Esɑii 15

¹ Kuyie nkpɑnnɛ̀ tì Mɔɑbu ɛì kɔbɛ. Kɛyènkɛ̀ kɛ̀mɑ́ɑ̀ ndi bɛ̀ pɔ̀ntɛmɛ̀ Adi-Mɔɑbu ɛì. Kɛyènkɛ̀ kɛ̀mɑ́ɑ̀ ndi bɛ̀ pɔ̀ntɛmɛ̀ Kiidi-Mɔɑbu ɛì kɛ̀ dì dɔúnko.

² Kɛ̀ Bɛti-Dimɔɔ kɔbɛ dekɛ Bɑiti nɛ̀ Dibonni yɛtɔ̀rɛ̀ borɛ̀ kɛ kuɔ̀, Kɛ̀ Mɔɑbu ɛì kɔbɛ kuɔ̀ nNɛbo tɑ̃rì nɛ̀ Mɛdeibɑɑ ɛì, bɛmɔu kɛ̀ bɛ̀ kuó mɛyubii, kɛ kuó bɛ dɛbìi.

³ Dihɛì dimɔu kɛ̀ bɛ̀ dɑ̀ɑ́tí tifɔ̀ɔ̀tɔ̃̀ntì kɛ dò mbɛ̀ kɑ̀ri mukṹṹ. Kɛ̀ bɛ̀ɛ̀ bo dɛdɑ̀nnɛ̀ nɛ̀ yɛtowɑɑrɛ̀ bɛmɔu, kɛ̀ bɛ̀ kuɔ̀ nkɛ ti tinɔnniɛti.

⁴ Kɛ̀ bɛnìtìbɛ̀ kuɔ̀, Ɛsibonni nɛ̀ Edeyɑde ɛkɛ̀ miɛkɛ, kɛ̀ bɛ dɑbùò ntùɔ̀kù Yɑɑsi, dɛɛ̀ te kɛ̀ Mɔɑbu ɛì kó bɛhɑ̃ɑ̃pɔ̀mbɛ̀ wùótí. Kɛ̀ bɛ kɔ̃m̀bùɔ̀tì duò.

⁵ Dɛ̀ n yóùmu mɛdiɛ̀ Mɔɑbu ɛì kɔbɛ kpɛ́í. Bɛ̀ cìɛ́tɛ́mu kɛ cokɛ́ kɛ tùɔ̀kɛnɛ̀ Soɑɑ ɛì nɛ̀ Ekodɑɑ Sedesiɑ kɛ deetì Duti tennì kɛ kɔnti, kɛ wúótí Odonnɑimmu kó kucɛ.

⁶ Kɛ̀ kukó Dimmudimmu kũ̀ṹ, kɛ̀ timútì kpeí, timúsũ̀ũ̀tì tɛ̃́nkɛ í kpɑɑ́, titieti tɛ̃́nkɛ í bo.

⁷ Kɛ̀ bɛ̀ tɔu bɛ kpɛrɛ, bɛ kpɛrɛ dɛ̀ɛ̀ do yentɛ́, kɛ́nkpɑɑ́ kɛ séenko kukó ntitieti bɛ̀ tu tì Sori tì yìɛ̀ dɛ̀.

⁸ Kɛ̀ iwúótìi tuɔ̀kù Mɔɑbu tempɛ̃ nkumɔu. Kɛ̀ yɛkúdɑbùò ndɑ̀ɑ́tí Efɑdɑimmu omɔu, kɛ tùɔ̀kɛnɛ̀ Bɛɛdi Edimmu.

⁹ Kukó Dimɔnni bo píɛ mmɛnitiyĩ̀ĩ̀. Kɛ̀ n yíɛ́ kɛ́ bɛ̀ bɔntɛ́ mɛyɛi ntɛ̃mɛ̀, M bo duɔ́nko dicìrícìrì kɛ̀ dìi pĩ́mmú, Mɔɑbu ɛì kɔbɛ bɛ̀ɛ̀ yentɛ́.