Tukpɔɠaaleʋe Nuiti 15

1 Yeeɠɛɠalai tanigaa leʋegai ma, moloi é ga ɓeleegi, naa leʋe ziɛgi zu, Samesɔn liini laaliizu anzai ma ga boli yiʋoi, é ɗa ɠɛ ma: «Nà lɛɛzu ànzai ná-pɛlɛi wu.» Kɛlɛ anzai kɛɛɠɛ la ɠɛni kɛɛni, é ʋa lɛ ná. 2 Naa ɠɛni ma: «Gè ɠɛa laani da ga wɔin la è ma, gè fea è-wɔɔlai ya ga anza. Deɠe anzanui la ʋani, é ʋa leʋe tɔun ba ɓaa? Naa zeɠe tɔun potogi zu.» 3 Samesɔn ɠɛni ti ma: «Niizu gè la mɔ ɠɛa ga sɔba nu Filisiti nuiti ta-vaa zu, ni nà faa ɲɔu ɠɛɛna ga tiye.» 4 Samesɔn liini, é koʋe unsaʋagɔ (300) zo, é felefelegiti wɔɔngiti gili ɓɔɠɔ ʋa, é sɔmɔgi ɠili ti-wɔɔn felegɔiti saama. 5 É abui loni sɔmɔgiti ba, é yeeɓe koʋeiti ba, ti ʋilɛ Filisiti nuiti ta-moloiti su, nii é ga ɓeleegi, ma ɠiliiti ta ma mɔɔiti ti ɠala, ta wolive ɓeleiti. 6 Filisiti nuiti ti ɠɛni ma: «Ɓɛ ɠa é niima vai ɠɛai?» Ti ɠɛni ti ma: «Samesɔn ʋe, Timina nui nɛkoi, tɔɔzei naa anzai zeɠeʋɛ, é fe bɔɔlai ya ga anza.» Filisiti nuiti ti liini, ti anzanui naa ɠala, ta kɛɛɠɛ. 7 Samesɔn ɠɛni ti ma: «Zekana wo kɛɛzu la ɓaa? Gè la mɔ looɠoga eyɛsu gè nɔnɔ ʋotokula wo ma.» 8 É laalɛɛni ti wu, é ti zuloɠani gola. Naa ʋolu, é li é zei Etame pugi zu. 9 Filisiti nuiti ti liini ti ʋu Zuda yooi zu, ti vaza Leyi ʋele. 10 Zuda nuiti ti gaazaɠagi woni, ti ɠɛ ma: «Lee vaa zu wo lɛai gi laalɔɠɔma?» Ti ɠɛni ti ma: «Gi ʋaaʋɛ ga gi Samesɔn ɠili, gi naa ʋotokula, nii é kɛai ga giye.» 11 Naa ɠa é kɛɛni, Zuda yooi zu zunu waasaʋagɔ (3.000) liini Etame pugi zu, ti ɠɛ Samesɔn ma: «È la suɠwɛɛ ɓaa ga Filisiti nuiti ta zeini ade unda? Leeni ɠa è kɛai ga giye?» É ti wooɠaaʋoteni, é ɠɛ ti ma: «Gè ti zogɛ, eɠɛʋelei ti sògai la.» 12 Ti ɠɛni ma: «Gi ʋaaʋɛ gi è ɠili, naa ʋolu gi è ve Filisiti nuiti zea.» Samesɔn ɠɛni ti ma: «À ɠona bɛ̀, ga wo la pàa wa ɓɔɠɔi.» 13 Ti gooɠaaʋoteni, ti ɠɛ ma: «Ɓa-o, gá pɔ nɔ ga gi è ɠili, gi è leʋe ti ʋɔ, kɛlɛ gi la è ʋaazu.» Ti gilini ga galu niinɛ felegɔ, ti kula pugi zu. 14 Siɛgi zu ti zeelini la Leyi, Filisiti nuiti ti kpeei looni ga koozunɛɛi, ti daaɠomi. Ɠɔoɠɔ GALAGI ná-Zɛnvui yeini Samesɔn ma gaamanɔ. Galuiti ti ɠɛni zee ʋa, naati ti ɠɛni eɠɛ gezei, nii abui galaai, gili ɠaluiti pɛ ti ʋuuni ya, ti ɠula zee ʋa. 15 É soovalegi kpalɔɠae niinɛi ɠaani, é yeemaaleni, é seɠe, é zunu waagila (1.000) paani ga naa. 16 Samesɔn ɠɛni ma: «Gè poomaiti gaalɛ ba ga soovale kpalɔɠae ɠilagi, ungo gè zunu waagila (1.000) paa, ga soovale kpalɔɠae ɠilagi.» 17 Siɛgi zu é ɓeni la ga ɓɔɛ, é soovale kpalɔɠaei ʋilini ya. Ti naama adaʋɛ laasei pɛɛni ga Lamate-Leyi. 18 Kpɔɔle wɔin wola ɓɔini da, é wooɠulani Ɠɔoɠɔ GALAGI ma, é ɠɛ ma: «Ɗa ɠa è kizo faa wolai nii ɠɛai ga zèei, nɛ̀i gè ga ɗa-wotiɠɛ nui, niizu nà ga za ga kpɔɔle wɔin, nà ga loo tatipɛlɛʋolulala nuiti zeezaama?» 19 Gaamanɔ, GALA ge kɔtui ma yeɠei laalaoni, nii é Leyi, ziɛi ɠulani ná. Samesɔn ɓɔɔleni, ziilɛi tɔɔn, é zɛbɛi zɔlɔɔ ʋolu. Naa ɠa é kɛɛni ti ziɛungi naa laasei pɛɛni ga En-Ɠakole, naa ná-ziɛungi, toɠa dɛ ná zaaɠaza Leyi. 20 Samesɔn ɠɛni ga tukpɔɠaaleʋe nui Izilayɛle yooi zu, Filisiti nuiti ta-ziɛgi zu kona ʋuufelegɔ (20) laawu.