Zɔɓe 20

1 Sofaal nii é zeɠezu Naama, naa kpɔɛi zeɠeni, é ɠɛ ma: 2 «Wɛlɛ niizu, nà-kisiɛiti ta ɓɔizu dà ga gè gooɠaaʋotegi ve, gè la zooga gè ʋa yiilɔɔ. 3 Gè zeliiti mɛnigɛ, ti la zɔleni gàazu. Nɔ̀nɔ ma gaamai ɠa gè losu ma, gè gooɠaaʋotegi ve. 4 È la suɠwɛɛ ɓaa ga, siɛnɔpɛ su, kaipa nuɓusɛi ɠulani etea, 5 nu ɲɔiti ta-vɔnifaamai zu la ɗa ga ɠooza, ta nu ɲɔi ná-koozunɛɛi ɠa ga yeeɠɛɠala go nɔ? 6 Anɛɛ siɛgi zu sɔligi zeizu la geei ʋa, ta nɔungi ɗa zei tonaɓiingiti ba, 7 Toɠa ɲɛɛlɛ eyɛsu ɠɔ, eɠɛ tɔ ɓɔɠɔi koozu ɓooi. Zɔiti ti ɠɛni kwɛɛ, naati ta ɠɛ ma: ‹Mini ɠa é ná?› 8 Toɠa ɲɛɛlɛzu eɠɛ segi, kɔɠɔʋo ge loo ya, é loo ya eɠɛ kulakɛlɛmai é wosu kpidii. 9 Ti zunui naa ɠaani, kɛlɛ ti la mɔ kaa pɛ, adaʋɛ é ɠɛni zeini ná, ná yeema ma. 10 Ná-doun zunuiti ta bala nuiti zee ɠaaɠale ma, niiti é looni ti ma. Tɔ ɓɔɠɔi ɠa ti kpein potogi ve, é ɠula ná-naavoloi zu. 11 Zɛbɛi ɠɛni ba ná-nu niinɛlai zu, naa kpein ka yeizu ma kabayeɠei zu. 12 «Anɛɛ ni faa ɲɔi nɛɛʋɛ da, anɛɛ ni toɠa makɛsu nɛgi wu, 13 é makɛ ba, é la ɠɛlɛa ba, é makɛ daa ɠoozuʋɛ, 14 daamianigi ɠa valibo koozuʋɛ, toɠa ɠɛ koozuʋɛ ga kɛlɛɓɛzɛi ma wanai. 15 Naavoloiti é ti ɓɔleni zɔiti zea, toɠa unpili ga tiye, GALA ka ti ɠula koozu. 16 Toɠa kɛlɛɓɛzɛi ma wanaiti kpɔlezu. Toɠa saai maazɔlɔɔ ga gozagi ná-ɲiigi. 17 «É la mɔ ɠidia ná, ga toɠa kɔin gulɔi zɔlɔɔ mɔnɔ ga undaanɛɛi, eɠɛ ziɛ wolaiti, kɔtuɗɛiti ti ga nikɛ ɲiimiɗɛi ma wulɔi. 18 Toɠa ɓɔlɔzu lɔnɔgi kpein pu ya, é la yiimaɠɛa su. Ná-naavoloi kpein é sɔlɔɔni ná-pɔdi loo vaiti su, é la ta wɔinɠulaa. 19 Mazɔlɔɔ é bala nuiti koloɠoloni, é ɠɛlɛ ti ʋa, é ta-ʋɛlɛiti goloni, niiti é la ʋaazu ti losu ʋolu. 20 Tɔɔzei ziima vai la ɠɛni ɠɛɛni, é la zooga é ʋa ná-naavoloi taɠila kpalaa kizo. 21 Toɠa maayii ɠɛ ga nui kpein, kɛlɛ ná-kulagaanɛɛzui zu la ɠoozaa. 22 Anɛɛ ná-sɔlɔɔ golai naa kpein saama, toɠa ɠɛ kpalai zu. Maanɔɠɔ ɓakɔi kpein ka zeeli ma. 23 Siɛgi zu é ɓalazu la ga é ɠogi zulaave, GALA ka yeeɓe ná-ziiɠaawana wolai ʋa, é yei daalɔɠɔma, é ʋu ma daamianigi ʋotogi zu. 24 A ʋelana kɔɔɠɔ zɔɔlai ʋa é ga kɔlu gelei, kɔlu ɓɔi mɛɛin ɠa ʋa é bɔ. 25 Mɛɛin é bɔai poluʋɛ, a naa ɠulana ɓɔɠɔ ʋa, kaegi é saamaʋɛ zuvologai, é naa ɠula, saai ná-maalua vai ɠa lɔ unga. 26 Kpidii makɛgɛ daalɔɠɔma ga ná-tɔnɔgi, abui nii nu nɔpɛ ge la gaalɛɛni, naa ɠa kɔligiti gala, é naati kpein gala niiti ti yɛsu ná-pɛlɛi wu. 27 Geeɠɔlɔgi ɠa ná-faaɠaazagiti kula kɛlɛma, eteai ɓalaa ka wuzeɠe daalɔɠɔma. 28 GALA ná-ziiɠaawana voloi, ani ʋagɔi kpein é gaalɛai ba ná-pɛlɛi wu, naa ɠa ɓale, é zeɠe ná. 29 Naa ɠa é ga kasɔi, GALA ge kɛʋele ɓɛtɛai nu ɲɔi ná-faa ma, maanɛai é sɔlɔɔ. Naa ɠa GALA ge deveai tɔun bɛ.»