Guyeiti 57

1 Guyei loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Mina koloɠolo!» Davide ná-guyei. Siɛgi zu é ʋelani la, Sayile ɗa kpɛ, é li é lɔɔɠu pugi zu. 2 Màawɔinɠa, ee, GALA, màawɔinɠa! Mazɔlɔɔ zɛ̀nvui ɠa lɔɔɠuzu è ʋoluʋɛ, è-ɠoʋegiti ma niinigi ɠa gè lɔɔɠuzu bu, eyɛsu maanɔɠɔiti ti leʋe. 3 Nà wooɠulazu GALA ma, nii é Anii-Pɛ-Unda, GALA nii é fai pɛ kɛɛzu bɛ̀, eyɛsu gaaɓela ga pagɔ. 4 Toɠa ná-kizogi leʋe mà, é zeɠe geeɠɔlɔgi zu! É zelii lo naati ma, niiti ti kpɔ̀lɔzu. Lo! GALA ka ná-wooɠɛɠiladai ta ná-gaamai leʋe mà. 5 Nà zalaiti saama, nà laani nu mii nuiti kakala, ti-ɲiigaiti ta ga kpɛɛin ta mɛɛinti, ti-nɛgi ɠaaliʋɛ eɠɛ boɠa zɔkpɔi. 6 Ee, GALA, è wɔɔlɔ ʋelei lɛ geeɠɔlɔgi maazuʋɛ! Ɗa-lɛbiyai volo eteai zu ná pɛ! 7 Ti tumɔi laani nà-pelei zu, ti pɛ̀lɛʋɛlɛni, ti zeɠei wɔ tùɠɔ, kɛlɛ tiya ɓɔɠɔi nɔ ɠa ti loai zeɠei naa zu. Lo! 8 Ladalai ɠa zìimaʋɛ, ee, GALA! Nà guyei loo, gè è maamusɛ. 9 Wuzeɠe, zìi, wuzeɠe! À wuzeɠe, nà-kɔnigi ta nà-papai! Nà geelaalaosuʋɛ maaloɠa! 10 Nà è maamusɛ ziiti pɛ saama, ee, Màliɠii! Nà guyei loo è ʋɛ zii ɠiligiti saama. 11 Mazɔlɔɔ ɗa-nuɓɔɠɔlai wɔɔlɔʋɛ geeɠɔlɔgi ʋa, ɗa-wooɠɛɠiladai ɓudɛʋɛ tonaɓiingiti maazu. 12 Ee, GALA, è wɔɔlɔ ʋelei lɛ geeɠɔlɔgi maazuʋɛ! Ɗa-lɛbiyai volo eteai zu ná pɛ!