Mbouŋ To Yes Israela 136

1 Lolomim poia pa Yoova ve apaiti. Pasaa, i poia le poia kat. I loolo isaghav tamtamon tooni, ve iuluul zi irau saawe. 2 Lolomim poia pa Maaron ve apaiti. Pasaa, i iliiv zimaronŋa tisov. I loolo isaghav tamtamon tooni, ve iuluul zi irau saawe. 3 Lolomim poia pani ve apaiti. Pasaa, i Maaron tiina tau iliiv zimaronŋa tisov. I loolo isaghav tamtamon tooni, ve iuluul zi irau saawe. 4 I mon ta ighamgham gabua ŋgeretazi tau tintiina kat. I loolo isaghav tamtamon tooni, ve iuluul zi irau saawe. 5 Muuŋ, i ighur gabua naol isov tau tighenaar ila sambam saamba. Uraat tooni tawe, ighamu toman ŋgar le ivot kat. I loolo isaghav tamtamon tooni, ve iuluul zi irau saawe. 6 I ighur taan izala te paavo. I loolo isaghav tamtamon tooni, ve iuluul zi irau saawe. 7 Ve ighur gabua tintiina tigheen ila sambam saamba to tigham nugh ighazooŋ. I loolo isaghav tamtamon tooni, ve iuluul zi irau saawe. 8 I ighur aaz, leso ighaaz pa mataaz. I loolo isaghav tamtamon tooni, ve iuluul zi irau saawe. 9 Ve ighur kaiyo ve pitum, leso tisul pa mboŋ. I loolo isaghav tamtamon tooni, ve iuluul zi irau saawe. 10 I ta iravuur yes Isipa natuzŋa aidabazŋa. I loolo isaghav tamtamon tooni, ve iuluul zi irau saawe. 11 Ve igham yes Israela tipul yes Isipa ve tivot. I loolo isaghav tamtamon tooni, ve iuluul zi irau saawe. 12 Saawe tana, i itotoi tapiri tiina ivot ighazooŋ. I loolo isaghav tamtamon tooni, ve iuluul zi irau saawe. 13 I ivalagh te, gha sirivu ila pa ŋas, ve sirivu ila pa tapir, le taan gorgori ivot. I loolo isaghav tamtamon tooni, ve iuluul zi irau saawe. 14 Ve igherev yes Israela, gha tilaagh ila taan mamaasa tau igheen bodbodaaŋ to te na, ve tila tivool ziige ite. I loolo isaghav tamtamon tooni, ve iuluul zi irau saawe. 15 Ve igham Te Siŋsiŋai itav kinik to yes Isipa tomania zaaba tooni, le tisov tighun te gha timataar. I loolo isaghav tamtamon tooni, ve iuluul zi irau saawe. 16 I imuŋmuuŋ pa tamtamon tooni gha yesŋa tilaghlaagh izi nugh ŋginaaŋa. I loolo isaghav tamtamon tooni, ve iuluul zi irau saawe. 17 Ve irav kinik tau tapirizi tiina na timatmaat. I loolo isaghav tamtamon tooni, ve iuluul zi irau saawe. 18 Kinik tau ezazi tintiina na, i irav zi timatmaat. I loolo isaghav tamtamon tooni, ve iuluul zi irau saawe. 19 I irav Amora kinik toozi Sihon imaat. I loolo isaghav tamtamon tooni, ve iuluul zi irau saawe. 20 Ve irav Og tau kinik to Basan na paam. I loolo isaghav tamtamon tooni, ve iuluul zi irau saawe. 21 Ve igham taan toozi imin yes Israela lezi motot. I loolo isaghav tamtamon tooni, ve iuluul zi irau saawe. 22 Igham taan tawe pa yes Israela tau besooŋa tooni na, leso tileep pani taghon taghon gha ila. I loolo isaghav tamtamon tooni, ve iuluul zi irau saawe. 23 Saawe tau koiaanŋa titatan ghiit le tavaghamgham, Maaron loolo iveegh pait mako. I loolo isaghav tamtamon tooni, ve iuluul zi irau saawe. 24 Igham mulin ghiit ila koiaanŋa nimazi. I loolo isaghav tamtamon tooni, ve iuluul zi irau saawe. 25 I ta ipanpan iit tamtamon tomania gabua naol isov. I loolo isaghav tamtamon tooni, ve iuluul zi irau saawe. 26 Tauvene lolomim poia pa Maaron to sambam, ve apaiti pa poia tooni! Pasaa, i loolo isaghav tamtamon tooni, ve iuluul zi irau saawe.