Ezayi 53

1 Ɓɛ ɠa é ɠidaaleʋea naa ma, nii ade mɛniga? Ɓɛ ɠa Ɠɔoɠɔ GALAGI ná-zobogi lɛa la? 2 Mazɔlɔɔ Ɠɔoɠɔ GALAGI ɠaazu, botiɠɛ nui wɔɔlɔni eɠɛ ani ʋɔnɔ niinɛi, eɠɛ sapei é ɠulazu zou vɔɔi wu. Ɠaazulosu la ɠɛni ba, ɓaa pasu nɔpɛ, nii da zoo ɠaazulosu ba, gaazulo pelei la ɠɛni ade ɛnɛkɛga. 3 Wɔinzeɠeni, nuiti ti ɠɛlɛ ba, zunui é ɠɛni nɔ taɓai laawu, kpɔlɔi ɠuboni su, é ɠɛ eɠɛ nui ti nu ɠaazulɔɔɠuzu ba. Wɔinzeɠeni, ade la ɠɛni deveni ga ani nɔpɛ. 4 Tama, ada-ɓɔlɔiti ka é ti zeɠeni, Ada-zoolɛiti ka é ti zeɠeai ga ɠasɔ. Kɛlɛ de ɠɛni ɠisiɛzu ga GALA ná-doɠai ɠa é daawu ɠana, é ɗa doɠa, é ɗa unfe. 5 Kɛlɛ ada-lɔ koloɠologiti faa ɠa ti bɔɔni su, ada-vaaɠaaza golaiti faa ɠa ti suɠaleɠaleni la. Maaɠoloi nii a la zeeli ade ma, de ʋa ziilɛigi zɔlɔɔ, naama ɠasɔi laani tɔun unma. Maawanani, naa ɠa é ade ɠɛdɛni. 6 De pɛ de ɠɛni ga teʋeteʋe nuiti eɠɛ baalagiti, ɛsɛ ge ɗa li ga yiima ʋelei. Kɛlɛ Ɠɔoɠɔ GALAGI de pɛ da-vaaɠaaza golai laa tɔun unma. 7 Ti sopele ɲɔuni, é ɓɔɠɔmaayeini, é la ɠɛni woo ɲɛ gila kpalaa boni. Eɠɛ baala ziʋoi ti liizu la paazuʋɛ, eɠɛ baalagi maaɠɛgai kpɔ loni maaleɠa leʋe nuiti kakala, é la ɠɛni woo ɲɛ gila kpalaa boni. 8 Ti soni, ti tukpɔ, ti ná-fai ɠaaɓela, kɛlɛ ɓɛ ɠa é yiizoolɛni ná-faa? É leʋeni ga é ɠula vulu nuiti ta-eteai zu, saai zeelini ma ná-nuɓusɛiti ta-lɔ koloɠologiti faa zu. 9 Ti maaɠuluni faa ɲɔu ɠɛ nuiti saama, ná-kabai ɠɛ naavolo nui ʋɔ bɛ, anɛɛ ni é la ɠɛni tooma ɠɛɛni, ta kaipa dakɔlɔgiti ti la ɠɛni zɛɛ woni. 10 Kɛlɛ GALA ge vaani bu é vɔɔɠu ba ga kpɔlɔi. Kpega ʋoluma ga ɓɔɠɔ ɠula ga faazuɓɛtɛ zalaɠai, toɠa mavofodaiti ka, sii zu ɠa ɠooza gola. Toɠa Ɠɔoɠɔ GALAGI yiimai ɠɛ, é daazeeli mɛtu. 11 Ɠɔoɠɔ GALAGI ɠɛni ma: «Mazɔlɔɔ kpɔlɔi pɛ suzoga ʋoluma bɛ, toɠa wozaɠa, undaanɛ. Tɔɔzei nui ma mɔinmɔin ka kwɛɛ, nà-botiɠɛ nui Telebogai ɠa ti pɛ kɛ ga telebo nuiti, é ta-vaaɠaaza golaiti da ɓɔɠɔ unma. 12 Naa ɠa é ba, nà nɔnɔi ve zea bɛbɛ wolai naati saama, ta kɔɔzoganii ɠaaɠwɛ ta zɛbɛsu nuiti, tɔɔzei tɔ ɓɔɠɔi é ɓɔɠɔ lɔɔni saai zu, é vaani bu, é ɠaalu tɔ koloɠolo nuiti saama, mazɔlɔɔ é ma mɔinmɔin ná-kotoiti daani unma, é faa ɲɔu ɠɛ nuiti maalogi woni.»