Mbouŋ To Yes Israela 121

1 Matag izala pa loloz naghe naghita: Uleeŋ pale ilam payau mindai? 2 Yoova mon ta pale nagham uleeŋ ila tooni. I ta ighur sambam ve taan. 3 I aat maata payo. Irau ipul ghom aghem pusukia ve utap mako. Ŋginiiŋ tsio imamaat irau saawe. 4 Onoon kat, ŋginiiŋ to iit Israela, ighe maata ighengheen, ene irau igheen mako. Imamaat irau saawe. 5 Yoova maata payo ve iŋgin ghom, leso uleep poi. I ileep ila zigem, ve imin yavyaav payo to ipoon ghom pa aaz. 6 Tauvene mataaz, aaz irau ighaaz katin ghom mako. Ve mboŋ, kaiyo irau ivaghamun ghom mako. 7 Yoova aat maata payo, ve ipoon ghom pa gabua sasaghati naol isov. I tauu pale iŋgin ghom uleep poi. 8 I pale maata pa laghooŋ tsio ve lepoogh tsio. Tauvene saawe tau upul ruum ve uvot ula, le umuul uloŋ ulam, i pale ileep tomani ghom, ve iŋgin ghom uleep poi. Ta aazne, ve taghon taghon gha ila.