Guyeiti 24

1 Davide ná-guyei. Zooi ta gaa ɠaniiti ta ga Ɠɔoɠɔ GALAGI nɔnɔ, eteai ta nii kpein é zeini su! 2 Mazɔlɔɔ tɔ ɠa é zooi zeiɗa kpoloɗɛiti gaaʋɛ, é suvie ziɛ wolaiti maazu. 3 Ɓɛ ɠa a zoo é lɛ Ɠɔoɠɔ GALAGI ná-gizei ma? Ɓɛ ɠa a zoo é wuzeɠe, eyɛsu é lo ná-ada ɲadegai? 4 Nii zeeiti ti la ɠɔzɔni, ziimaʋɛ ɠoleai, nii é la ɓɔɠɔ lɔɔzu faa ɲakaiti su, é la ɠonazu ga é ʋa nu yaava. 5 Toɠa Ɠɔoɠɔ GALAGI ná-tuyai zɔlɔɔ, ná-kizo GALAGI ɠa deve ga telebo nu. 6 Pele ɠana niiti ti gaiziɛzu, naati ta-nuɓusɛiti ti la, ti ɠilizu Zakɔɓe ná-GALAGI ʋa. Lo! 7 Kpogiti, à wa-ɓofalagiti buzeɠe, à ti wuzeɠe, ɠɔoɠɔ siɠidaʋɛti, naa ɠa a kɛ, lɛbiya Masagi lɛ ná! 8 Ɓɛ ɠa é ga lɛbiya Masagi? Ɠɔoɠɔ GALAGI ʋe, sulogai, kɔɔɠuluɓai, Ɠɔoɠɔ GALAGI, kɔɔɠuluɓai. 9 Kpogiti, à wa-ɓofalagiti buzeɠe, à ti wuzeɠe, ɠɔoɠɔ siɠidaʋɛti, naa ɠa a kɛ, lɛbiya Masagi lɛ ná! 10 Ɓɛ ɠa é ga lɛbiya Masagi? Ɠɔoɠɔ GALAGI ʋe, Fai-Pɛ-Maliɠii, tɔ ɠa é ga lɛbiya Masagi! Lo!