2 Zan 1

1 Nɛ̀i gè ga Egilisi lotuɠɔi, nà ɠa gè sɛʋɛi nii leʋesu anzanui ma, GALA ge yiimazeɠeai la, ta ná-dointi, niiti gè ti nɛai ʋɛ ga gaamai, nà ɠila taade, kɛlɛ zɔiti pɛ ɓalaa ti gaamai ɠwɛɛ, 2 tɔɔzei gaamai ɠa ade-yiimaʋɛ, ta toɠa yɛ ade ʋa ɠɔ. 3 Ɠɛɛɠɛ GALA ta ná-Doun Zunui Yesu Kilista ti zaalai la ade ma, ti ade maawɔinɠa, ti ziilɛigi ve ade ʋɛ, de zɛnvui wo ga tiye, gaamai ta nɛɛbɛi zu. 4 Kòozunɛɛni gola gè è-loin tanigaani ka, ti ɗa ziɛ gaamai zu, eɠɛʋelei Ɠɛɛɠɛ naama levei veeni la ade ya. 5 Niizu niina, anzanui, nii gè bosu è ma sɛʋɛi zu, é la ga gè ʋa ɠɛ deve niinɛ veezu, kɛlɛ toɠa ga zɔi ade sɔlɔɔga tɔɔzeizu mɔunpa, ga ade ɓɔɠɔ nɛɛ ʋɛ ade ɠilagilagi pɛ. 6 Nɛɛbɛi ɠa ga, de ziɛ ga GALA ná-deveiti. Naa ɠa é ga devei nii wo maanɛai wo ziɛ la, eɠɛʋelei wo mɛnini la tɔɔzeizu mɔunpa. 7 Nu yaava nu mɔinmɔin ge vazaga eteai zu, ti la kɛa ti ʋa la da ga Yesu Kilista ʋaani ga ɠite kpusɛi zu. Zɔi é ziɛzu ɠana, toɠa ga yaava nui, é ɠɛ ga Kilista zili nui. 8 À dama ga ɓɔɠɔ, naa ɠa a kɛ wo mina ʋala gá-wotii zulɔnɔgi ma, kɛlɛ wo wa-ɠulanumai laazeeliai zɔlɔɔ. 9 Nu-o-nu é la ɠɛ yɛni Kilista ná-kalagi ʋa, a zeɠena ba, é li yɛ, GALA ge la naama nui ʋa. Zɔi é yɛsu niima ɠalagi zu, Ɠɛɛɠɛ ta Doun Zunui ta ɠili ma nui ʋa. 10 Ni nui ta a ʋaana wo ʋɔ bɛ, kɛlɛ é la ʋaani ga kalagi nii, à mina yeezei bu wa-ʋɛlɛi wu, à ɠɛlɛ tuʋɔ fai ʋa ɓalaa. 11 Mazɔlɔɔ zɔi a tuʋɔna, naa ʋɔɔpɛa ná-kɛɛwoti ɲɔiti ba. 12 Faa mɔinmɔin ka kìsu ga gè bo wo ma, kɛlɛ gè la wɔinni gè ʋa naa ɠɛ ga sɛʋɛi ta sɛʋɛ ɗɛi. Toɠa kìsu ga gè ʋa wo ʋɔ bɛ, gè ɓɔɛ wo ʋɔ laani ta laa, naa ɠa a kɛ da-ɠoozunɛɛi laazeeli. 13 È-ʋaazeelai GALA ge yiimazeɠeai la, ná-dointi ta è luʋɔsu.