Zɔɓe 18

1 Suɠa nui Ɓilidade kpɔɛi zeɠeni, é ɠɛ ma: 2 «Siɛgi ɓɛgele zu ɠa wo ɓesu la kpɔɛ mɔinmɔingi naati ba la? À ɠigaiziɛ su, naa ʋolu gá ɓɔɛ niina. 3 Leeni vaa zu gi levezu ga suaiti? Toɠa wo ɠisu ga gá ga faaɠaaɠalala nuiti? 4 Ee, ɗa ʋe, ɗɛi è ɓɔɠɔ ʋalizu ga ɗa-yiiɠaawanai zu, kɛni ɗɔun ɗa-vaa zu kɛlɛbai wo ga eteai, fasai zeɠe tosuʋɛ? 5 «Ungo, nu ɲɔi ná-wozakalagi ɠa za, ma abuzogi é ɠɛa ba, naa ɠa ɓe foloi ʋa. 6 Wozakalagi zuɓidi ná-seɠe ɠotai wu, zɛnvui ma zɔmɔgi ɠa za. 7 Kɔɠɔi zɛbɛi ɠɛa ba, naa zu ɠa ɓɔlɔ, tɔ ɓɔɠɔi lɛnɛ gooi ɠa ɠɛ ga too zaɓui. 8 Mazɔlɔɔ piligɛ ya, kɔɠɔi lɔ tumɔi zu. Toɠa ziɛzu galuiti zɔɠɔzuʋɛ. 9 Bali sogɛ tibiligi ʋa, ta galuiti daalɔ ba. 10 Galu ʋɔɛngi a zo da, naa lɔɔɠuʋɛ zooi wu, balii ɠa maaɓɔunsu pelei zu. 11 Maalua vai ɠa polu adaʋɛ pɛ, é ʋilɛ kɔɠɔʋo ba. 12 «Pului suvikɛi ɠula zea, nimizai maaɠoolia. 13 Toɠa kɔlɔgi ma ɓulukpulugiti sumi. Ɗɔfɔ zeeɓɛi ɠa baalobazuʋɛti sumi. 14 Tɔɔɠulaʋɛ ná-seɠe ɠotai wu, ʋɛ é ɠɛa ɠalivaazu ná. É lia ga ɓɔɠɔ maalua masagi ʋɔ bɛ. 15 Ti zei ná-seɠe ɠotai wu, é la mɔ ga nɔnɔ. Timinigi vazaga seizuʋɛ. 16 Ma zapeiti ti vɔa buu ʋelei, ma ɓeke koiti ti vɔa maazu ʋelei. 17 Tɔɠɔi ɲɛɛlɛa eteai zu, daasei ge la mɔ etea. 18 Daaʋiliga, é zeɠe wozakalagi ɠa, é ʋili kpidii zu. Ti kpɛa, é ɠula eteai ʋa. 19 É la dounɠa yɛni, ɓaa dounlounɠa ná-nuɓusɛiti saama. Nu vulu nɔpɛ ge la yɛni seizuʋɛ. 20 Folo liizu ta folo ɠulazu, naa ɠa mɛni nii é zeizu ma, naa ɠa nuiti maalua, ti zasu ɗa ɓali. 21 Zekana a ɠɛ la ga telebotala nui ná-pɛlɛi. É ɗa wo ga, ʋɛ ɠɛa ga ada, ʋɛ ti la ɠɛni GALA kwɛɛ ná.»