Guyeiti 17

1 Davide ná-GALA falii. Ɠɔoɠɔ GALAGI, woilo màavai ma, nii sɔlegai. Woilo nà-kpee wooiti ma. Woiyeɠei laalao nà-maanɛɛnɛ wooi luɠɔ, nii gè kɛɛzu ga dakɔlɔgi, nii yaava la ba. 2 È nà-telebodai ɠula kɛlɛma, è-ɠaazuʋɛti ti telebodai wuuzumɔ. 3 Zìi zumɔ, è wɛlɛ mà kpidii, ɗa pòluɠula, è la faa nɔpɛ kaa. Gè deveʋɛ ga gè mina koto ɠɛ kpɔɛzuɠulai zu. 4 Nuɓusɛiti ti ɠɛ ʋa faa nɔpɛ kɛɛzu, nà ɓɔɠɔ zosu ga è-laawooiti, gè mina ziɛ ga faa ɲɔu ɠɛ nuiti ta-ʋeleiti. 5 Gè ziɛni ɗa-ʋeleiti su, kɔ̀ɠɔiti ti la ɲiikpini. 6 Ee, GALA, nà wooɠulazu è ma, mazɔlɔɔ ɗa gòoɠaaʋote! Woii lati dɛɛ mà, è woilo gòoi ma! 7 Ɗa-wooɠɛɠiladai ɠula kɛlɛma bɛ̀, ɗɛi è naati kizosu toosu nuiti ma, niiti ti lɔɔɠuzu ɠaiziɛzu è ɠobaʋɛ. 8 Makɛ mà ga nu ɠaazuleegi ɠɛʋele, dɔ̀ɔɠu è-ɠoʋegiti ma niinigi wu, 9 màaɠooza sìli nuiti ba, ti wɔ̀inzeɠezu, màaɠooza faa ɲɔu ɠɛ nuiti ba, ti latisu mà. 10 Maawɔinɠa la ti-yiimaʋɛ, ti-laaʋɛ ɗa waso kpɔɛi wo, 11 ta kɔ̀ɠɔʋo ba, ti ɠoolia mà, ta ɠaazulosu bà, ti ʋa gàavala zooi ma, 12 eɠɛ zalai nii pului ma, é anii zosu é bali ga, eɠɛ zala yiʋoi nii dɔɔɠuai makɛsuʋɛ. 13 Ɠɔoɠɔ GALAGI wuzeɠe, è li è ti laaɠomi, è ti ɠaavala! Kìzo, è kùla faa ɲɔu ɠɛ nuiti zea, ga ɗa-woɠa zɔkpɔi. 14 Ɗɔun kìzo niima nuiti ma, è-zɛbɛi ʋɔ, ee, Ɠɔoɠɔ GALAGI! Kùla etea nuɓusɛiti zea. Ta-ɠulanumai ɠwɛɛ ge ɠɛ ga eteai zu nɔ! Ungo, ti yiɠo, tiya-o, ti-lointi-yo, ga naa, nii è makɛsu ti ʋɛ. Ti yiɠo la, ti mɔtai yɛ, ti-mavofodai ya! 15 Nɔ̀un nà, nà-telebodai ʋɔ, nà è-ɠaazuʋɛ ɠa, nà wuzeɠena feya, è-maaniinigi ɠa zìɠo!