Osee 7

¹ Mɛm̀mɛ kɛ̀ ti Yiɛ̀ nKuyie mbɛ́i nkɛ dɔ̀: N do dɔ́ dìì mɔ̀nnì kɛ́miɛkùnnɛ n nìtìbɛ̀, kɛ́miɛkùnnɛ Isidɑyɛɛribɛ, dɛ mɔ̀nnì ndi, bɛ yɛi nnɛ́ feitɛ́mɛ̀ nɛ̀ Sɑmmɑrii kɔbɛ kó kuyonku. Bɛ kpɛrɛ dɛmɔu do tú mɛsoùmmɛ̀ mmɛ, kɛ̀ bɛyóóbɛ̀ tɑɑ̀ sicɛ̃́ĩ kɛ̀ bɛnitiyɛibɛ firì icɛ.

² Bɑ́ bɛ kóò mɔù yɛ̀mmɛ̀ í ò pɑ̃ kɛ dò n yɛ̃́ bɛ̀ dɔ̀ɔ̀ri mɛ̀ɛ̀ yɛi. Ntɛ bɛ di mmɔ̀nnì kɛ̀ bɛ yɛi mbɛ̀ pĩ, mmɛ̀ feitɛ́mu n yììkɛ̀.

³ Bɛ̀ dɔ̀ɔ̀ri mɛ̀ɛ̀ yɛi mbɛnìtìbɛ̀ kɛ̀ dɛ̀ nɑɑti bɛkpɑ̀ɑ̀tìbɛ̀ kɛ soú bɛnìtìbɛ̀ kɛ̀ dɛ̀ nɑɑti sikpɑ̀ɑ̀tìbìí

⁴ Bɛmɔu bɛ̀ dɔuti dɔutinɛ̀ bɛtɔbɛ̀ mbɛ, bɛ miɛkɛ dònnɛ̀ fɛpɛ̃́ɛ̃̀pṹnnɛ́tofɛ nfɛ bɛ̀ tɔ̀tìnnɛ fɛ̀, kɛ̀ fɛ̀ wũɔ̃tɛ́, kɛ̀ bɛ̀ yóu kɛ tɛ̃́nkɛ í tikii, kɛ bɑɑ̀ tipɛ̃́ɛ̃̀cootì bo múútímɛ̀.

⁵ Dikpɑ̀ɑ̀tìbɑnni yiè kɛ̀ sikpɑ̀ɑ̀tìbìí yɑ̃̀ kɛ́muɔ́, kɛ́duɔ́ mbɛmɑ́ɑ̀ bɛnitiyɛibɛ.

⁶ Kɛ̀ bɛ̀ dɔ́ kɛ́bɔ nhokpɑ̀ɑ̀tì, bɛ̀ ɔ̃ ntonnì fɛpɛ̃́ɛ̃̀pṹnnɛ́tofɛ kɔ̃mɛ mmɛ, kɛyènkɛ̀ kɛ níí bonkɛ, dikṹnweńnì kɛ́cɔ́útɛ́ mɛdiɛ̀,

⁷ kɛ́cɔ́útɛ́ fɛpɛ̃́ɛ̃̀pṹnnɛ́tofɛ kɔ̃mɛ kɛ́tuɔ mbɛ̀ɛ̀ bɛ̀ ni, kɛ̀ bɛkpɑ̀ɑ̀tìbɛ̀ duò bɛmɑ́ɑ̀ bɛmɑ́ɑ̀. Òmɔù mɛ nyí n kuɔ̀nnɛ̀.

⁸ Isidɑyɛɛribɛ kɔɔrɛnɛ̀ ibotí tɛì nyi, kɛ sɑ̃̀ɑ̃́tɛ́nɛ̀ kupɛ̃́mpɛ̃ńkù bɛ̀ í pèe nkù.

⁹ Kɛ̀ bɛpɔ̀ɔ̀bɛ̀ dèu bɛ wɛ̃rímú bɑ́ bɛ̀ í yɛ̃́, kɛ̀ tiyùpɛ́ítì ketɛ́ bɛ yɔ ĩ́nkɛ̀ bɑ́ bɛ̀ í dɑkɛ.

¹⁰ Isidɑyɛɛribɛ fentɛ̀ tɛɛ̀ nɑ̀kɛ́ bɛ kpɛ́í. Bɛ̀ mɛ nyí wɛ̃̀tɛní mí mbɛ Yiɛ̀ nKuyie m borɛ̀. Bɑ́ nɛ̀ tìì kó dimɑ̀ɑ̀ bɛ̀ tùɔ̀kɛní ti miɛkɛ, bɛ̀ í n wɑmmú.

¹¹ Isidɑyɛɛribɛ yɛimmu kɛ dònnɛ̀ dikpɛtìnɔ́nkperi, bɛ̀ í mɔkɛ mɛyɛ̀mmɛ̀ bɛ̀ kɔ̀tɛ Esibiti nwe nɛ̀ Asidii kɛ wɑnti mɛteèmmɛ̀.

¹² Kɛ̀ bɛ̀ dɔ́ bɛ̀ɛ cuó nkɛ̀ɛ̀ bíɛ́kɛ̀, m bo bɛ̀ bɔntɛ́ ticùɔ̀tì, kɛ̀ tìì bɛ̀ pĩ ntinɔ̀tì kɔ̃mɛ, kɛ̀ m bɛ̀ tié mbɛ̀ dɔ̀ɔ̀ mɛ̀ɛ̀ yɛi nkpɛ́í.

¹³ Di bo yɑ̀ díndi Isidɑyɛɛribɛ, di í mɛ ndɔ́mɛ̀ kɛ n tɔ́ɔ́nnɛ̀, di mɛ̀ nyetɛmɛ̀ n kpɛti, di kó dihɛì bo dɔúnko. Di yɛ̀mmɛ̀ dò ndi bo nni soú nkɛ̀ n di dɛɛtɑ́ɑ̀?

¹⁴ Di í n kuɔ̀nnɛ̀ di yɛ̀mmɛ̀ mɛmɔu, di ɔ̃ nkuɔ̀ nkɛ mítírì di dúɔ̀ ĩ́nkɛ̀ kɛ yɔ́ú dimɑ́ɑ̀, kɛ dɔ́ tidiitì nti nɛ̀ mɛnɑɑ̀, di í dɔ́ n kpɛti.

¹⁵ Míì do di tiè nkɛ di duɔ̀ mmuwɛ̃rímú, nɛ̀ mɛmmɛ kɛ̀ di dɔ́ kɛ́ndɔɔ̀ mɛyɛi.

¹⁶ Di wɛ̃tiní Bɑɑdi borɛ̀ ndɛ, dɛ̀ í tú m borɛ̀ di dònnɛ̀ mutɑ̃mmù mùù kèétɛ́ mùmmu kɛ díí, bɛ̀ yóó kuɔ di kó bɛkpɑ̀ɑ̀tìbɛ̀ nɛ̀ yɛsè nyɛ, tinɑ́ɑ́nyɛiti di n nɑ̀kɛ́ tì kpɛ́í, bɛ̀ bo di dɑɑ́ Esibiti ɛì miɛkɛ.