GWAY GI IDAWUU'D 129

1 Ka daran duŋ gana/ mo tani uni wo’cki aha/ is she/ mo ‘peni dhuru’c pem jin taka/ mo, dhalka Israyiil o gwo wakan shwane/ mo – 2 Ka daran duŋ gana/ mo tani uni wo’cki aha/ is she/ mo ‘peni dhuru’c pem jin taka/ mo, hili uni ‘koki p̱i gwo jip̱i/ ap̱o/ aha/ mo. 3 Imangora ‘cesh uni gorkina ‘cesha p̱owa p̱om pem mo. Dhali uni dherki gwan’thim buni ki tur tur mo. 4 Tap̱a a’di ta’da ḵar/e mo. A’di ‘ciṯẖki’da shi/ gi ‘kwani kun ta thus ki thus bwa mo. 5 Dhalki uni gwansan kun shi/kina Sihyuuni e mo tani dhunu ki mo ma ’the is mo dhali dhuwa bor ki tar mo. 6 Dhalki uni wana e ka shoŋ ‘kuŋgu’b mo kun ḵu’thkin mo iṯwa/a/ ki uni ‘koki ca mo, 7 a’di jin din ma man’ciṯẖ to ki ’tu’d me’d piti mo, walla aman’de’k cwalman maman to ki ḵala bor piti mo, 8 ki ‘kwani gwansan kun iin mo mmope a’di mo tani ‘koki o gwo mo ki: Mom’bor mii gi Tap̱a midi di ap̱o/ /e mo. Aman ‘bora /e mii ki gway gi Tap̱a mo.