Guyeiti 41

1 Guye loo ɠundiɠii nɔnɔi ʋe. Davide ná-guyei. 2 Undaanɛ nu ɠa ga naama nui, nii é daazu ma ga bala nui ná-fai! Maanɔɠɔ voloi, Ɠɔoɠɔ GALAGI unmɔɔ tɔ ɓalaa. 3 Ɠɔoɠɔ GALAGI ɠa makɛ, é zɛnvui wo, undaa ɠa nɛ ná-zooi zu, é la dɔa sili nuiti ziimai zu. 4 Ɠɔoɠɔ GALAGI ɠa yeeyɛ ba, a ɠɛna laani betei zu taɓai ba. Toɠa pilɛ kɔɠɔiti ga, siɛgi zu é zeeɓɛzu la. 5 Gè ɠɛni ma: «Ee, Ɠɔoɠɔ GALAGI, màawɔinɠa! Kɛdɛyai ve bɛ̀, gè kotoi ɠɛa è laalɔɠɔma!» 6 Wɔ̀inzeɠe nuiti ta ɓɔɛzu dàalɔɠɔma ga ɲɔuɗa, ti ɗa ɠɛ ma: «Siɛgi ɓɛgele zu ɠa é zaazu la? Daaseigi ɠa za siɛgi ɓɛgele zu?» 7 Ni nui ta a ʋaana é wɛlɛ bà, toɠa kpɔɛ wafuungiti bosu, zii ɠa telebotala vaiti gaalɛɛzu ba, é ɠula, é li, é ɓɔɛ eteaʋɛ. 8 Niiti kpein ti wɔ̀inzeɠezu, ta ɓɔɛzu laa wu ɓɔɠɔ zaama ga ze, ti ɗa ɠisiɛ maanɔɠɔ vaiti su dàalɔɠɔma. 9 «Niima zeeɓɛi é sogai, faa ɲɔu wola ɠa! É laa betei ɠa, é la mɔ wuzeɠea eyɛsu pɛ!» 10 Anɛɛ bɔ̀ɔla ʋagɔi nii gè laani da, gi ɗa nà-daamianigi mi gá tɔ, naa wuzeɠea dàalɔɠɔma. 11 Kɛlɛ ɗɔun ɗa, ee, Ɠɔoɠɔ GALAGI, màawɔinɠa, è ʋa è bùzeɠe, nà naa ve ti ya, nii maanɛai ti sɔlɔɔ. 12 Wɛlɛ, nii gè kwɛɛgai la ga è wɔinʋɛ ga ze, toɠa ga sìli nui la zobo sɔlɔɔsu mà. 13 Ɗa makɛsu mà nà-sɔbalalai zu, ɗa màkɛ è ɠakalaʋɛ eyɛsu ɠɔ. 14 Mamagi ɠa Ɠɔoɠɔ GALAGI ʋɛ, Izilayɛle ná-GALAGI, ɠɔoɠɔ! Amina! Amina!