1 Sama'ila 11

1 Ana a jimanuyi, reve Nahash mogono ma aza a Amon ma̱ ka̱nda̱ruwa̱ lyuci va Jabe Giliyadu adama uriya̱ yi nu uvon. A̱vu suru ali a Jabe a damma yi, «Yuwan nzuwulai na̱ a̱tsu, tsu ta yuwaan wu a̱ga̱nda̱.» 2 Amma Nahash va Amon usu le ta̱, «N ta yuwan nzuwulai na̱ a̱ɗu adama e ili i ta̱, a̱yi ɗa n kongoro esu o usa’ani a̱ ɗu suru adama yo o’wo ili yi izo’oshi uba̱ta̱ wa aza a Isra’ila suru.» 3 A̱vu mbara ma Jabe n damma yi, «Ca tsu rana cindere tsa̱ra̱ tsu lyungu nlingata a̱ tyo upasu wa aza a Isra’ila suru. Na̱ babu za na aa wawa tsu, reve tsu caa aciya̱tsu ya̱’a̱ wu.» 4 Ana nlingata’a n rawai Gibiya lyuci na Shawulu ri, a̱vu a cuɗuwa ama adanshi a nda. Reve ama’a suru a shon na̱ yisali lon. 5 A mantsa’a a gba wuntsa ta̱ Shawulu a̱ ka̱mba̱ diga o uɗuma̱ ni inan yi iluma ya̱ yi elime. A̱vu we ece, «Nye i ɗa i tsura̱i ama a na a̱ ri e mesun?» A̱vu a̱ ka̱mbuwa̱ yi ili i na ama a Jabe a dammai. 6 Ana Shawulu uwwai adanshi e le, a̱vu Ruhu va̱ A̱sula̱ cipa̱a̱ yi nu ucira, a̱vu wu uwwa upan lon. 7 A̱vu wu paɗa inan i re apaɗi apaɗi, ɗaɗa u cayi nlingata a̱ ‘ya̱wa̱ ne ele uba̱ta̱ suru a̱tsuma̱ a Isra’ila, a dansa, «Suru za na uta̱i u kuruyi Shawulu na̱ Sama’ila shi, ne ɗa a yuwan ni inan ya̱ yi.» Ɗaɗa wovon wa̱ A̱sulazuva u remei ama a Isra’ila lon. Reve ali o uta̱ nu uta̱. 8 Ana Shawulu ɓoloto nle ɗe Beze, ama ukpakukupa ukpakuta’atsu (300,000) diga Isra’ila, ama ukpakukupa mata’atsu (30,000) waru diga Yahuda. 9 Reve a damma nlingata n na n ta̱wa̱i’i, «Dammayi ama a Jabe Giliyadu, <Kafu urana u suɗuwa nfa’an, i ta̱ tsura̱ iwawi.> » Ana nlingata’a n ‘ya̱wa̱i nu udammu uba̱ta̱ wa ama a Jabe a̱vu a yuwan ma̱za̱nga̱. 10 A̱vu a damma aza a Amon, «Nfa’an tsu ta ca aciya̱tsu e ekere a̱ ɗu, reve i yuwan na̱ a̱tsu ili i na ye enei u lobono nɗu.» 11 Na ayin o ndolo reve Shawulu ne’eshen ama a̱ yi oɓolo a ta’atsu. A̱vu a̱ ‘ya̱wa̱ va̱la̱ta̱ va aza a Amon nu uvon diga ili ya ayin a̱ tyo wasasa. Reve a uwa mona me le hali urana u rawa a aci. A̱vu e bete’we aza a na a la’ai, babu aza a na e gerei ama e re re. 12 A̱vu ama a Isra’ila a damma Sama’ila, «A̱ te ɗa aza a na a dammai, <Cine aa yuwan Shawulu yuwan tsugono tsa̱ tsu?> Ta̱wa̱a̱ ntsu na ama’a tsu una le.» 13 Amma Shawulu damma ta̱, «Babu ko vuma ta̱ na o una ana’an. Adama a na urana wa ana’an u ɗa A̱sulazuva a yuwayin aza Isra’ila iwawi.» 14 A̱vu Sama’ila damma ama’a, «Ta̱wa̱i tsu ‘ya̱wa̱i Gilga adama tsu da̱shi usu Shawulu mogono ma̱ tsu ɗe.» 15 Ɗaɗa ama’a suru a̱ ‘ya̱wa̱i ɗe Gilga a̱vu a kucinato Shawulu mogono a̱ ma̱ka̱ka̱n ma̱ A̱sulazuva. Ɗe ɗa a cayi kucci muwwulai a̱ ma̱ka̱ka̱n ma̱ A̱sulazuva. Reve Shawulu na ama a Isra’ila suru a yuwan ma̱za̱nga̱ ma̱ a̱bunda̱.