Mɛborimɛ Wɛ́ìtì 1

¹ Dɑfiti birɛ mɛborimɛ wéìtì Sedisɑdɛmmu kóo kpɑ̀ɑ̀tì nɑ̀kɛ́ tì mɛborimɛ ĩ́nkɛ̀.

² Mí mmɛborimɛ wéìtì kɛ̀ m bɛ́i nkɛ dɔ̀: Mɛborimɛ yóùmu mɛ̀ í dò nkɛ́bɑntɛ́ bɑ́ sɑ́m̀pɔ́.

³ Mutɔ̃mmú onìtì pĩ mmù kɛtenkɛ̀ ĩ́nkɛ̀, mu kó mucɔ̃́ntimu tú ɔ̃̀mmu?

⁴ Ku ndɑpùntɔ̃nkù ɔ̃ɔ̃ pɛ̃ɛ̃tɛ́, kɛ̀ kundɑpùntɔ̃nkù tɛkùu yɛ̀nní, kɛ̀ kɛtenkɛ̀ bɑɑ bo.

⁵ Diyiè ɔ̃ɔ̃ yɛ̀nní kɛ́kɔtɛ kɛ́tɑ, kɛ́ndɔ́ mɛcɑ̃ɑ̃ nkɛ bo wɛ̃tɛ dì yiɛ̀ní kɛ̀.

⁶ Kuyɑɑkù ɔ̃ɔ̃ ítɛ́ diyiè yìɛ̀ní kɛ̀, kɛ́nfũũtɛ kɛ fiti kubɑkù cɑ̃̀nku kɛ́nfiti, kɛ wɛ̃ti kɛ bo kétɛ́ní kù ìtɛ́ní kɛ̀.

⁷ Ikó nyimɔu pũɔ̃̀ nkɛ tɑɑ̀ dɑ̀mɛ́ɛ̀rì nwe, ò mɛ nyí piɛku, kɛ̀ ì bɑɑ pũɔ̃̀ nkoò tɑɑ̀, kɛ wĩɛ̃ti ì yɛ̀nní kɛ̀.

⁸ Bɑ́ dɛ̀ dɛ tɔ̃mmú í mɔkɛ kumɑ̀nku, onìtì bɑ́ɑ́ nɑ kɛ́nɑ́kɛ́ kɛ́deè. Fɛnɔ̀nfɛ̀ í diɛ̀ mmuwéìmù, ditoò mɛ̀ nyí diɛ̀ mmukeèmù.

⁹ Dɛ̀ɛ̀ bɑɑ do bo dɛɛ̀ yó mbo, dɛ̀ɛ̀ do dɔ̀ɔ̀ dɛɛ̀ yóó dɔɔ̀. Dɛ̀mɑrɛ̀ í tú dɛpɑ̀nnɛ̀ kɛtenkɛ̀ ĩ́nkɛ̀.

¹⁰ A bo yɑ̀ dɛ̀ kɛ dɔ̀: Wúó! N yɑ̀ dɛ̀mɑrɛ̀ pɑ̀nnɛ̀! Dɛ̀ yó mbo kɛ̀ ti mu nyí bo.

¹¹ Bɛ̀ ɔ̃ɔ̃ í nkpɑɑ́ yɛ̃́ bɛ̀ɛ̀ pɛ̃ɛ̃tɛ́ bɛ kpɛ́í, bɛ̀ɛ̀ bo tũnnɛní bɛ̀ í yóó nkpɑɑ́ yɛ̃́ bɛ̀ɛ̀ bɛ̀ tũ̀nní bɛ kpɛ́í.

¹² Mí mmɛborimɛ wéìtì n nɑɑ́mmu Isidɑyɛɛribɛ kóo kpɑ̀ɑ̀tì, kɛ́mbo Sedisɑdɛmmu,

¹³ kɛ́duɔ́ n yɛ̀mmɛ̀ kɛ́wɑmmú, kɛ́fiɛ́ nɛ̀ n yɛ̀mmɛ̀ kɛ bo bɑntɛ́ dɛ̀ɛ̀ dɔ̀ɔ̀ri kɛtenkɛ̀ ĩ́nkɛ̀. Mutɔ̃nyonkumu mmu, Kuyie nduɔ́ mmù onìtì kòò bo mmù pĩ.

¹⁴ Kɛ̀ n wénní mutɔ̃mmú mùù kó dimɑ̀ɑ̀ dɔ̀ɔ̀ri kɛtenkɛ̀ ĩ́nkɛ̀, kɛ́nsɔ̃́ ndɛmɔu dɛ̀ í dò nkɛ́bɑntɛ́, dɛ̀ í cɑ̃́ɑ̃́nnɛ̀ ɑ bo ndɔ́mɛ̀ kɛ́kpɑɑkɛ kuyɑɑkù.

¹⁵ Bɛ̀ ɔ̃ í nnɑ kɛ́sɛ́i ndɛ̀ɛ̀ kɔ̀ḿmú bɛ̀ mɛ nhɔ̃ í nkɑ̀ɑ ndɛ̀ɛ̀ kpɑ.

¹⁶ Nɛ̀ n yɛ̀mmɛ̀ miɛkɛ kɛ̀ n dɔ̀: M mɛ̀ nwɑmmúmɛ̀ kɛ yìɛ́ mɛciì pɛ́u kɛ pɛ̃ɛ̃tɛ́ bɛ̀ɛ̀ n niitɛ́nɛ̀ kɛ di tikpɑ̀tì Sedisɑdɛmmu miɛkɛ, kɛ̀ n yɑ̀ n yĩ́ɛ̃́tɛ́mɛ̀ mɛborimɛ pɛ́u, kɛ mɔ̀ɔ̀tɛ mɛciì mmɛmɔu.

¹⁷ Kɛ duɔ́ n yɛ̀mmɛ̀ kɛ bo bɑtɛ dɛ̀ɛ̀ tu mɛciì nkpɛrɛ, nɛ̀ dɛ̀ɛ̀ tu dɛyɛìnkpɛrɛ, nɛ̀ dɛ̀ɛ̀ tu dɛwɑ́ɑ́tɛ́kpɛrɛ. Kɛ sɔ̃́ ndɛndɛ kó dimɑ̀ɑ̀ í cɑ̃́ɑ̃́nnɛ̀ ɑ bo ndɔ́mɛ̀ kɛ́kpɑɑkɛ kuyɑɑkù.

¹⁸ Kɑ̀ɑ mɔ̀kɛ mɛciì mmɛdiɛ̀ nhɑ fɛ̃́ṹtímɛ̀ ɔ̃ ndɛumu, kɑ̀ɑ yĩ́ɛ̃́tìmɛ̀ dɛukɛ ɑ yìɛ́ ɑmɑ́ɑ̀ ndi mɛhɑ́ɑ́rìmɛ̀.