भजन संग्रह 6
WBT1 परमप्रभु यावे, गे आं कली तशा गाइक्ताक्नी हना यो, सजाइ मगेयीनी। गे गाइक्ताक्नी हना यो, आं कली श्येत मगेयीनी। येरमीया १०:२४ 2 परमप्रभु यावे, गे आं कली शिशी पने। मारदे हना गो बेक्चा चिक्शो बाक्नुङ। गे आं कली सापाइय्यीनी। मारदे हना आं खोइली ख्रिंख्रि पाइब। 3 मिनु आं थुं यो हिंशो बाक्ब। परमप्रभु यावे, गे गेना सम्म आं कली मोदेंशो पा बाक्पाइक्नीनी? 4 परमप्रभु यावे, गे आं गे लेतीने। इन गेना हना यो दाक्तीकेमी आं थुं बेक्चा रे प्रोंइयीनी। 5 मारदे हना बेक्शो नोले सुइ मुरुमी इन कली ममिम्नीम। मिनु बेक्शो मुर आन बाक्तीकेमी सुइमी इन कली ठेयब मसेल्नीमी। भजन संग्रह ३०:१०; भजन संग्रह ८८:११; भजन संग्रह ११५:१७-१८; यसैया ३८:१८ 6 गो थुं खाइश्शा, ङाक्शा दती। गो नाक्दो आं खाट नेल्ल प्रेक्कुमी जिप्पाइक्नुङ। आं इप्तीकेमी ङाक्शा ला बाक्नुङ। 7 सुर्ता पतीके मिक्च मताइब खोदेंशो दुम्ती। मारदे हना आं जोरी सत्रु शुश बाक्नीम। 8 गे मरिम्शो पाइबपुकी, आं क्येङा ङोन लने। मारदे हना परमप्रभु यावेमी आं ङाक्शो नेंतु। 9 परमप्रभु यावेमी आं पुंइशो लोव़ नेंतु। मिनु परमप्रभु यावेमी आं पुंइशो गेब। 10 आं जोरी सत्रु नेल्ल मुने दोक्शा, शुश श्येत जाइब दुम्नीम। मिनु मुने दोक्शा, आन बाक्तीके लेत्नीम।