Tɛnɛ Faalaaliiti 20

1 Dɔɔi ɠa ga ɲɛɛɠulasu anii, kpɔɔle anii é nu ɠaazulatisu, toɠa ga zɔɔlɛma anii, nu-o-nu é ɓɔɠɔ loozu ya su, naa la zooga é ʋa ɠɛ ga ɠima nu. 2 Masagi a yiiɠaawanana, maa ɠa ɗa yiki eɠɛ zalai zikɔ wooi, ɗɛi ɗa masagi ná-ziiɠaawanai ɠaazulɛɛna, è-yɛnvui ɠa faaɓaagi laawu. 3 Nu maaɠooza sakpegi ʋa, naa ɠa ga lɛbiya vaa. Kɛni ɠimalala nui ɠa a ɗa woizuɓɔlɔ, é lɔ su. 4 Dɔɔʋɛ nui la ɠɛ kɛɛni, é ʋa wozai woli ma yeeɠɛɠalai, ani la ɠɛa ná, nii a teʋe molo leʋei zu. 5 Kisiɛiti ti nuɓusɛi yiimaʋɛ, ta ga ziɛi buuzeiɗai, keleɠele nui ɠa soogai ta zaɠazu. 6 Nu mɔinmɔin ka ɗa ná-wooɠɛɠiladai zulɛ, kɛlɛ mini ɠa sɔɓelama nui a ɠa ná? 7 Telebo nui ɠa ziɛzu ná-sɔledai zu, undaanɛ vaa wola ɠa naa, ná-dointi bɛ, a zeɠena naa. 8 Siɛgi zu masagi zeizu la tukpɔɠaaleʋezuʋɛ, toɠa ɗa faa ɲɔi yɔɠɔzuɠa, ga wɛlɛ laa ɠilagi nɔ. 9 Ɓɛ ɠa a zoo é ɠɛ ma: «Zìimaʋɛ ɠoleʋɛ na, gè ɲadega koto la mɔ bà»? 10 Nu kiloi ta kɔɠɔ ganii ma zii felegɔiti seɠe, é ʋa nuiti yaava, naa ɠa ga Ɠɔoɠɔ GALAGI maaɲɛɛi ba vaa. 11 Zunu loungoi ɠa ɗa ɓɔɠɔ ɠɛʋele lɛ ga ná-kɛɛwotiiti, nu ka ni sɔgi ɠa ʋa, é zɔle. 12 Nu woiyeɠei é faa mɛnisu, nu ɠaazuʋɛ é wozaɠaazu, Ɠɔoɠɔ GALAGI ɠa é ti ɠilagilagi pɛ kpɛtɛa. 13 Mina ɲiimɛnii wola nɛɛ ʋɛ, è mina gaaɓela baladai zu. Wuzeɠe ga sobuzobui, ɗa daamiani sɔlɔɔ, è ɓɔlɔ ba. 14 Ani ɠeya nui ɠa ɗa ɠɛ ma: «É la ʋani! É la ʋani!» Kɛlɛ a zeɠena ná, é ɓɔɠɔ maamusɛ ga anii naa zɔlɔɔ fai. 15 Zanugi ma vaa la ɓaani, kɔbu ani ʋagɔi mɔinʋɛ, kɛlɛ anii nii fizɔgai ti pɛ ba, naa ɠa é ga, nu laawooi é faaɠwɛgi veezu. 16 Ni nui ta a ɓɔɠɔ ɠɛna ga zeelaga è ʋɔ bɛ, é ʋilɛ nui ta ná-kuye vaa ʋa, nii è la kwɛɛ, ná-seɠei zeɠe ga kpɔunmai, nui naa ná-faa zu, nii è la kwɛɛ. 17 Daamianigi unmaai, mɔunpa toɠa ɗa nɛɛ, kɛlɛ naa ʋolu, toɠa ɗa ɠɛ ga kɔtui, é nui laaʋɛ laave. 18 Faiti ti ɠazaʋisu, ti laa ɠa ɗa zeeli ga tɛnɛ pagɔiti maaʋele. Ɗa ɠɛna lia kɔɔmaʋɛ, gaalugi wo, è faiti kpɛtɛ. 19 Zɔi é fama ɓɔɛi vazasu, naa ɠa dɔɔɠuzu vaiti kulazu. À mina ɓɔ faa ma, wa nuiti ti kpɔɛzuɠula ɲakaiti bosu. 20 Zɔi a kɛɛɠɛ voovo ta dee, zii ɠa loo, eɠɛ lanboi é zaazu kpidi ɓɔii zu. 21 Poganii sɔlɔɔgai ga gaazuvilɛi mɔunpagi zu, tuya la ɠɛa ma naa ʋolu. 22 Mina ɠɛ ma: «Nà nɔ̀nɔ ʋotokula!» Ɠito Ɠɔoɠɔ GALAGI ʋa, toɠa è ɠizo. 23 Ɠɔoɠɔ GALAGI maaɲɛɛ ɠa ga kɔɠɔ ganii daa la zeelini, é la vaa zɛɛ ɠiloi wu. 24 Ɠɔoɠɔ GALAGI ɠa é losu nui luɠɔ ná-eteai zu. Nuɓusɛi ɠa zoo ɠale é pelei ɠwɛɛ, nii é ziɛzu la? 25 Polu la ʋani nui ma, è ʋa ani ve Ɠɔoɠɔ GALAGI ʋɛ ga gaazuvilɛi, ɓaa è minazeɠe pɛ, è ʋa leɠa ɠigaiziɛ su. 26 Ɠima masagi ɠa ɗa faa ɲɔu ɠɛ nuiti so, é faa la ti ma, maawɔinɠa la su. 27 Nui ná-faaɠaaɠaa ɠigi ɠa ga lanboi, nii Ɠɔoɠɔ GALAGI feai, tɔ ɠa é nui yiimaʋɛ vaiti pɛ fɛɠɛlɛfɛɠɛlɛsu. 28 Nuɓɔɠɔlai ta wooɠɛɠiladai ɠa a ɗa masagi makɛ, ná-nuɓɔɠɔlai ɠa é ná-masa kpɔkpɔgi zei ʋele ɓɛtɛzu la. 29 Zɛbɛi ɠa é ga buzeɠe niinɛgiti ta-ʋadai, kɛwola wɔlɔiti ta-unfemai ɠa é ga undeɠa ɠolegi. 30 Maawana ʋalai ɠa ga faa ɲɔi ɠɛdɛ salei, zekana é la, doɠai ɠa ɗa zeeli kisiɛiti ma, niiti ti lɔɔɠuai.