Yɛsɑ̃ɑ̃ 12

¹ Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ kɛ biennɛ̀ kukùtìdùkù iwɛ̃ĩ ini kɔku.

² Ti Yiɛ̀ nKuyie nti dɛɛtɛ́, bɛnitisɑ̀ɑ̀bɛ̀ dèèmu, timɔ́mmɔnti yɛmbɛ̀ í kpɑɑ́.

³ Bɑ́ wè ò wɑ́tìrì otɔù nwe, koò kpɛ̀nti kòo yɛ̀mmɛ̀ nɛ́ bo mɛ̀dɛ́mɛ̀.

⁴ Kuyie nkuɔ bɛnitikpɛntìbɛ̀, nɛ̀ bɛ̀ɛ̀ nɑ̀ɑ́nnɛ̀ sifeí.

⁵ Bɛ̀ɛ̀ tu: Ti nɔ̀ yɛɛ̀ tu ti kó muwɛ̃rímú, ti nɔ nkɛ nɑ́ɑ́mmu, we mbo nɑ kɛ́ ti bɑɑtɛ́.

⁶ Kɛ̀ Kuyie ndɔ̀: Mí nKuyie m bo ítɛ́ kɛ́cómmú, bɛ̀ fɛ̃́ũnko bɛ̀ɛ̀ sénnìbɛ̀ kpɛ́í nɛ̀ bɛcĩ̀rìbɛ̀ bɛ̀ɛ̀ kuɔ̀, m bo dɛɛtɛ́ bɛ̀ sènkɛ̀rì bɛ̀.

⁷ Kuyie nnɑ́ɑǹtì dò mpɑ́íí nwe kɛ dò mmɛsɔɔ mbɛ̀ pũ̀ńnɛ́ mɛ̀ fɛhɑ̃ɑ̃tofɛ, kɛ̀ mɛ̀ wenkɛ mɛsɑ̀ɑ̀.

⁸ Fɔ̃́ nti Yiɛ̀ Kuyie, fɔ̃́ɔ̃̀ yó nti kɑ̃nkɛ́ bɛnìtìbɛ̀ biɛ̀ mbotí.

⁹ Bɑ́ kɛ̀ dɛ kó bɛnìtìbɛ̀ bo tipíìtì timɔu, bɑ́ kɛ̀ bɛyɛibɛ sũ̀ṹ nkutenkù.