Guyeiti 142

1 Davide ná-kidafaawui. GALA falii é boni, siɛgi zu é ɠɛni pugi zu la. 2 Nà wooɠulazu Ɠɔoɠɔ GALAGI ma ga kpee wooi, kpee wooi ɠa gè Ɠɔoɠɔ GALAGI maanɛɛnɛzu la. 3 Nà kpàla vai lɛɛzu la, gè nà-kidaaʋili fai lɛɛ la. 4 Nà ʋalana zɛbɛi ma, ɗa ɠa è kwɛɛ ʋɛ gè liizu ná. Ti balii laa nà-pelei zu ga kɛɛɠɛɛi. 5 Wɛlɛ ga zèezazu ʋelei: Nu nɔpɛ ge la mɔ ná, nii é kwɛ̀ɛ. Gè la kwɛɛ ʋɛ nà lɔɔɠu ná, nu nɔpɛ ge la yiizoolɛzu ga zɛ̀nvui ma vaa. 6 Ɠɔoɠɔ GALAGI, ɗa ɠa gè kpee loozu è woizu, Gè ɠɛ ma: «Ɗa ɠa è ga dɔ̀ɔɠuzuʋɛ, ɗa ga zìima anii, fizɔgai bɛ̀, eteai nii zu ʋɛ gi zɛnvui wosu ná.» 7 Woilo nà-kpee wooi ma, mazɔlɔɔ fikɛ nɔpɛ ge la mɔ sù. Ùnmɔɔ, è kùla naati zea, niiti ti wɔ̀inzeɠezu. Ti zuɓaaʋɛ, ta-zobogi wɔɔlɔ nɔ̀nɔi ʋa. 8 Fìe, è kùla kasoi ɠa, nii a kɛ gè è-laaseigi maamusɛ. Telebo nuiti ta ʋa, ti màaɠooli, siɛgi zu è faanɛɛi naa ɠɛɛzu la bɛ̀.