MATAIO 4

1 Earua Iesu abo i woeai barabara eai, diabolo ia bena i nohoi. 2 Asubena tataoâlabuiâseâmate eo maiona tataoâlabuiâseâmate i aiudi, abo i guriam. 3 Taunoho wa abo i laoma ia arinai i ene, “Ena oa Eaubada Natuna, teina we’u ta u heribadi abo se hemala areto." 4 I ribalau i ene, “Se uriyao si ene, ‘Tau taba nige areto eai mo i mauri, na riba gamagamagari eai hinage Eaubada awana eai se laoma.’” (Deu. 8.3). 5 Diabolo ia abo i woeai i laei eanua tabuna eai, i hetoro dubu lailai isu saesaena eai, 6 abo i heriba i ene, “Ena oa Eaubada Natuna, hage u gabodobem; doha se uriyao si ene, ‘Ena aneru i hetorodi se itawataim;’ eo ‘Nimadi eai abo se abiisinim, ata aem u hetupanei we’u eai.’” (Psa. 9.11, 12). 7 Iesu abo i ribalau i ene, “Hinage se uriyao si ene, ‘Guiau em Eaubada tabu u nohoi.’" 8 Hinage diabolo ia abo i woeai i laei oea tupi lohalohaâaririna eai, tanoubu basileia gamagamagari ia i heita, itaitadi se lolo ariri; 9 na i heriba i ene, “Teina ginauri gamagamagari ta abo ea lediwa, ena u tabaohuiguma, u aihelahuigu." 10 Iesu abo i ribalau ia arinai i ene, “Satani e, u lausuara! se uriyao si ene, ‘Guiau em Eaubada iabom taba u aihelahui mo, ia iabom u heaeaiei ede.’" 11 Arinai abo diabolo ia i laugabaei, abotai aneru se laoma se bobodiei. 12 Iesu wasa i ataiei Ioane se toai se laei numamasigiri eai, abo i torohai i lau Galilaia; 13 Nasareta i laugabaei i laoma Kaperanauma eai ie mia, gabogabo hasarina eai, Sebulona eo Napatali edi oea sigasigadi eai, 14 bena riba Isaia peroveta i ribaei abo se lauhetubu, i ene ina doha: 15 “Sebulona oeana eo Napatali oeana, teha gabogabo, Ioridano hari tehana eai, Galilaia, Murimuriâtataodi enadi wa: 16 tatao, masigiri boeana eai se babawa, marana lailai se ita, isi hinage mate tehana eai se bawa, eo mate loguloguna eai, aridi eai mara i iuyari." 17 Nei huiana ne Iesu i lauguguia hetubu, i ene, “Nuamiu au buidi, paana galewa basileiana ede i hanahanaumao." 18 Iesu i tautausi Galilaia gabogabona hasarina eai, tataoyao labui i itadi, esau Simona, iaede esana se ribaei Petero, eo ena tau Anederea, hiana se galaei gabogabo eai; paana isi tauyamayama. 19 I heribadi i ene, “Au hemuriwataiguma, abo ea hetoromiu au hemala tauyama, tatao abo au aitoa." 20 Maesega edi hiana se laugabaedi, ia se lauwatai. 21 Abo i laulau e, tau esau maena doga ie itadi, Iamesi Sebedaio natuna, eo ena tau Ioane, taudi labui ma tamadi, isi waga eai, edi hiana se eoma, na i eogaidi. 22 Maesega edi waga eo tamadi wa se laugabaedi, ia se lauwatai. 23 Iesu Galilaia i lauhetaiiri, edi sunago alodi eai i laulauheata, basileia evaneliana i lauguguiai, tauaiaiiwala gamagamagari hinage tatao boeadi eai, i hemauridi. 24 Arinai ia wasana i tadada i lau e Suria i hetaiiri, tauâasiasiebo gamagamagari, eo headi hari iwala, hari amamna, se hearodi se woeaidima ia arinai to i hemauridi. 25 Moutuadi lailai ia se lauwatai, Galilaia eai se laoma, eo Ierusalema hinage, eo Iudea, eo Ioridano hari teha eai.