Zafaniya 2

1 Ɓolotoi, ɓolotoi, a̱ɗu iɗa yu ulambu u wono, 2 kafu e bete’we ɗu tso owopo, kafu upan wu usuɗuwu wa̱ A̱sulazuva u cipa̱a̱ ɗu, kafu urana wu upan wa̱ A̱sulazuva u ta̱wa̱ aci a̱ ɗu. 3 I zami A̱sulazuva suru nɗu, a̱ɗu na i tarai aciya̱ɗu ili i ro shi e iɗa’a, a̱ɗu na yaa yuwusan ili i na u dammai. I zami ya̱ a̱ɓula̱, i tara aciya̱ɗu ili i ro wan. U ta gura o’wo a pa’aton ɗu o urana wu upan wa̱ A̱sulazuva. 4 O to kototo Gaza Ashikelon to o’wo okongo. A̱ ta̱ gba̱ra̱ Ashido nu urana a aci, reve fo a̱ gba̱ra̱ Ekuron. 5 A̱tsuma̱lima̱ a ta cina a̱ɗu, a̱ɗu na i ri e ikyun i mala, a̱ɗu aza a Keretiya, adanshi a̱ A̱sulazuva a̱ ta̱ a̱ nla̱ngi na̱ ɗu, a̱vu Ka’ana iɗa ya aza a Filistiya, «N ta̱ kototo wu, hali na za a la’a shi.» 6 Iɗa i na i ri e ikyun i mala, uba̱ta̱ u na aza a Keretiya a̱ ri na̱ nden, u to o’wo uba̱ta̱ wa alyuna, nu uva̱la̱ta̱ wa aza a aguɓa nu uba̱ta̱ wa aguta e ikyon. 7 Uba̱ta̱’a̱ u to o’wo, uba̱ta̱ wa aza a na a buwai wuma o u’wa wa Yahuda, lo ɗa a yuwan alyuna. Nu ulivu a̱vu o von a ‘wa va aza a Ashikelon. Adama a na A̱sulazuva A̱sula̱ e le a̱ ta̱ da̱na̱ a ɗa e le, waru u ta̱ ka̱mbuwa̱a̱ le na aba’un e le. 8 «Mu uwwa ta̱ ulamu u na aza Mowa a yuwusan, na̱ wisulusa u na aza a Amon a yuwusan, aza a na ee isulusa ama a̱ va̱ a lapusa ma̱ka̱nka̱ a dansa, a ta lyuwa iɗa ya ama a̱ va̱. 9 A̱vu A̱sulazuva o oɓolo a̱ a̱soja a zuva A̱sula̱ a Isra’ila a damma, n kucina ta̱ na̱ wuma u va̱, Mowa to o’wo tso Sodom, aza a Amon waru tsa Gomora iɗa’a u ta shiwan na awanda na̱ a̱nci a akpaɗi, iɗa i na i kuwa̱i hali hali. Ama a̱ va̱ a na a la’ai a̱ ta̱ pura̱ itana i le, wo o’wo agadu le.» 10 A̱yi nda a̱yi ɗa ili i iliyinkapa ya aciyogbamu u le, adama a na a tarai ama’a ili i ro shi, reve a yuwan tsushu’un na ama a̱ A̱sulazuva o oɓolo a̱ a̱soja a zuva. 11 A̱sulazuva o to o’wo ili i wovon e ekere e le, na amayun u kototo musula̱ mu uvaɗi suru. Reve nɗa n na n ri e ikyun i mala a̱ ka̱ɗa̱to wa̱ yi, za suru diga e iɗa ya̱ yi. 12 «Hali na̱ a̱ɗu fo a̱za̱ a̱ Kush, o to o una ɗu na̱ matsun me pe’eni ma̱ va̱.» 13 A̱sulazuva a̱ ta̱ ba̱ruwa̱ ukere wa̱ yi a̱ tyo wu ugana u kototo Asuriya, u ta̱ ka̱mba̱to Niniva okongo, u’yewu tsa̱ a̱tsumona. 14 Iliyamunga o to von e memere ma̱ yi, na̱ cu’un vu nama biti. Vori na̱ papagula a̱ ta̱ da̱na̱ zuva va atsura a̱ lyuci’i, yisali i le i ta̱ da̱na̱ o uta̱sa̱ a angu a asula na̱ na̱ntsu, n’yuwatan n ta palu’wa ɗanga seda vu kwa̱’a̱ va̱ yi. 15 A̱yi nda a̱yi ɗa lyuci va afalu na shi nden gbaga, za na dammai aciya̱yi, «A̱mu ɗa goon, waru za ro lo shi!» A̱yi ɗa nda wo o’woi okongo, uba̱ta̱ wu nven wi inama yu una! Za na ka̱ra̱i lo suru, u ta cira a̱vu u gbaɗatsa aaci.