LUKA 21

1 Ege E egreemalu, E erdali lu giz ra apu, uiaba batauered uiaba mani, abele uteb mani ikedi. 2 Ege E erdali nerute mai kosker, nole lu kak, E batauered neisi kebi mani. 3 Ege E uiabi detager, kega, Ageakar, kaka uabi detager, kega, Abele mai kosker, abara mani batauered, E aule uiabi dog uridili: 4 Abelelam uiaba uridili batauered uiaba mani, gaire uiaba lulam: ege abele mai kosker, nolea lu kak, E batauered abara kebi mani uridili, abkoreb abara eded. 5 Ege uader mer batagerare abele lu muige zogo meta ge, ege mamoro derser debe baker, pako uader zeku lu muige zogo meta, E uiabim daratagerare, kega, 6 Ege gaire lu uaba dasmerare, keubu gerger tabarki, nole baker ko igi tumem nerute baker, a nole abu kak. 7 Ui ge abi itimerare, kega, Ereuer le, na kerker ge gaire lu tabarki? a nalu atamelam gaire lu tabarki? 8 E uiabim detaut, kega, Uaba mamoro dikiaporare, nerute le uabi okardare: abelelam gaire le ko uatabarkare kara nei ge, kega, Kakanali. Ege abele kerker maike: uaba nole uiabim irimili. 9 Ese uaba asoli ares, a mirem, a uaba nole geum: abkoreb kekiam abele lu uatabaruk, a mop uarem. 10 E uiabi daratagereda, kega, Nerute ged tekuei obapit nerute ged, a nerute baselaia obapit nerute baselaia: 11 Au demali ia uanagiri abele uteb ge, a nerute uteb ge, a uererege, a gimgim, a urker, a gaire atamelam kotor ge. 12 Gaire lu nole tabarki, a uiaba uabi erpei, a dedkoli, a uiaba uabi uademarkar sunagoem, pako audbar metaem, a uiaba uabi uadeguatare opole giz opem, kara neilam. 13 Abele gaire lu uabim atamelam. 14 Abele lu, debele ikedi uabi nerkep ge, iaueakai uaba nole kekiam deraimer, a dikiapor na mer ko detager: 15 Abelelam kaka uabi dekuarda abele mer, a pardar, umer kak nerute le uabi asared, uaba au saserim. 16 A uaba ab giz emarik, a keimer giz, a boai giz; a uader uabi ipit eumilu. 17 Gaire le uridili ko uabi derar, kara neilam. 18 A uaba kerem mus, nole nerute mus abi. 19 Ese uaba debe tonar, a uaba eded nagri. 20 Ese uaba erdali Ierusalema ge, urker ares deraueli, a uaba dikiapor maike dedkoli. 21 Abele gerger uader emeri Iudaia ge, debele uiaba bakeuare paserem; uader emeri muige abele uteb ge, debele ui adem obakeuare; uader emeri sumez ge, uiaba nole ko akomeda muige abele uteb ge. 22 Abelelam abele kerker bodomalam, iaueakai gaire lu ageakarem emetu detarare. 23 Uaiai uiaba kosker kem, pako uiaba nano emeli abele gerger giz! abelelam au asias tabarki abele ged ge, pako urker. 24 A uiaba eumid teibur aosaos tulik gargerlam, a uiaba no bakeamu gaire ged uridili: a gaire nogle uiaba dedkoli Ierusalema, a keubu abele nogle giz uiaba erdali uiaba mop. 25 Iesude detauti, “Able adudlu ya obakelare limge, mebge a pako werge. Able gesepge, wader buaigiz ya able gur bumerlam a au meglam geumge obakelare. 26 “Le ya geumge erkepinorge obakelare nade wi odasmerlare able bodomalam ya watabakiamu kemerkemer gesepem; wer a wader lu pe mige nagri ya adem obaker taba agekar uteblam. 27 “Keubu wi odasmerare Lera Werem watabakiamu bazge au sasrimsasrim a au zoromzorom. 28 “Nade able lu ya obagrertare, wa bako a erkep adem nagredawa ableglam wabi azimwaretira kerker pe itutida." 29 Ege Iesude yabi gesepira ad daratagerda; “Wa bager a dasmerare able roz lusik. 30 “Nade wa dasmerarwem yaba lulam ya obatiare a obom, wa umele Koki ya obaruk. 31 “Able korepge, nade wa dasmerlare able wader adud a geumgeum lu ya obakelare, wage umele uridwa Agudira Baselaya ya watabakiamu. 32 “Kaka wabi agekar detagreda, able lu ya obakelare keubu ya able le obaom. 33 “Kotor iba gesep ei ya obasmawam, kara mir ya mena niayem waikereder." 34 “Wa okeoke! Wa erkepeskawem! Wa nole wabu baiswerawem a gair akepwar waba wanagriwertawem aumitkar lewer erwawem, a nole au goroki iriawem a nole waba gesep akepwar wanagriwertawem. 35 “Ese wa able lu ikelare, able Gergeride ya wabi keserkeser wadirpare nole atagerkak. 36 “Wa erkepeskawem, a erkebasamwa ya wayakai wa umele adem bakeslare gair able luglam, a wa umele nole geumkak nakweder Le Werem opem." 37 Abara tonar E ereuerem gerger ge, muige zogo meta, ki ge osmed, E emeri nerute paser, nei atker Oliua. 38 Idim ge, abele ged ge uridili tabakeuare abele zogo meta ge, lagelag asarare abara mer.