Yɛsɑ̃ɑ̃ 116

¹ N dɔ́mu n Yiɛ̀ nKuyie, kɛ yɛ̃́ kù yomɛ̀ nkó yɛdɑbùò nnɛ̀ m bɑ́ɑmmìi.

² Kù n kèḿmúmu, kɛ̀ ku to bo m bíɛ́kɛ̀, n yó nkù yumu sɑ̃́ɑ̃̀ nɛ̀ m bo mbomɛ̀.

³ Mukṹṹ mmuù do m pìtínnɛ́ mu kó iwɛ̃ĩ, kɛ̀ kudɔnkù kó ticùɔ̀tì m pĩ́, kɛ̀ mɛyɛǹcɑɑ̀rìmɛ̀ n nɑ, kɛ̀ n tɑ kukɔ̃m̀bɔ̀doróo miɛkɛ.

⁴ Kɛ kuɔ́nkoo kɛ́yú n Yiɛ̀ nKuyie nkɛ yĩ́: N Yiɛ̀ nKuyie nyɑ̀ɑ n dɛɛtɛ́.

⁵ Ti Yiɛ̀ nKuyie nwetímu, kɛ mɔkɛ mɛsémmɛ̀, Kuyie nti tũ nkù kuɔ̀mmu onìtì mɛsémmɛ̀.

⁶ N Yiɛ̀ nKuyie nkuù kɑ̃nkù bɛsĩ́ntíbɛ̀, n do cĩ̀tɛmu kɛ̀ kù n dɛɛtɛ́.

⁷ N wɛ̃̀tɛ kɛ pɛ̀tɛ́mu mɛom̀pùmɛ̀, N Yiɛ̀ nKuyie nkuù n dɔ̀ɔ̀ mɛsɑ̀ɑ̀.

⁸ Kuù n dɛɛtɛ́nɛ̀ mukṹṹ, kɛ ũtɛ́ n nɔnniɛti, kɛ pĩ n nɑɑ̀cɛ̀i, bɑ́ n yí do.

⁹ N Yiɛ̀ nKuyie nkuù yó nni nwúó nkɛ̀ n kérí, kɛtenkɛ̀ ĩ́nkɛ̀ bɛfòùbɛ̀ borɛ̀.

¹⁰ N yɛ̀mmɛ̀ do í nɔ̀ɔ́tɛ́ n Yiɛ̀ nKuyie nyĩ́nkɛ̀. Bɑ́ nɛ̀ m mɛ̀ n tɑmɛ̀ mɛsémmɛ̀ miɛkɛ.

¹¹ N do tɑ mɛyɛǹcɑɑ̀rìmɛ̀ miɛkɛ nkɛ, kɛ nɑ́ɑ́ nkɛ tú bɛnìtìbɛ̀ bɛmɔu tú siyɑ́ɑ̀bìsí yɛmbɛ̀ mbɛ.

¹² M bo nɑ kɛ́yietí bɑ Kuyie kù n dɔ̀ɔ̀ mɛ̀ɛ̀ sɑ̀ɑ̀ mmɛmɔu?

¹³ N Yiɛ̀ nKuyie nni ndɛɛtɛ́mu, kɛ̀ n yó nyuo mɛdɛɛtímɛ̀ kó fɛbòòfɛ̀ kɛ kù sɑ̃ntí.

¹⁴ N yó ndɔɔrimu n dɔúnnɛ̀ yɛ̀ɛ̀ nɔ̀ Kuyie n kɔbɛ bɛmɔu ììkɛ̀.

¹⁵ Ti Yiɛ̀ nKuyie nkɔbɛ kó mukṹṹ nku dò ndɛ̀mɑrɛ̀ diɛrɛ̀ ndɛ.

¹⁶ N Yiɛ̀ nKuyie n tú ɑ kóo tɔ̃ntì nwe, kɛ̀ n yɔ̃ tú ɑ kóo tɔ̃ntì, kɑ̀ɑ m pìtɛ́ iwɛ̃ĩ.

¹⁷ N yóó dɑ fíému iwũɔ̃ disɑ̃nni kpɛyi, kɛ̀ n yu fɔ̃́ n Yiɛ̀ nKuyie ɑ yètìrì.

¹⁸ N yó ndɔɔrimu n dɔúnnɛ̀ yɛ̀ɛ̀ nɔ̀ n Yiɛ̀ nKuyie, ku kɔbɛ bɛmɔu ììkɛ̀.

¹⁹ Ti Yiɛ̀ nKuyie ncĩ́ɛ̃̀tɛ̀ dɑ̀nkù miɛkɛ, nɛ̀ Sedisɑdɛmmu ɛì miɛkɛ. Nsɑ̃ntínɛ̀ ti Yiɛ̀ Kuyie!