Filemɔn 1

1 Nɛ̀i gè ga Pɔle, nà ga kasoɠa nu, botii maaʋele ma gè kɛa Yesu Kilista ʋɛ, gá ade-ɠɛɛloin Timɔte, gá è luʋɔsu, Filemɔn, gi-nɛɛɲɔɠɔi, adɛi de botii ɠɛɛzu ʋɔɔma, 2 wa Apia ade-ʋaazeelai, ta Aalisipe, ada nii de kɔɔi ɠɔɔzu ʋɔɔma, ta Egilisii é gaalɛbai wosu ɗa-ʋɛlɛi wu. 3 Ade-Ɠɛɛ GALA ta de-Maliɠii Yesu Kilista ti zaalai la wo ma, ti ziilɛigi ve wo ʋɛ. 4 Nà nà-GALAGI mamasu ɠɔ, gè ɗa ɠizɛ è zu nà-GALA falii zu, 5 mazɔlɔɔ nà ɗa-ɠidaaleʋe vai mɛnisu é lo Maliɠii Yesu ʋa, ta ɗa-nɛɛbɛi é lo GALA ná-nuiti pɛ ba. 6 Nà GALA falizu ga kpɔfaamai é ade ɠiliai ʋa ɗa-ɠidaaleʋei maaʋele ma, naa ɠula kɛlɛma ga kɛɛwotii. Nii a kɛ faa ʋagɔi kpein gá ɠɛ è liini kɛɛ vai ma Kilista ná-faa ma, naa ɠula kɛlɛma. 7 Kɛ̀ɛloun, ɗa-nɛɛbɛi gòla ɠoozunɛa, é ìɲɔdɔ, mazɔlɔɔ è GALA ná-nuiti ziilaaʋɛ. 8 Naa ɠa é ba, anɛɛ ni Kilista maaʋele ma, zobogi pɛ ka zèa, nii maanɛai è kɛ, gè è leve ma, 9 fizɔgɛ gè è maanɛɛnɛ nɛɛbɛi maaʋele ma, ʋelei gè la, nà Pɔle, kɛwola wɔlɔi, é ɓudɛ naa maazu, niizu nɛ̀i gè kasoi ɠa, Yesu Kilista ná-faa zu. 10 Nà è maanɛɛnɛzu dòin Wonezime ná-faa zu, nii zɛ̀gai kasoi ɠa ʋɛ, gè ɠɛ ga kɛɛɠɛ zɛnvui zu. 11 Mɔungi zu, tosu la ɠɛni ba è ʋɛ, kɛlɛ niizu toɠa è maavaa ɠɛ niina, é nà ɓalaagi màavaa ɠɛ. 12 Nà teʋesu è ma ʋolu, tɔun, toɠa niina eɠɛ zìi ɓɔɔɓɔgi. 13 A la nɛɛ bɛ̀ ga gè makɛ ɠobaʋɛ, siɛgi zu gè kasoi ɠa la Woo Niinɛ Ʋagɔi ma vaa zu, é ɗa botii ɠɛ bɛ̀ è-ʋotogi zu. 14 Kɛlɛ gè la kɛɛni gè ʋa naa ɠɛ, ni è la vaani bu, naa ɠa a kɛ ɗa-vaaɓɔɠɔi mina ɠɛ ga maaɓaa vaa, kɛlɛ kɛni é ɠɛ ga è-yiimai. 15 Tanisu Wonezime ɓe ge leʋeni è ʋa, é ɠɛ ga yeeɠɛɠala go, nii a kɛ è sɔlɔɔ ya, é yɛ è ya eyɛsu ɠɔ. 16 Mazɔlɔɔ é la mɔ ga duɔ ɲaka nɔ, kɛlɛ toɠa niina ga nui fizɔgai duɔi ʋa, é ɠɛ è ʋɛ, eɠɛ ɠɛɛɠɛloin nii gola nɛai è ʋɛ. Nɛɛʋɛ bɛ̀ gola, kɛlɛ maanɛɛʋɛ é nɛɛ è ʋɛ mɔnɔ gola, é leʋe duɔi ʋa, é ɠɛ ga è-ɠɛɛloin Maliɠii maaʋele ma. 17 Naa ɠa é ba, ni deɠɛmu ɗa sèɠezu ga è-wɔɔlai, yeezei bu, eɠɛʋelei ɗa yeezei la bù. 18 Ni a ɠɛna faa ɠɛɛni ga ɗe, ɓaa ni ɗa-ɠuye ɠa ma, naa leve nɔ̀un unma. 19 Nà Pɔle, nà ɓɔɠɔi zèeʋogi ɠa gè nii zɛʋɛzu la: Nà sala è ma. Gè la naa wosu è ma ga tɛi nà-kuyei ɠa é è ma, ɗa ɓɔɠɔi ɗa ga nɔ̀nɔ. 20 Ungo, kɛ̀ɛloun, niima vaaɓɔɠɔi ɠɛ bɛ̀ da-ɠilibalai maaʋele ma da Maliɠii, è zìila da-ɠilibalai maaʋele ma da Kilista. 21 Nà niima zɛʋɛi ɠɛɛzu è ma ladalai zu, ga nii gè bosu è ma, ɗa ʋaazu kɛɛzu é ɓudɛ naa maazu. 22 Naa pɛ poluma, pɛlɛ ɠɛʋele ɓɛtɛ bɛ̀, ʋɛ nà ɠɛ ɲiizu ná, mazɔlɔɔ dàaʋɛ da ga, wa-ƓALA faliiti maaʋele ma, nà ma zobo sɔlɔɔsu, gè ʋaa wo ʋɔ bɛ. 23 Epafelase, gi kasoi ɠa ʋɛ, Yesu Kilista ná-faa zu, toɠa è luʋɔsu, 24 ta Maleke ɓalaagi, ta Alisitaake, ta Demase, ta Luke, gɛiti gi botii ɠɛɛzu ʋɔɔma. 25 Maliɠii Yesu Kilista ná-zaalai yɛ wo ʋa.