Luke 18

1 Ale Iesu mo vere na titileu matea isara vara i vujangira vara la pa lo usiusi tarea, ale vara rÌomira la sopo jovi na sava la usia. 2 Mo verea mara, “Na taon tavera matea, tamlohi aria matea mo lo toho ea, mo sopo matahuni God teni vara i sile na oloolo isan te tamlohi tinapua hatea. 3 Ale harÌai malepu matea sohena mo lo toho atu, mo lo mai tarea mo lo usia isana mara ‘O sile na talai mo tataholo vara noku meresahi i lavia.’ 4 Tiroma mo lo rÌohu hinia, pani hitahu mo hase verea isana mara, ‘Hina purongo vara na sopo matahuni God teni a sile na oloolo isan tea, 5 pani matan harÌai malepu akerihi tarea mo lo areau mo sopo te isoisona, a pa silea na sava mo lo usia matan vara i sopo mele hotiau hinia.’" 6 Ale Moli mo mele verea mara, “Ha tapurongo na sava tamlohi ari hehe atu mo lo verea. 7 Ale ka rÌom vara God i pa sopo erÌi sile na sava sei nona tapuhi la lo usia isana tarea? 8 Na verea isamim, enia i pa sile na talai mo tataholo vara nora meresahi la lavia i vila purongo. Hina purongo hin haratu, vara Natun Tamlohi i mele mai, i pa vilei te rasua na varama teni i vono?" 9 Ale mo mele vere titileu akerihi isan la haratu sei la lo hase rÌomrÌomia vara enira la tataholo na nahon God, ale la lo hitelehilehi na tinapua: 10 “Tamlohi mo rua la lo toho na lolo Temple, ale la lo usiusi, matea enia Pharisee matea, ale haratu matea enia tamlohi mata lavi na mania mata takis matea. 11 Pharisee atu mo turu atu mo lo hase usiusi matana hasena mara, ‘God, na vere meje isam matan enau na sopo sohena tamlohi tinapua, haratu la lo ngurunguru mata mania, haratu la hehe, haratu la lo vaivaileu peresi na tinapua mo lahi moiso, teni sohen tamlohi mata lavi na mania mata takis akerihi. 12 Enau na tapuhoro na hanhani vaha rua na wik matea; tarea na lo sile na sangavulu hinau tari na lo lavira.’ 13 Pani tamlohi mata lavi na mania mata takis atu mo turu asau, mo sopo erÌi tahe na matana i kilau sahe na tuka, pani mo vilivili na rÌumana mo verea mara, ‘God, o rÌomopoiau, enau tamlohi hehe matea!’ 14 VararÌuhu na verea isamim vara tamlohi akerihi mo mele mule mo tataholo na nahon God, pani mo sopo haratu matea. Matan tamlohi tari sei la lo hase tahera, God i pa taura la sivo atano, pani haratu mo hase tau atano God i pa tahea sahe aulu." 15 Na rani matea, tama natuvarihi hai peresi na tinara la lavi na natura la mai isan Iesu vara i tau na limana hinira, ale i lerÌuhu hinira. Pani nona tamlohi usuri la tapulo horora. 16 Pani Iesu mo tovira vara la mai isana, ale mo verea isana nona tamlohi usuri mara, “Ha tinarÌihi na natuvarihi la mai isaku, ha sopo horora! Matan mauri atu God mo aulu hinia enia nona tamlohi sohen la harihi. 17 VararÌuhu na verea isamim, vara sava tamlohi mo sopo lavi mauri atu God mo aulu hinia sohena natirihi matea, i pa sopo erÌi unu hinia hin te rani." 18 Ale na rani matea tamlohi aulu matea mo usia isana mara, “Tija rÌuhu, a pa vai na sava natu vara a erÌi lavi na mauri tui hinia?" 19 Ale Iesu mo verea isana mara, “Mata sava ko toviau rÌuhu? God hasena mo rÌuhu, mo sopo mele te tamlohi tinapua i rÌuhu. 20 Ko levosahi na retileu, ‘O sopo vaivaileu peresi na tinapua mo lahi moiso, o sopo vilimatei, o sopo vavanaho, o sopo tuetueni na halu, o oloolo hin tamam enia tinam’.” Exo 20.12; Deut 5.16 21 Ale tamlohi aulu atu mo verea mara, “La hinau tari sei na tapulo vaira na pa lo uluvou purongo." 22 Iesu mara mo rongoa, mo verea isana mara, “Hinau matea ko vejuveju hinia. O arÌehi vevuhi na nom hinahinau, ale o asea isana tilavono, ale hitahu tavtav na tuka i pa nom; ale o mai o usuriau!" 23 Pani tamlohi atu mara mo rongo la hinau sei mo rongo mo sati tavera, matan enia tamlohi tavtav tavera matea. 24 Iesu mara mo hitea vara mo rongo mo sati, mo verea mara, “Mo rÌilangi hajavua vara tamlohi tavtav la unu hin mauri atu God mo aulu hinia! 25 A pa verea vara mo mele malum jea vara camel matea i unu na koko niteli matea, mo jeu haratu vara tamlohi tavtav matea i unu hin mauri atu God supe hinia." 26 Ale la haratu la lo rongo la reti atu lara, “Avei, vara mo sohena, sava tamlohi natu i pa erÌi juri?" 27 Pani mo verea isara mara, “Sava tamlohi la sopo erÌi vaira, God i erÌi vaira." 28 Ale Peter mara, “Ko hitea, kama tinarÌihi vevuhi na imamam ale kama usuriho." 29 Ale Iesu mo verea isana mara, “VararÌuhu na verea isamim, mo sopo te tamlohi hatea vara i tinarÌihi na imana, teni narouna, teni te voraina, teni tamana enia tinana, teni natuna matan mauri atu God mo aulu hinia, 30 vara God i pa sopo volia nake na varama, i jeu na sava mo tinarÌihira moiso, ale hitahu i pa lavi na mauri tui hin pongi atu mo lo mai." 31 Ale Iesu mo tovi matavuhi la nona tupu sangavulu rÌomana mo rua atu, ale mo verea isara mara, “Ka levosahia vara rÌa lo sahe Jerusalem. Ale hinau tari sei prÌovet la ulia matan Natun Tamlohi la pa masese atu. 32 Matan la pa silea i vano na liman la haratu la tamlohi rÌorÌoha, ale la pa kerehia, la pa vai na hina mahanuhanu isana, ale la litovia. 33 Ale la pa rupia na asi maja, moiso la pa vilimateia, ale na hatolu rani i pa mele turu." 34 Pani la sopo levosahi te hinau hatea sei mo lo verea isara. La reti atu God mo jarohira isara, ale la sopo rongovosahi na sava mo lo verea. 35 Mara mo lo mai mariviti Jericho, tamlohi matavuso matea mo lo sakele na pahisa malele, mo lo usi na tuetueni. 36 Ale mara mo rongo na roroa vao tamlohi la lo hahau na pahisana, mo usia mara sava natu. 37 La verea isana lara, “Iesu mara Nazareth mo lo hahau roto jara nike." 38 Ale mo ulo aulu mara, “Iesu, natun supe David, o rÌomopoiau!" 39 Ale la haratu la lo toho na nahona, la reti isana lara i toho malum. Pani mo mele ulo aulu mo rÌilangi jea mara, “Natun David, o rÌomopoiau!" 40 Ale Iesu mo turu mo retileu mara la lavia i mai isana. Ale mara mo mai mariviti isana, mo usia isana mara, 41 “Ko opoi vara a vai na sava isam?” Mo verea mara, “Moli, o tinarÌihia vara a mele kilau." 42 Ale Iesu mo verea isana mara, “O mele kilau, nom rasua mo vaiho ko rÌuhu." 43 Ale vahatea purongo, mo mele kilau, ale mo usuria mo lo tahe na hijan God. Ale tamlohi tari lara la hitea, enira sohena la hasohaso God.