memeglegize gumik ispilare a wi nole le daratagerda able kerkerge. Legize Iesui Detwagda Able Utebge Ge Samariage Irdireder mizmiz 9 nosik 51-62 37 Idim ge, uiaba paserlam batueli, epe uiaba obapit gaire le lakub. 38 Dasmer, nerute le ereretikri le lakublam, kega, Ereuere le ae, kaka mari damosi, ma dasmer kara uerem; abelelam kara uerem netate: 39 Dasmer, ege E nagri abara gim lamar uit, epe E ereretikri, E udud, abara te ueker, E bapegiri, E nolea sobkak osmelu. 40 Kaka damosi mara kaimeg giz, uiaba dituaki osmeda adige; a uiaba nolea umer kak. 41 Ege Iesu detaut, kega, Abele nosik nolea oatur kak, pako erar, kaka uabim kemem naket gerger? pako omare uabim naket gerger? mara uerem karim tegaret. 42 Ege E tabakeamu, E ekesmeri, E udud, abele demoni giz, epe Iesu daisumda abele uit lamar, pako idigiri abele uerem, E ikuar abara aba. 43 Ege uiaba uridili au damreda Ade ra atamelam. Epe uiaba uridili au damreda gaire lu Iesu de ikeli, epe E uiabi detager, abara kaimeg giz, 44 Uaba mamoro asoli abele mer: abelelam Ade ra Uerem maike uadikuarare le la tag. 45 A uiaba nolea umer kak abele mer, ege uiaba nolea erdali, abelelam uiaba nolea asoli abele lu: ege uiaba au geum abi itimer tonar abele mer. 46 Ege uiaba asareda, nete le aule. 47 Ege Iesu opasereret abele dikiapore uiaba nerkep, epe E erpei nerute kebi uerem, E ekue maike abi dog. 48 Ege E uiabi daratagerare, kega, Ese nerute le tegared abele kebi uerem kari nei ge, ege E karim tegared: ese nerute le karim tegared, ege E tegared abele le kari namarida: abelelam E kebile ise uabim dali, E aule. 49 Ege Ioane de abi detager, kega, Opole, keriba erdali nerute le E imud demoni giz mari nei ge; epe keriba abi daisumdardar, abelelam E nolea meribi irmili. 50 Ege Iesu abi detager, kega, Uaba nolea daisumda: ese nerute le nole meribi dedkoli, E meribi okakis. 51 Maike ga dikereder abra kerker waditutida nade Iesui ya ko waigardi kotorem, ege tabara idoni detaurigda obakiamuda Ierusalemaem. 52 Ege mir aisisle kikem namarikdarda; wi bakiauda ge able utebge muige Samariage ko abim lu watidisirda. 53 Ege le ge turder nole Iesui opdipita ableglam e kei ikasereder Ierusalamaem. 54 Nade able neis memegle Zemisiba Zonei able mir asriei wige eutmeriei, “Ople, nako ma laglag nali ki ur dabgerei kotorlam watabu able le wanasare?" 55 Iesu bataurikda ge yabi nataperti, wige no bakiaudare nerut utebem. 56 Abelelam Ade ra Uerem tabarki nolea dedkoli le la eded, epe E tabarki ueakai gaire le eded nagri. Ui ge bakeauare nerute utebem. 57 Nawer ga wi gabge nakasirweretlare, ege kimiaride Iesui detagri, “Ka mari namirer nagedim ma nakasereder." 58 Iesude ge abi ikaidari, “Sumes ebur uridli yaba sumesge uteb nagriwerteda, a aperdaraperdar ebur pe uridli yaba tabara pek darawerteda epe Lera Werem pedali abra nole tabara uteb dirdiredi ko weidi a ner wezi. 59 Iesu akaidari nerut kimiar detagri, “Ma kari tararmir.” Ege able kimiaride abi ikaidari, “Ople, ma kari kikem namarik ka nabakiamulu kara bab tatkobeilu." 60 Ege Iesude abi detagri, “Eudlegize umele tababu tabara eud buai wanatkoblare. Mage bakiamu eosmer able mir Agudi Basalayara ebrered." 61 Nerut kimiar ge akaidari, “Ople, Kaka yaka mari narmire, mage kari nakai ka nabakiamulu kara buai taramrare." 62 Iesude eudige abi detagri, “Netiba pe nole tababu kemerkemer baiswereda taba dorgeem pe Agudi gedubge ikeredi e nole abkorep dali Agudi Basalayage."