Isɔbu 13

¹ Tinti timɔu n tì yɑ̀mu nɛ̀ n nɔ̀nfɛ̀, n tì kèèmu timɔu nɛ̀ n toò kɛ tì bɑntɛ́.

² Di yɛ̃́ tì n tì yɛ̃́mu múnkɛ, di í m pɛ̃ɛ̃tɛ́.

³ Muwɛ̃rímú mumɔu yiɛ̀ nwe mí n nɑ́ɑ́nnɛ̀mɛ̀, n yóó beé nKuyie nku n kpɛti.

⁴ Díndi biɛ di sũ̀ṹ nsiyɑ́ɑ̀bìsí nsi, di tú bɛtɑ̀mbɛ̀ bɛ̀ɛ̀ ciintɛ bɛ̀mbɛ bɛnìtìbɛ̀.

⁵ Kɛ̀ di pètinkɛ do dò nkɑ́rɛ kɛ í bɛ́i ntìmɑtì, bɛnìtìbɛ̀ nɑ ndi wúó mmɛciì nyɛmbɛ̀ mbɛ.

⁶ N tɑti tinɑ́ɑ́mbeéntì nti, kéntɛ́nɛ̀ ti, kéntɛ́nɛ̀ mɛsɑ̀ɑ̀ ntìì yɛ̀tìní n nùù miɛkɛ.

⁷ Di yɛ̀mmɛ̀ dò ndi bo cómmú Kuyie nfɔ̃nkúò nɛ̀ siyɑ́ɑ̀bìsɑ́ɑ̀? Di bo nkù kòḿmú kɛ nɑ́ɑ́ nkɛ soúnnɑ́ɑ̀?

⁸ Di ku nkòḿmúmu mɛmmɑɑ̀? Di nɑ́ɑ́ nkuù kpɛ́ínnɑ́ɑ̀?

⁹ Kɛ̀ kù di wèńtɛ́ kù bo nsɔ̃́ ndi wennɑɑ̀? Di bo nɑ kɛ́ kù soutɛ́ kɛ́ndò ndinititɔùɑ̀?

¹⁰ Kɛ̀ di kù kòḿmú disɔ̀rì, kù í yóó yóu kù bo di potɛ́mɛ̀.

¹¹ Kuyie nkpetì í duò di kɔ̃m̀bùɔ̀tɑ̀ɑ̀? Kufɔ̃wɑɑ́ nyí kù ndi bonɑ̀ɑ̀?

¹² Di tṹṹ nkɛ nɑ́ɑ́ ntì dò mutɑ́pɛí mmu n yììkɛ̀, di n tɛ̃́nnìnko tì dò ntiyɑɑmɑtì nti.

¹³ Cĩ́ɛ̃́kɛ́nɛ̀ bɑ̀mbɑ̀! Yóunɛ̀ kɛ̀ m bɛ́i! Kɛ̀ tìì bo n tuɔ̀kɛní tì n tuɔ̀kɛní!

¹⁴ N cĩnnɛ̀ m buu ndi, kɛ̀ n fòmmu bo n nɔutɛ́ntɛnnì ĩ́nkɛ̀.

¹⁵ Bɑ́ kɛ̀ kù bo n kuɔ, n yó nku mbekɛ́, n yóó kù bɛnkɛmu n yí cɑ̀ɑ̀rɛ̀mɛ̀ dɛ̀mɑrɛ̀.

¹⁶ Dɛɛ̀ pètìnkɛ yó ntú n kó mɛcootímɛ̀, kɛ yɛ̃́ onitiyɛiwe í yóó dɑ́ɑ́tímɛ̀ kɛ́cómmú Kuyie ndiɛkù ììkɛ̀.

¹⁷ Kéntɛ́nɛ̀ n nɑ́ɑǹtì mɛsɑ̀ɑ̀, kɛ̀ n tì ndi wénkùnnɛ kɛ̀ tìi tɑ di to.

¹⁸ M bɑɑti tibeéntì nti, m mɛ nyɛ̃́mu kɛ dò mmíì yó nnɑɑti.

¹⁹ Kɛ̀ kù dɔ́ kɛ́ n sɛnninɛ̀, n yóó yĩ́o yúóó nwe di mmɔ̀nnì kɛ́kú.

²⁰ Kuyie, n dɔ́ ɑ́ n dɔɔ̀ dɛ̀, dɛ̀ bo dɛ̀dɛ́rɛ̀ ndɛ, kɛ̀ n nɑ kɛ́cómmú ɑ ììkɛ̀.

²¹ Bɑ́ nsɔkɛ́ kɛ m puotì, bɑ́ nsɔkɛ́ kɛ donnìnko n kɔ̃m̀bùɔ̀tì.

²² Dɛ kó difɔ̃nkúò ɑ nɛ́ bo nɑ kɛ́bɛ́i kɛ̀ n dɑ tɛ̃́nnɛ́, yoo m bɛ́i nkɑ̀ɑ n cɔ́útɛ́.

²³ N cɑɑ̀rìmɛ̀ bo mɛdɛ nɛ̀ n yetímɛ̀? N nɑ́kɛ́ n cɑ̀kɛ mù nɛ̀ n yetɛ́ dɛ̀?

²⁴ Bɑ nte kɑ̀ɑ m bùtínnɛ́ kɛ n wúó nhɑ dootitɔù?

²⁵ A yó nni mbɛtimu mí nkufɔ̃kpɛ̃rikɑ̀ɑ̀? A bo nni nfɛ̃mmú mí nkumukperíkɑ̀ɑ̀?

²⁶ Dɛ̀ yĩ́mɛ kɑ̀ɑ wɑ̃̀ri tì n kpɛ́í nkɛ̀ tì tu titiiti mɑ́ɑ̀, kɛ n tounko m bíkɛ́mbɛ́ntì kó mɛyɛi?

²⁷ Dɛ̀ dòmmɛ kɑ̀ɑ tɑ́ú n nɑɑ̀cɛ̀i kɛ pɑkíí n cemmu kɛ kɑɑ n nɑcɛ̀fɔ̃̀tɛ̀?

²⁸ N kɔ̃̀ntì pɑ̃̀ɑ̃̀kɛmu, iyɑɑbiɛ ɔ̃ɔ̃ cɑ́ɑ́kɛ́mɛ̀ kuyɑ̀ɑ̀kù.