Guyeiti 101

1 Davide ná-guyei. Nà wooɠɛɠiladai ta telebodai ma wuyei loozu, nà naa ɠɛɛzu è lɛbi vai ma ga guyei, ee, Ɠɔoɠɔ GALAGI! 2 Nà ʋilɛ sɔle nuiti ta-ʋelei ma. Yeelɛ ɠa è ʋaazu la pɔ̀ bɛ? Nà ziɛ ga zii ʋagɔlai nà-pɛlɛi wu. 3 Gè la ʋɔɔpɛa faa ɲɔu ɠɛɛ vaa nɔpɛ ba. Kidaaleʋelala luʋai maayo ge la nɔ̀un bɛ, gè la yeezeiɗa naa tanɔpɛ bu. 4 Yaava ɠisiɛi maaɠooza nɔ̀un ba, gè la faa ɲɔu ɠwɛɛga. 5 Nui é vaazu seiɲɔɠɔi ma dɔɔɠuzu, nà daaɠulu, nui nii gaazulɛai, ziimaʋɛ laavegai ga wasogi, gè la yeezeiɗa naa wu. 6 Nà ɠaazulo sɔle nuiti ba, ti zooi zu, gè ti zei ɠoba. Niiti ti ziɛzu ga sɔle nuiti kɛʋele, naati ta ɠɛ nà-botii zu. 7 Yaava nu la zeizu zɔlɔɔga nà-pɛlɛi wu, zɔi é ga zɛɛ wo nui, naa la losu zɔlɔɔga gàazu. 8 Sobu-o-sobu, nà faa ɲɔu ɠɛ nuiti daaɠulu ti zooi zu, naa ɠa a kɛ, gè ti ɓeteʋe Ɠɔoɠɔ GALAGI ná-taai ʋa, tɛiti kpein ti telebotala vai ɠɛɛzu.