GWAY GI IDAWUU'D 112

1 Maŋi Tap̱a mo. Mom’bor mii gom wathi/ jin ḵo/ki Tap̱a mo, a’di jin ‘kunykina bwa ki ‘kuny kagahara e gwoŋḵan piti kun ‘kwarkunu mo. 2 Emen piti mini c̱a’bki dem dem e mony’cesh mo, dhala nyaḵum yil gi ‘kwani kun dhelel ma du mo tani uni minu ‘bor mii mo. 3 Pa jin tanu dhali pa jin tana a’di e gu’b piti mo dhali mo ma ḵar/em piti ‘dimki ‘kup̱ ki sule/ sule/ mo. 4 Moŋkush cuki mis e bwaman mondhurumi’d gom uni kun dhelel ma du mo. Tap̱a a’di ta’da ’the mo dhali ta’da manmiimii mo dhali ta’da ḵar/e mo. 5 A’di ‘boro’di gom wathi/ jin ṯu/ulki mii ki mii ma ’the mo dhali c̱i to ka ‘ka’d me’di is mo, a’di jin mishi is piti ninn gom tom piti ki mii ma ḵar/e mo. 6 Haali/ wathiŋ ḵar/e a’di molu joc̱ ki sule/ sule/ mo. A’di minu ka e ki sule/ sule/ ya ye ‘ba/ mo. 7 Dhali a’di midi diki ḵo/ is gom tonthus jin minu ḵal mo. Adum piti rwa’ckunu mo, mmogamkina a’di gwo is e Tap̱a mo. 8 Adum piti shurki’d mo, a’di midi diki ḵo/ is mo ntagi a’di midi p̱ar to jin ona bwa a’di e ap̱o/ uni kun ta ‘kup̱ ki a’di mo. 9 A’di ki pwaḵ to bwa ‘baḵany mo, a’di c̱iki to gom ‘kwani kun hatha’ko’d mo, mii ma ḵar/em piti a’di ‘dimki ‘kup̱ ki sule/ sule/ ya ye ‘ba/ mo. Cem piti a’di karkunu ki ca ki montaḵ mo. 10 Wathi/ jin ta thus ki thus mo tani a’di p̱arki a’di e mo dhali a’di shwa’da nyor mo. A’di ki ‘pe’d shem piti mo dhali wa mo. To jin ona bwa wathi/ jin ta thus ki thus mo tani warki’d ka munyjal mo.