Guyeiti 111

1 À Ɠɔoɠɔ GALAGI maamusɛ! Nà Ɠɔoɠɔ GALAGI lɛbi ga zìimaʋɛ pɛ, maaɓɔgi zu, telebo nuiti ta-ɠaalɛbai zu. 2 Ɠɔoɠɔ GALAGI ná-kɛɛwotiiti bɔɔlɔʋɛ gola, niiti kpein ti wɔinɗai la, naati ta ɗa ɠida ti wu gola. 3 Ná-kɛɛwotiiti ta ná-lɛbiyai ta ná-maanɛɛi ɠulazu kɛlɛma. Ná-telebodai ɠa yɛsu ná ɠɔ. 4 Toɠa pɔ ga nu ɠizɛ ná-faa maayikiaiti su. Ɠɔoɠɔ GALAGI nuɓɔɠɔʋɛ, é ɠɛ ga maawɔinɠaa ƓALAGI. 5 Niiti ti luazu ba, toɠa ɗa naati maavaiti kpein kɛ. Toɠa ɗa ɠizɛ ná-minazeɠegi zu yeenɔpɛ. 6 É ná-zobogi lɛɛni ga ná-nuɓusɛiti ga kɛɛ vaiti maaʋele, siɛgi zu é zii ɠiligiti ta-yooi veeni la ti ʋɛ. 7 Nii kpein é kɛɛzu, naa ɠa é ga gaamai ta sɔlegi. Nu maanɛɛʋɛ, è la ná-deveiti kpein da. 8 É ti zei ʋele ɓɛtɛʋɛ eyɛsu ɠɔ, kɛai gaamai ta sɔlegi maazu. 9 É unmɔɔ fai leʋeni ná-nuɓusɛiti ma, é minazeɠegi wo ti ʋɛ, nii é ga ɠɔoɠɔ kelei. GALAGI ʋe, nii ɲadegai, maayiki. 10 Ɠɔoɠɔ GALAGI ɠaazuluabai ɠa é ga ɠimalai lɔɔzeizuʋɛ, niiti kpein ti ziɛzu ga naa, naati ka ɠi pagɔi ti ma. Ná-maamusɛi ɠa yɛsu ná ɠɔ.