Yɛsɑ̃ɑ̃ 111

¹ Nsɑ̃ntínɛ̀ Kuyie, kù bomu nsɑ̃́ɑ̃̀! N yó nsɑ̃ntímu n Yiɛ̀ nKuyie nnɛ̀ n yɛ̀mmɛ̀ mɛmɔu bɛ̀ɛ̀ tũ ntimɔ́mmɔnti bɛ cuokɛ̀, ku tĩ̀nnì tìkú dɛ̀.

² Ti Yiɛ̀ nKuyie ntɔ̃mmú dɛumu, bɛ̀ɛ̀ mù dɔ́ kɛ̀ bɛ̀ wɑnti kɛ́ mù yĩ̀ɛ̃́tɛ́.

³ Ku tɔ̃mmú dɛumu kɛ wenni, kù dɔ̀ɔ̀ri timɔ́mmɔnti nti sɑ̃́ɑ̃̀.

⁴ Kù dɔ́ tí nyɛ̃́mu kù pĩ́ mmùù tɔ̃ndiɛmù kpɛ́í, ti Yiɛ̀ nKuyie nsɑ̀mu kɛ mɔkɛ onìtì kó mɛsémmɛ̀.

⁵ Kɛ duɔ̀ mmudiì bɛ̀ɛ̀ kù dé, kù í yĩɛ̃̀ nkù bɛ̀ dɔúnnɛ̀ dìì nùù kpɛ́í bìtì.

⁶ Kù bɛnkɛmu ku nìtìbɛ̀ kù pĩ mmùù tɔ̃ndiɛmù, kɛ bɛ̀ duɔ́ nyibotí tɛì kó yɛhɛkɛ̀ kɛ̀ bɛ̀ tiekɛ.

⁷ Kù dɔ̀ɔ̀ri dɛ̀ɛ̀ kó dimɑ̀ɑ̀ tu timɔ́mmɔnti nti kɛ síɛ́, ku tɑnnɔ̀ í ceeri.

⁸ Yɛ̀ fìíkúmu sɑ̃́ɑ̃̀, yɛ̀ í yóó ceetɛ, yɛ̀ tu timɔ́mmɔnti nti kɛ síɛ́.

⁹ Kuù dontɛ́ ku nìtìbɛ̀, kɛ bɛ̀ dɔ̀ɔ̀nɛ̀ mɛtɑummɛ̀ kɛ̀ mɛ̀ bo sɑ̃́ɑ̃̀. Kù dò mpɑ́íí nwe, kɛ duò tikɔ̃m̀bùɔ̀tì.

¹⁰ A bo ndémɛ̀ Kuyie ndɛɛ̀ tu mɛciì nkó diketírì, bɛ̀ɛ̀ dɔ̀ɔ̀ri mɛmmɛ bɛ̀ mɔ̀kɛ mɛyɛ̀mmɛ̀ mmɛ. Kuyie nhɑ sɑ̃nni bomu nsɑ̃́ɑ̃̀.