Zɔɓe 14

1 «Nui nii sɔlɔɔgai anzanui ʋa, ná-foloiti kwɛteʋeʋɛ, ti zulaave ga kpɔlɔi. 2 Toɠa ɠɛɛzu eɠɛ tufa ʋuai é ɠulazu, naa ʋolu é vɔ. Toɠa leʋesu eɠɛ niinigi, é la loga. 3 Tɔ ɠa è ɠaazulaalaogai, è to ba! Ɗa tòlisu tukpɔɠaaleʋezuʋɛ! 4 Ɓɛ ɠa a zoo é ani ʋagɔi ɠula ani ɠɔzɔi zu? Ma nu ɠila kpalaa ge la ná. 5 Tɛi è ná-foloiti tiegɔi leʋea ba, ɗa ɠa è ná-alugi liegɔi leʋea ba, è ná-konagi liegɔiti kwɛɛ, tɔɔzei è ná-eteai ɠwɛteʋeʋɛ, é la ɓudɛa maazu pɛ, 6 ɠaazu lati, è seɠe ba, é lago looɠo, ga é ziilɛi sɔlɔɔ ɓalaa, naa ɠɛ ná-folo luʋai ma zalai zu. 7 «Kito ka ɗa ɠɛ ná, gulu wolai ná-fai zu, ni nu a pɔna, toɠa ɗa ʋɔnɔ ba ʋolu, ma ʋɔnɔbaiti ti la ʋala ba pɛ. 8 Anɛɛ ni ma zapei ɠa wɔlɔzu zooi wu, ma zapei luula dɔɔɠuai fufiligi zu, 9 toɠa ɗa wundu su ʋolu, a ziɛi zɔlɔɔna nɔ feya, é ɓeke eɠɛ siinziin gani niinɛ. 10 Kɛlɛ nui a zaana, toɠa yɛsu laani ga ma ʋoomai. Nuɓusɛi yii a loona, mini ɠa é ná? 11 Yeeta, kpoloɗɛi ɠa vɔ su, ziɛ wolaiti ti maalɔi, ti vɔ su. 12 Zekana, nui a ɠɛna ga too nu, é la mɔ wuzeɠea ʋolu, é la mɔ wuunga ɓɔɠɔ ʋɛ, eyɛsu geeɠɔlɔgiti ti ɲɛɛlɛ, é la ɠulaa ná-ɲiimɛnii zu. 13 Ni nɔ ee, nà-GALAGI, ɗa la kɛɛna, è dɔ̀ɔɠu gɔvɛalaazu, è màkɛ ná, eyɛsu naama voloi zeeli, ɗa-yiiɠaawanai leʋesu da! Ni nɔ ɗa la ku lo bɛ̀, ta leʋena, è ʋa ɠizɛ sù. 14 Kɛlɛ nui a zaana, toɠa vulu su ʋolu, é zɛnvui wo? Nà la ɠɛ maaɓɔungi wosu nà-botiɠɛ voloiti pɛ su, eyɛsu pòtogi ʋa. 15 Ɗa la tòlina, nà la è wooɠaaʋote naazu, siɛgi zu ɗa wɔinna la ga è kà, nɛ̀i è kpɛ̀tɛai. 16 Kɛlɛ tɔun, ɗa niina kɔ̀ɠɔi ʋilɛda ɠilagilagi pɛ gaalusu, ɗa ʋaazu ɓesu ɠidaazu nà-kotoiti bu. 17 Ɗa nà-tɔ koloɠologiti dɔɔɠu ɓɔlɔ ɠila su è daaɠulu kpe, è nà-faaɠaaza golai maalɔɔɠu ga penɛ ɠaaɠiligi. 18 Anɛɛ naa ʋe, gizei ɠa ɗa ɓusɛ, é vaza, fasai zeɠe losuʋɛ. 19 Ziɛiti ta ɗa kɔtuiti sumi, ti ma veinfeingi ɗa yei ga pɔlɔ ʋagɔi. Zekana é la, ɗa nui ná-kitogi ɠoloɠolo. 20 Ɗa ɗa gaavala zooi ma, é li, é la ɠalega ma ʋolu. Ɗa gaazulo pelei valibona, è kpɛ maaɠooza. 21 Ta ná-dointi kpaɠozu, é la mɔ naa ta ɠwɛɛ. Ta ti ʋɛlɛʋɛlɛsu, é la mɔ naa ta ɠaaɠaazu. 22 Tɔ ɠila nɔ ɠa é taɓai zɔlɔɔsu ɓusɛi zu, Tɔ ɠila nɔ ɠa é ziiɓɔlɔi ɠaalu mɛnisu zɛnvui zu.»