Ezekiyɛle 2

1 É ɠɛni mà: «Ɗa ʋe, zunui, wuzeɠe, è lo, nà ɓɔɛzu è ʋɔ.» 2 Siɛgi zu é ɠɛni ɓɔɛzu la pɔ̀ ɠana, GALA Zɛnvui lɔɔni zìimaʋɛ, é bùzeɠe. Zɔi é ɠɛni ɓɔɛzu pɔ̀, gè gooi mɛnini. 3 É ɠɛni mà: «Ɗa ʋe, zunui, nà ɠa gè è leʋesu Izilayɛle nuiti pɔ bɛ, kololala nuiti, ti wuzeɠeni dàalɔɠɔma. Eɠɛʋelei nɔ ti-mɛmɛwolani ti ɠɛni la, ti la ɠɛni ɓeni kololalai ʋa ga ze. 4 Nui niiti ti unsuvɔai, ti ɠigi ɓaa, naati ka gè è leʋesu ti ma, ɗa ɠɛ ti ma: ‹Maliɠii Ɠɔoɠɔ GALAGI wooi ɠaa.› 5 Ti woiloni è-woo ma, ɓaa ti ɠɛlɛni, tɔɔzei kololala nuɓusɛiti be, ta kwɛɛ ga GALA goo wo nu ɠa ti zaama. 6 «Ɗa ʋe, zunui, mina lua ti ʋa pa, mina lua ta-ɓɔɛzuɠulaiti ba. Ta è zakpe, toɠa ɠɛ eɠɛ ɗa zei ɠaingiti saama, ta akuɠɔtɔkaaliiti. Anɛɛ naa ʋe, ti-laawooi ɓaa ti-ɠaazuʋɛ mina è zasuɓali, tɔɔzei kololala nuɓusɛiti be. 7 Ɗa dàawooiti bo ti ma, ti woiloni è-woo ma, ɓaa ti ɠɛlɛni, tɔɔzei kololala nuɓusɛiti be. 8 «Ɗa ʋe, zunui, woilo naa ma, gè ʋaazu bosu è ma. Mina ɠɛ ga kololala nu, eɠɛʋelei kololala nuɓusɛi niiti ti la. Laalao, è naa mi, nii gè feezu è ya.» 9 Gè wɛlɛni, gè nui yeei maalegai ɠa mà, sɛʋɛ ɓiligi zoni zea. 10 É suvieni gàazu, sɛʋɛi ɠɛɛni koozuʋɛ ta poluʋɛ ná felegɔ pɛ. Niiti ti zɛʋɛni su, naati ti ɠɛni ga kpeeiti, ta maawɔin wuyeiti, naa ʋɛɛ kpalagiti ba.