Nan Ganu 17

1 A̱sulazuva a yuwan ta̱ adanshi na̱ Musa u damma, 2 «Yuwan adanshi na̱ Haruna no olobo a̱ yi na ama a Isra’ila suru vu damma le, <Apa nda ili i na A̱sulazuva a zuwai: 3 na̱ vuma na a̱tsuma̱ a aza a Isra’ila paɗa ogono a nan ko mokyokyon ko megbele pe o uva̱la̱ta̱ ko ucina̱ wu uva̱la̱ta̱, 4 agba u ta̱wa̱ na̱ a̱yi o una̱ntsu wo Oogodo o Uga’asusan u ca kucci vu uneꞌe wa̱ yi e ekere a̱ A̱sulazuva elime a̱ a̱a̱’isa̱ a̱ A̱sulazuva shi, ume wu unusu wu mpasa u ta a aci a̱ yi. Wo oco ta̱ mpasa, a ta tawa vuma ndolo a̱tsuma̱ a ama a̱ yi. 5 A̱yi nda u ta dansa ama a Isra’ila a̱ ta̱ a̱ ri n ta̱wusa̱a̱ na̱ kucci na aa casu a atsusa uba̱ta̱ wa̱ A̱sulazuva e ekere a ganu o una̱ntsu wo Oogodo o Uga’asusan. Reve a ca kucci le vu muwwulai e ekere a̱ A̱sulazuva. 6 Reve ganu kyo’onu mpasa’a a masa’a ma̱ A̱sulazuva o una̱ntsu wo Oogodo o Uga’asusan. Reve u kula̱to abaji a mani’i’in ili i ma̱guru mo uyo’o a̱ tyo e ekere a̱ A̱sulazuva. 7 A̱a̱ da̱shi ca otoni a̱ lima̱ a na a̱ ri no oroci e mgbele kucci shi, aza a na aa yuwusan tsushakala ne ele. A̱yi nda u to o’wo ili i na a̱a̱ da̱na̱ a yuwusan kukuci hali a̱ tyo a mantsa me elime.> 8 «Vu damma le, za va Isra’ila ko mocin na suru cayi kucci vu ukula̱tosu ko cu’un kucci ro, 9 agba u ta̱wa̱ na̱ a̱yi o una̱ntsu wo Oogodo o Uga’asusan u ca A̱sulazuva shi, a ta tawa vuma ndolo a̱tsuma̱ a ama a̱ yi. 10 «Za va Isra’ila ko mocin na ri nden ne ele suru na tamai a̱kutsu a mpasa, n ta yuwan tsurala na̱ a̱yi, reve n tawa yi a̱tsuma̱ a ama a̱ yi. 11 Adama a na wuma wi ili i wuma i ta̱ a̱tsuma̱ a mpasa ma̱ yi. N ca ɗu ta̱ a̱yi adama i yuwan a̱ga̱nda̱ a matara mo ume mo unusu adama a aciya̱ɗu a masa’a, adama a na mpasa n ɗa n tsu tara ume wu unusu u vuma. 12 Adama o ndolo a ɗa n dammai aza a Isra’ila: ko za a̱tsuma̱ a̱ ɗu ko mocin na ri na̱ nden na̱ a̱ɗu aa tama mpasa shi. 13 «Za va Isra’ila na suru, ko mocin na ri na̱ nden a̱tsuma̱ a̱ ɗu na vu unai nama o ugenge ko manunu ma na a tsu tama u to oco mpasa ma̱ yi reve u ciɗo yi na̱ ma̱bula̱. 14 Adama a na wuma wi ili i wuma i ta̱ a̱tsuma̱ a mpasa ma̱ yi. Adama o ndolo a ɗa n dammai aza a Isra’ila: she i tama mpasa mi ili i wuma wan, adama a na wuma wi ili i wuma suru i ta̱ a̱tsuma̱ a mpasa ma̱ yi. Za na suru tama niyi a ta tawa yi. 15 «Za na suru tamai a̱kwa̱kwa̱ ko ili i na nama vu una kakarai, ko umatsun u lyuci ko mocin, u ta̱ za̱’wa̱ a̱tugu a̱ yi reve u sumba̱ na̱ mini. Reve u da̱na̱ idaba hali she ulivu, reve wo o’wo cece. 16 Agba na̱ vuma’a wu za̱’wa̱ a̱tugu ko u sumba̱ shi, ume wu unusu u ndolo u ta̱ a aci a̱ yi.»