Ezayi 35

1 Teʋebai ta zou vɔɔi ti ta-ɠoozunɛɛi ɠulaa kɛlɛma! Zou vɔɔ ɠoozunɛ, maaɓidi ga tufa waaiti. 2 Tufaiti ma waa ʋagɔiti ti mɔin ná, ná-koozunɛɛi zuwɔɔlɔ, é pilɛ sɔlɔɔ guyei loo ga koozunɛɛi! Liɓan ɠizei ma lɛbiyai veeʋɛ zea, ta Kaalamɛle gizei ná-maayikii, Salon ɠizei nɔnɔi. Naazu ta Ɠɔoɠɔ GALAGI ná-lɛbiyai ɠa, ada-ƓALAGI ná-maayikii. 3 Wo-yeeiti ti zuɓɔlɔai, à ti zulo, wo-ɲiibiiti ti ɓalizu, à ti lo kpe. 4 À ɠɛ naati ma ti ziiɓɔlɔi zu: «À yiilɔɔ, dualua ge mina wo zo, wa-ƓALAGI ɠana ʋaa, potokulai ɠa é ʋaazu la, nii é ga GALA ɓɔɠɔi ná-sala veei, tɔ ɓɔɠɔi ɠa é ʋaazu, é wo ɠizo.» 5 Naazu, gaazuɠole nuiti gaazu ɠa zeɠe ma, ti wozaɠa, goizuɓɔlɔ nuiti goizuʋɛti daa ɠa lao, ti ɗa faa mɛni. 6 Naazu, mɛɠɛlɛ nuiti ta ɗa ʋili eɠɛ dopai, ɓoɓoiti ti ɗa ɓɔɛ ga koozunɛɛi. Mazɔlɔɔ ziɛiti ta ɠɛ yeizu teʋebai zu, kɔtuɗɛiti ti ɗa yei zou vɔɔi zu. 7 Zou vɔɔi ɠa valibo ga ziɛ ɓoigi, zooi ziɛ vai ɓaai su, miná ɠɛ ga ziɛungiti. Zeɠei koʋeiti ti ɠɛni ʋɛɛzu su, seeligiti ta tɛmuiti ta ʋɔnɔ miná. 8 Pelei ɠa la ná, ta daasei pɛɛ ga pele ɲadegai. Kɔzɔba nu nɔpɛ ge la zooga é ʋa ziɛ la, mazɔlɔɔ makɛgɛ GALA ná-nuɓusɛiti gila kpe nɔ ʋɛ ga ti ziɛ la, anɛɛ ɠimalala nuiti ti la ɠakaga su. 9 Zala la ɠɛa pelei ná zu, sua ɲɔu ɠila kpalaa ge la ziaa la, nu la taɠila kpalaa ka ná. Maliɠii ná-nu ɠizogaiti nɔ ɠa ta ɠɛ ziɛzu ná. 10 Zekana é la, zɔiti Ɠɔoɠɔ GALAGI ti unmɔɔgai, ta ɠale ma, ta zeeli Siyɔn ga pilɛ sɔlɔɔ guyeiti. Ɠɔoɠɔ koozunɛɛi ɠa ti-ɠaazuʋɛti folo, ta undaanɛɛi ta koozunɛɛi zɔlɔɔ, ziiɓɔlɔi ta gaazuɠili vaiti maa ɠa ɠooza ti ʋa.