Ezayi 4

1 Naama volo ná, anzanu lɔfela ɠa ɗa zunu ɠilagi zo, ti ɠɛ ma: «Gi la ɠɛa è unma ga kasɔ daamiani faa zu ɓaa seɠe vaa zu. Kɛlɛ è-laaseigi nɔ ʋɛɛ gi ʋa! Unfegi ɠula gi ɠaazu nɔ.» 2 Naama volo ná, nii Ɠɔoɠɔ GALAGI pɔnɔsu, maa ɠa yiki, lɛbiyai ɠɛ bɛ, zooi ʋaalɔnɔgi ɠa ɠɛ ga unbuzeɠe vaa wola, Izilayɛle nui mɔtaiti bɛ ti yɛsu vulua. 3 Naazu zɔiti ta yɛ vulua Siyɔn ta loli ga nu ɲadegaiti, niiti pɛ ta zɛʋɛ ná-sɛʋɛi zu ga ti zɛnvui wo Zeluzalɛme. 4 Maliɠii ɓega ʋoluma ga Siyɔn anzanuiti ta-ɠɔzɔba vaiti gba, é Zeluzalɛme ɲade ɲama ʋui ma é ɠɛɛni ná, ga zɛnvu viilɛi maaʋele nii é telebodai ta ɲadedai ɠɛɛzu. 5 Ɠɔoɠɔ GALAGI ɠa kpɛtɛ ga Siyɔn gizei pɛ ma, ta niiti pɛ ti ɠaalɛɛzu ba ná, tonaɓiingi ɠɛ ti maazu foloi, kpidii duului ta abui ma wozakalagi. Maliɠii ná-lɛbiyai ɠa ɠɛ ti pɛ maazu ga ti makɛ anii, 6 eɠɛ kotai é niinigi veezu foloi, é nu makɛ, die ge mina zei è ma, é ɠɛ ga nu lɔɔɠuzu ta nu makɛsu fiilɛ wolai ta tonai ʋa.