GWAY GI IDAWUU'D 84

1 Mom pini jin c̱a’ba /e mo tani wanu ena, ayy Tap̱a gi momis mo. 2 Aḵashiram pem c̱orki’da c̱or mo, nye a’di ’thikina buye/ mo gom mo ki monyc̱a’b gi Tap̱a mo. Adum pem dhali buŋgwar is pem yuḵi gway ki bwaŋ ‘kunyga/ goma Arumgimis jin di ki e mo. 3 Isi kan si’da/ ara ganya/ a’di gamki gu’b mo dhala gwajayilil taki’d gi gu’b gom is piti mo, e mo jin mina a’di dho’th ushan piti mo, e mo ma gwaṯam pini jin miinu to mo, ayy Tap̱a gi momis mo, /e jin tana Maliḵ pem mo dhali Arumgimis pem mo. 4 Mom’bor mii gom uni gwansan kun ‘kokin e gu’b pini mo, uni gun yuḵki gway mmomaŋ /e ki sule/ sule/ mo. Doshi ma dhali ‘cunycuri yan mo. 5 Mom’bor mii gom ‘kwani gwahan kun ‘kona mom’bi’th is e /e mo, dhali uni gun ḵwasharr ma du ki ḵwasharr e bway ma Sihyuun mo. 6 Me’d jin iikina uni ka luŋgu’b e embul wosh ma Buka mo tani uni ki war a’di mmota mo jin kasha yi’de/ e ki kash mo, dhala shoka ‘ce’dc̱ipiny tashki a’di ‘kup̱ ki usha al piti mo. 7 Uni iikin ki mo jin ‘bithu is mo itagi mo jin ‘bithu is mo. Arumgimis jin bol tiya e ki ‘bor mo tani a’di iminu mish mo eya Sihyuun mo. 8 Ayy Tap̱a Arumgimis gi momis mo, ciḵi mon’thom pem mo ma. Dhali c̱iyi /e ‘ce mo, ayy Arumgimis ma Yakuub mo. Doshi ma dhali ‘cunycuri yan mo. 9 Hila goŋgoro/ me’d bam mo ma, ayy Arumgimis. Hili ‘kup̱ ki jis/e gi a’dim pini jin ‘koshu ki monyca mo. 10 Haali/ atee gi mo ki monyc̱a’b pini mo tani a’di ‘boro’d mo, mmobola alip̱ gi mo gunn e mo. Aha/ mina ’taki dhal mii gunn e i is ’te/ sayi mmota manhil ’twaŋkal gu’b ma Arumgimis pem mo mmobol mo jin ‘konu e gu’ba’ku/ gi ‘kwani kun ta thus ki thus e mo. 11 Haali/ Tap̱a Arumgimis a’di ta’da tente/ dhali agoŋgoro/ mo. A’di c̱iki mo ma ’the dhali montaḵ mo. Tom ‘boro’da kamu/ mina Tap̱a non yisa ‘peni uni gwansan kun iikin ki iiŋ gana/ mo. 12 Ayy Tap̱a gi momis mo, mom’bor mii gom wathi/ jin gamki gwo is e /e mo.