1 Sama'ila 17

1 A̱soja a Filistiya o foɓo ta̱ adama o uvon, a̱vu o ɓoloto a̱ lyuci va Soko a̱tsuma̱ e iɗa ya Yahuda. A̱ shuwa̱ ta̱ uva̱la̱ta̱ a Efes Damim, e memere mo Soko na̱ Azeka. 2 A̱vu Shawulu na̱ ali o uvon a Isra’ila oɓoloto a̱ va̱la̱ o uka̱ri wa Ela, reve e gere adama a na aa yuwan uvon na̱ a̱soja a aza a Filistiya. 3 Aza a Filistiya a̱ da̱na̱ ta̱ a masasan ma̱ ta̱ ugeru, aza a Isra’ila waru a za ire, nu uka̱ri e memere me ele. 4 A yuwan ta̱ vuma ro na la’a gurai uvon na a̱ tsu ɗe Goliya, diga a̱ lyuci va Gat, wu uta̱ ta̱ o uva̱la̱ta̱ wa aza a Filistiya. Uga’an wa̱ yi u la’a ta̱ ana kucci. 5 U da̱na̱ ta̱ na̱ melezu mo uvon ma̱ rumushili a aaci a̱ yi reve waru wo oto utugu wu uɗavu wu rumushili wu uvon a na ume wa̱ yi u dembe ta̱ ume u kilo kupoton na̱ a̱za̱ cindere. 6 Reve wo oto waru a̱a̱ra̱ga̱ a̱ rumushili a ana a̱ yi a na a tsu pala ana, reve u wo’o mabata ma̱ rumushili o ucina̱ wa̱ yi. 7 Ugba̱mu wi ibata ya̱ yi u ta̱ tsu ushin, waru ume wa aaci a̱ rumu wi ibata’a u rawa ta̱ uritowu kilo cindere wu rumu. Soja da̱na̱ ta̱ elime a̱ yi uguzu na̱ a̱a̱ra̱ga̱ a̱ yi. 8 A̱vu Goliya isawan mishin, reve wo oruwoo ali o uvon o ugeru a Isra’ila, «Nye i ɗa i zuwai i ta̱wa̱i, reve i gere tsa̱ra̱ i yuwan uvon na̱ a̱tsu? A̱mu za va Filistiya ɗa shi, waru a̱ɗu agbashi a Shawulu a ɗa shi? Ɗangulai vuma ta̱ a̱tsuma̱ a̱ ɗu adama u cipa̱ u yuwan nla̱ngi na̱ mu! 9 Nu u gura yuwan nla̱ngi na̱ mu reve wu una mu, tsu to o’wo agbashi a̱ ɗu, agba na̱ n la’a yi ucira reve mu una yi, i to o’wo agbashi a̱ tsu a̱vu i yuwaan tsu tsugbashi.» 10 Reve za va Filistiya’a u damma, «Ana’an n ta yuwusan oɓolo ali o uvon a Isra’ila ulamu! Ɗangulaa numu vuma ta̱ tsu yuwan nla̱ngi.» 11 Ana Shawulu na aza a Isra’ila suru a uwwai ili i na za va Filistiya dammai, reve a kuɗa okolo a uwwa wovon lon. 12 Da̱wuda gba ulobo wa̱ Yese ɗa, vuma va Efarata, diga a̱ lyuci va̱ Batalami a̱tsuma̱ a Yahuda. Yese da̱na̱ ta̱ no olobo kunla̱. Waru a mantsa ma na Shawulu da̱na̱i o tsugono, Yese kutsa ta̱ ɗe, waru u da̱na̱ ta̱ na a’wan lon. 13 Olobo a ta’atsu a kpakpara a̱ Yese, ele ɗa Eliyabu na̱ Abinada na̱ Shama, a̱ shi ta̱ oɓolo ukere na̱ ali o uvon a Shawulu adama a yuwan uvon na aza a Filistiya. 14 Da̱wuda ɗa le mokosoto. Azakpakpara a ta’atsu’u a̱da̱na̱ ta̱ oɓolo na ali o uvon a Shawulu. 15 Amma Da̱wuda ‘ya̱wusa̱ ta̱ nu u ka̱mbi uba̱ta̱ wa Shawulu adama u guɓusa mgbele ma dada va̱ yi a Batalami. 16 A̱vu Goliya za va Filistiya ka̱ra̱ o uta̱ wi isawan o ronuso una̱ wa ali o uvon a Isra’ila usana nu ulivu suru hali rana amunga. 17 Urana u ro reve Yese damma ulobo wa̱ yi Da̱wuda, «Taraa azakpakpara a̱ wu makundatsu kupa ne ejere vi ishina yu uzuwun i nda na akpatali kupa o opopofu, vu jika̱, vu ‘ya̱wa̱a̱ le o uva̱la̱ta̱. 18 Waru vu taraa yali ya̱ a̱soja e le wara vi inan kupa. Vu reve cine a̱za̱ a̱ wu a̱ ri a̱vu vu ta̱wa̱a̱ mu ni ili i ro i na yoo roco cine a̱ ri ɗe.» 19 Azakpakpara a̱ Da̱wuda a̱da̱na̱ ta̱ ɗe oɓolo na̱ Shawulu na ali o uvon a Isra’ila suru o uka̱ri wa Ela a yuwusan uvon na aza a Filistiya. 20 Na̱ wasasa a̱vu Da̱wuda lyawa oɓolo e mgbele ekere a za va aguɓa o ro, reve u tara itana u ka̱ra̱ cine dada va̱ yi Yese damma niyi. U rawa ta̱ o uva̱la̱ta̱’a̱ a mantsa ma na ali o uvon a Isra’ila a̱ ri a̱ mota̱a̱ a̱ ‘ya̱wa̱ e gere, a yisali yu uvon. 21 Aza a Isra’ila na aza a Filistiya e isawan ta̱ ugeru adama o uvon, waru a̱da̱na̱ ta̱ a̱ nka̱la̱la̱i. 22 A̱vu Da̱wuda lyawa itana’a e ekere a soja na aa ka̱lyuwusa̱ itana, reve u suma a̱ tyo uba̱ta̱ u na e gerei adama o uvon tsa̱ra̱ u ca̱sa̱ azakpakpara a̱ yi. 23 A̱yi a̱tsuma̱ a adanshi ne ele, reve Goliya za na la’a gurai uvon va aza a Filistiya’a vuma va Gat, u ka̱ra̱ uta̱ diga o uva̱la̱ta̱ wa aza a Filistiya a̱vu u yuwan adanshi tsu ufaru. Da̱wuda gba a uwusai. 24 Ana ali o uvon a Isra’ila enei Goliya, a̱vu a sumaa yi adama o wovon lon. 25 Aza a Isra’ila a̱ shi ta̱ a dansa va̱ni le, «Ye ene ta̱ cine vuma nda o utusa̱? Suru urana u ta̱ utusa̱ adama u yuwan aza a Isra’ila ulamu. Mogono ma damma ta̱ u ta ca vuma na suru unai vuma nda utsuru wa̱ a̱bunda̱. Waru u ta ca yi usheli wa̱ yi lolo, waru u’wa wa dada va̱ yi wa tsupa utafa a̱tsuma̱ a Isra’ila shi.» 26 Ɗaɗa Da̱wuda ecei ali o uvon a na a̱ da̱na̱i mishin zuzu na̱ a̱yi, «Nye i ɗa aa yuwaan vuma na unai vuma va Filistiya nda, nu u tawa wono u nda uba̱ta̱ wa aza a Isra’ila? Zane ɗa za babu upaɗu wu uryumbu va Filistiya nda, na waa yuwusaan ali o uvon A̱sula̱ a wuma ulamu?» 27 Reve a̱ ka̱mbuwa̱ yi ili i na a̱ ri a dansa va̱ni le, a damma yi, «Ne ɗa aa yuwaan vuma na una niyi.» 28 Ana Eliyabu zakpara nan Da̱wuda suru suru uwwa niyi a adanshi na ama’a, reve u yuwan upan na̱ a̱yi lon, a̱vu we ece, «Adama a̱ nye vu ta̱wa̱i pa? Waru zane vu lyawayi mgbele n wa’a i ndolo a̱tsumona? N reve ta̱ cine vu ri nu uvaɗu na akpaka, vu ta̱wa̱ ta̱ adama vu ka̱lyuwa̱ uvon.» 29 A̱vu Da̱wuda damma, «To, nye n yuwain? Yeci ɗa goon ma yuwusan!» 30 Ɗaɗa u lyawa niyi reve u vadala ya nanza, a̱vu u yuwisan yi cu’un yeci’i, a̱vu u usu yi tsu ufaru. Suru ali o uvo’on za na we ecei biti, a̱vu usu yi tsu ufaru. 31 Ali o uvon o ro a uwwa ta̱ ili i na Da̱wuda dammai, reve a damma Shawulu, a̱vu u zuwa e ɗe yi. 32 A̱vu Da̱wuda damma Shawulu, «She nanza dada’wan adama a vuma va Filistiya nda wan. Aagbashi a̱ wu a̱ ta̱ ‘ya̱wa̱ u yuwan nla̱ngi na̱ a̱yi.» 33 Reve Shawulu usu Da̱wuda, «Vaa gura yuwan uvon na̱ za va Filistiya nda hali vu lyuwa aciya̱yi shi! A̱vu ulobo u ɗa vu buwai. Agba Goliya gura ta̱ uvon a̱yi o ulobo.» 34 Amma Da̱wuda damma ta̱ Shawulu, «N ta guɓusaa dada va̱ mgbele. A mantsa ma na kamu ko a̱ba̱jini a nama vu una na a̱ tsu ɗe biya remei kyon diga o oɓolo, 35 n tsu saɓa yi ta̱ n faba yi, reve n wawa kyon va̱ diga o una̱ wa̱ yi. Waru nna̱ kamu’u ko biya’a u piri, n tsu gbagbala ta̱ eleme a̱ yinlu yi, reve n faba yi e iɗa mu una yi. 36 Aagbashi a̱ wu o una ta̱ ikamu na̱ nan biya. Vuma babu upaɗu wu uryumbu nda fo u ta̱ o’wo tsa za ta̱ le, adama a na u yuwaan ta̱ ali o uvon A̱sula̱ a wuma ulamu. 37 A̱sulazuva a na wawa numu diga a̱ a̱kpa̱ta̱ e ikamu na̱ nan biya, a̱yi ɗa waru waa wawa mu e ekere a vuma va Filistiya nda.» A̱vu Shawulu damma Da̱wuda, «Wala, lyawa A̱sulazuva a̱ da̱na̱ oɓolo na̱ a̱vu.» 38 Reve Shawulu oto yi itana yu uvon ya̱ yi. A̱vu wo oto yi melezu mo uvon ma̱ rumushili a aaci, reve wo oto yi utugu wu uɗavu wu rumushili. 39 A̱vu Da̱wuda nla̱ matsun me pe’eni o utugu’u, a̱vu u rito dasu adama a na koto u yuwan ulinga ne ele shi. A̱vu u damma Shawulu, «Maa gura dasu na̱ nda shi, adama a na koto n yuwan ulinga ne ele shi.» Reve wu foɗo itana yu uvo’on. 40 A̱vu u tara aaɗanga a aguɓa a̱ yi, reve wu ta̱ɗa̱ mugbodolu ma atali n ton a̱tsuma̱ o moɗolu, a̱vu u zuwa le a̱ tsa̱n va aguɓa va̱ yi oɓolo na̱ a̱bitsutsu a̱ yi ufoɓu o ukere, reve u ka̱ra̱ o uta̱ u ga’an na̱ Goliya. 41 A mantsa’a fo za va Filistiya’a u zurusa̱ ta̱ Da̱wuda. Vuma na ri uguzu na̱ a̱a̱ra̱ga̱ a̱ yi u da̱na̱ ta̱ elime a̱ yi. 42 Ana za va Filistiya ndolo petelyuwei Da̱wuda ulobonu, reve we ene ulobo u ɗa nu uruma u sa’ani, na̱ gbaga lipu, reve u goro yi. 43 A̱vu Goliya ece yi, «Vu ta a majiyan a̱mu musa̱n ma ɗa? A̱yi ɗa i zuwai vu ta̱wa̱i ya̱’a̱ va̱ na aaɗanga?» Reve wi isululai Da̱wuda na aala a̱ musula̱ ma a aza a Filistiya. 44 Ɗaɗa za va Filistiya’a wa saala Da̱wuda, «Ta̱wa̱ pa nda, n ta ca asala ni inama yu una inama ya̱ wu!» 45 A̱vu Da̱wuda damma yi, «Vu ta̱wa̱ ta̱ tsa̱ra̱ vu yuwan nla̱ngi na̱ a̱mu na̱ matsun me pe’eni oɓolo ni ibata na̱ mabata. A̱mu gba shi, n ta̱wa̱ ta̱ n yuwan nla̱ngi na̱ a̱vu a̱tsuma̱ a ala a̱ A̱sulazuva o oɓolo a̱ a̱soja a zuva. A̱yi ɗa A̱sula̱ a̱ a̱soja a Isra’ila, za na vu yuwan yi ulamu. 46 Ana’an A̱sulazuva a ta ca mu a̱vu e ekere a̱ va̱. N ta o una wu, waru n to koɗo aaci a̱ wu. Ana’an n ta ca asala ni inama yu una a̱kwa̱kwa̱ ali o uvon a Filistiya, reve uvaɗi ma̱ɓula̱ u reve a na A̱sula̱ a̱ ta̱ a̱tsuma̱ a Isra’ila na amayun! 47 Aza a na a̱ ri uɓolotowu pa suru e te reve a na na̱ matsun me pe’eni ma ɗa ko ni ibata i ɗa A̱sulazuva a tsu wawa shi, adama a na uvon za va̱ A̱sulazuva a ɗa, waru u ta ca suru nɗu e ekere a̱ tsu.» 48 Ana Goliya da̱shi zura̱ niyi zuzu, a̱vu Da̱wuda zarana a rawa uba̱ta̱ u na a̱soja a Filistiya a̱ ri yu ugeru adama u ga’asan na̱ yi. 49 A̱vu Da̱wuda tara aatali a̱ ta̱ a̱tsuma̱ a̱ tsa̱n va̱ yi, reve u zuwa yi a̱ a̱bitsutsu a̱ yi a̱vu u vuta̱la̱ yi. Reve aatali’i a vara Goliya a̱ cin, reve u ka̱ra̱ a uwa pe a̱ cin va̱ yi, a̱vu u riya̱ ma̱kpa̱ɓa̱. 50 Ne ɗa Da̱wuda lyuwai aci a za va Filistiya na̱ a̱bitsutsu na aatali a̱ ta̱, a na u vara niyi u riya̱i. Waru u da̱na̱ na̱ matsun me pe’eni o ukere wa̱ yi shi. 51 A̱vu Da̱wuda suma u rawa uba̱ta̱ wa̱ yi. Reve u tala matsun me pe’eni ma Goliya a̱tsuma̱ e ibici ya̱ yi, reve wu unai u koɗo aaci a̱ yi na̱ matsun me pe’eni’i. Ana aza a Filistiya e enei za vu uvon vu ucira le kuwa̱ ta̱, reve a vadala a suma. 52 Reve ali o uvon a Isra’ila na aza a Yahuda a̱ ‘yon na̱ yorori reve a gbagba aza a Filistiya a̱ tyo o una̱ntsu wa Gat nu una̱ntsu wa Ekuron. Aza a Filistiya a na amatoyin na̱ a̱kwa̱kwa̱ e le ocusho ta̱ o ure diga Sha’arayim hali a̱ tyo Gat na̱ Ekuron. 53 Ana ali o uvon a Isra’ila a̱ ka̱mba̱i diga uba̱ta̱ u magbagba ma aza a Filistiya, a̱vu a̱ pura̱ uva̱la̱ta̱ u le. 54 Reve Da̱wuda tara aaci a Goliya a̱vu u tyewoto yi Urishelima, a̱vu u zuwa itana yu uvon ya Goliya o oogodo a̱ yi. 55 A mantsa ma na Shawulu enei Da̱wuda a̱ ‘ya̱wa̱ uba̱ta̱ wa Goliya, reve we ece Abna, yali ya a̱soja, «Abna, ulobo wa̱ zane u ɗa ulobo u nda’a?» A̱vu Abna damma, «N kucina ta̱ na̱ a̱vu, mogono, n reve shi.» 56 Reve mogono ma damma, «E ece ko ulobo wa̱ zane ɗa ulobo u nda’a.» 57 Ana Da̱wuda ka̱mba̱i diga uba̱ta̱ u mona ma Goliya, a̱vu Abna tara yi, reve u tyewoto yi a̱ ma̱ka̱ka̱n ma Shawulu a̱yi uguzu na aaci a Goliya o ukere wa̱ yi. 58 Reve Shawulu ece yi, «A̱vu ulobo wa̱ zane ɗa, ulobo?» A̱vu Da̱wuda damma, «A̱mu ulobo wa aagbashi a̱ wu Yese va Batalami ɗa.»