ಯುದ 1

1 ಯೆಸು ಕ್ರಿಸ್ತನೊ ಸೆವಕ ಯಾಕೊಬ್ನೊ ಭೈ ಥಯಲ ಯುದನ ಕ್ಹುದಾಕ್ಹು ಬಲಾಯಲವಾಲಾ ಬಾ ಥಯಲ ಕ್ಹುದಾನೆ ಮಯಾನಾ ಥಯಲ ಯೆಸು ಕ್ರಿಸ್ತಮಾ ಚೊ಼ಕಿತರಾ ರ‍್ಹಯಲವಾಲಾವೊನಾ ಹುತಿ ಬರ್ದಾನು ಪತ್ರ. 2 ತುಮೊನೆ ಮರ್ಗಾ, ಶಾಂತಿ ವರಿ ಮಯಾ ಜಾಸ್ತಿ ಥಾವಾದೆ. 3 ಮಯಾನಾ ದೊಸ್ತೊ, ಅಪೆ ಕ್ಹಾರಾ ವಾಟಿಲಿವಾನಿ ಮರ್ಗಾನಾ ಹುತಿ ತುಮೊನೆ ಬರ್ದು ಕೈನ ಮಿ ಘನ್ನೊ ಆಸ ಕರ‍್ಯೊತೊ.ತೆ ನೈಸೊ ವರಿ ಯಕ್ಕ ವಿಶಯನಾ ಹುತಿ ಮಿ ಬರ್ದಾನು ಜರುರತ್ತ ಛೆ ಕೈನ ಛೆ ಕೈನ ತಿಳದಿಲಿದ್ಯೊ. ಕ್ಹುದಾ ತಿನಾ ಪರಿಶುದ್ಧ ಮನಕ್ಹೊನೆ ದಿದಲ ಬರೊಕ್ಹಾನಾ ಹುತಿ ತುಮೆ ಪ್ರಯಾಸ ಪಡ್ದಿನ ಹೊರಾಡಾನಾ ಲಿಂಗತ ಮಿ ತುಮೊನೆ ಪ್ರೊತ್ಸಾಹ ಕರಾನಾ ಹುತಿ ಮನಸ ಕರುಸ. ಕ್ಹುದಾ ಅಪೊನೆ ಬರೊಕ್ಹೊ ಯಕ್ಕಸಲಾ ದಿದ್ಯೊಸ. ತೆ ಕ್ಹಾರಾ ಕಾಲಮಾಬಿ ಚೊ಼ಕು ಛೆ. 4 ದಕ್ಹಾ ಜ಼ನಾ ಮನಕ್ಹೊ ಗ್ವತ್ತವಾಚಿ ತುಮಾರಿ ಸಬೆಮಾ ಆಯಾಸ. ಇವ್ನೊನೆ ಥಾವಾನಿ ಶಿಕ್ಷಾನಾ ಹುತಿ ಘನ್ನಾ ದಿನ್ನಾ ಪಾಚಾ಼ಜ಼ ಪ್ರವಾದಿಯೊ ಬರ್ದ್ಯಾಸ. ಎ ಮನಕ್ಹೊ ಕ್ಹುದಾನಾ ವಿರುದ್ದ ಥಯಾಸ.ತ್ಯುನೆ ಪಾಪನಾ ಕಾಮೊ ಕರಾನಾ ಹುತಿ ಅಪ್ನಾ ಕ್ಹುದಾನಿ ಮರ್ಗಾನಿ ನೈವಾ ಕರ್ಲಿನ ತ್ಯುನೆ ಅಪ್ನೊ ಯಕ್ಕಜ಼ ಮಾಲಕ ಥಯಲ ವರಿ ಪ್ರಭು ಥಯಲ ಯೆಸು ಕ್ರಿಸ್ತನಾ ಪಾಚಾ಼ ಆವಾಲಾ ಥಯಾಸ. 5 ತುಮೆ ಕ್ಹಾರುಜ಼ ತಿಳದಿಲಿದಲ ದಕ್ಹಾ ವಿಚಾರೊ ಶೆ ಕರ್ಲಿವಾನೆ ಮಿ ತುಮೊನೆ ಮದತ ಕರಾನೆ ಆಸ ಕರುಸ. ಪ್ರಾಬು ತಿನಾ ಮನಕ್ಹೊನೆ ಇಜಿಪ್ತ ದೆಶತೊ ಲೈನ ತ್ಯುನೊನೆ ವಚಾ಼ಡಲ ಶೆ ಕರ್ಲಿವೊ. ತೆಳಾಮಾಜ಼ ಬರೊಕ್ಹೊ ನೈಸೊವಾಲಾ ಮನಕ್ಹೊನ ನಾಶ ಕರಿಪಾಡ್ಯೊ. 6 ದೆವದುತೊ ಅದಿಕಾರ ವ್ಹಂದ್ಯಾತಬಿ ತೆ ವಚಾ಼ಡಿಲಿದ್ಯಾವಾಚಿ ಸ್ವಂತ ರ‍್ಹಯಲ ಜ಼ಗಾ ‍ಚೊಡಿನ ಗಯಲ ಶೆ ಕರೊ. ತಿನಾಹುತಿ ಪ್ರಭು ತೆ ದೆವದೊತೊನೆ ಅಂದಕಾರಮಾ ಮ್ಹೆಲ್ಯೊ. ತ್ಯುನೊನೆ ಹಮೆಶಾಬಿ ಬೆಡಿಯೊಮಾ ಭಾಂದಿನ ಮ್ಹೆಲ್ಯೊ.ಮ್ಹೊಟಾ ದಿನ್ನ ದಿನ್ನೆ ತ್ಯೊನೊನೆ ಫಸ್ಒ ಥಾವಾನಾ ಹುತಿ ತ್ಯಾ ಮ್ಹೆಲ್ಯೊ. 7 ಸೊದಮ ವರಿ ಗೊಮುರ ಗಾಮೊನೆ ತ್ಯುನಾ ಆಜು಼ ಬಾಜು಼ ರ‍್ಹಯಲ ಗಾಮನೆ ಶೆ ಕರ್ಲಿವೊ. ತೆ ಕ್ಹಾರು ತೆ ದೆವದುತನಿಂಗತ ಥಯಾ. ತೆ ಗಾಮೊಮಾ ಲೈಂಗಿಕ ಪಾಪೊ ವರಿ ಕೆಟ್ಟ ಕಾಮೊ ಭರಿಗಯಾತಾ. ತ್ಯುನೆ ಹಮೆಶಾನಿ ಆಗಮಾ ತ್ರಾಸ ಖಾತಾ ರ‍್ಹವಸ. ತ್ಯುನೊನೆ ದಿದಲ ಶಿಕ್ಷಾ ಅಪೊನೆ ಅಪೆ ಶಿಕ್ಕಿಯೆಸ. 8 ತುಮಾರಿ ಸಭೆಮಾ ಆವಾಲಾ ಮನಕ್ಹೊನೆ ಇನಾಲಿಂಗತಜ಼ ಥಾವಸ. ತ್ಯುನಾ ಕ್ಹಪ್ನೊಜ಼ ತ್ಯುನೊನೆ ವಾಟ ಥಾವಸ. ತ್ಯುನಾ ಪಾಪೊಕ್ಹುಜ಼ ತ್ಯುನೊನೆಜ಼ ವ್ಹಲಸ ಕರ್ಲಿವಸ. ತ್ಯುನೆ ಪ್ರಭುನೊ ಅದಿಕಾರನೆ ತಿರಸ್ಕಾರ ಕರ್ಲಿವಸ. ತಾಕತವರ ರ‍್ಹಯಲ ದೆವದುತೊನಾ ವಿರುದ್ದ ಕೆಟ್ಟ ವಾತೊ ಬೊಲಸ. 9 ಮ್ಹೊಟೊ ದೆವದುತ ರ‍್ಹಯಲ ಮಿಕಾಯಲಜ಼ ಖುದ್ದ ಇಮ್ಮ ಕರ‍್ಯೊ ನೈ. ಮೊಶೆನು ಮರಲ ಅಂಗ ಕಿನೆ ಮಳು ಕೈನ ಮಿಕಾಯೆಲ ಸೈತಾನನಾ ಹುತಿ ದೊಷಣೆ ಕರಾನೆ ಧೈರ್ಯಕರ‍್ಯಾವಾಚಿ" ಪ್ರಭುಜ಼ ತುನೆ ಶಿಕ್ಷಾ ದಿವಸ “ಕೈನ ಕದ್ಯೊ. 10 ತೆನೈಸೊ ಎ ಮನಕ್ಹೊ ನೈ ಕಳಲನೆ ಟಿಕಾ ಕರಸ ತ್ಯುನೊನೆ ದಕ್ಹುಜ಼ ಗ್ವತ್ತ ಥಾವಸ. ತೆನೈಸೊ ಗ್ಯಾನ ನೈಸೊ ಪ್ರಾಣಿಯೊ ಲಿಂಗತ ಸಹಜ಼ ಪ್ರವೃತ್ತಿಕ್ಹು ಕಳೈಲಿವಸ ಯಕ್ಕಜ಼ ಮನಸಕ್ಹು ಕಳೈಲೆತಾ ನೈ. ಎಜ಼ ತ್ಯುನೊನೆ ಹಾಳ ಕರಸ. 11 ತ್ಯುನೊನೆ ಕೆಟ್ಟ ಪರಸ್ತಿಥಿ ಆವಸ. ಎ ಮನಕ್ಹೊ ಕಾಯಿನ ಚಾ಼ಲಲ ವಾಟ್ಮಾಜ಼ ಚಾ಼ಲಸ. ತ್ಯುನೆ ಆಸ್ತಿ ಗಳ್ಸಾನಾ ಹುತಿ ಬಿಳಾಮನನಿ ವಾಟ್ಮಾ ಚಾ಼ಲಾನೆ ತ್ಯುನಾಕ್ಹು ತ್ಯುನೊನೆ ವಪ್ಸಿನ ದಿದ್ಯಾಸ. ಕೊರಹನ ಕರಲಲಿಂಗತಜ಼ ಕ್ಹುದಾನಾ ವಿರುದ್ದ ಹೊರಾಡ್ಯಾಡ್ಯಾಸ. ತ್ಯುನೆ ಕ್ಹಾರಾ ಕೊರಹಲಿಂಗತ ಹಾಳಥಾವಸ. 12 ತುಮಾರಾ ಅನ್ಯುನೆತೆನಾ ಭೊಜನಮಾ ಎ ಮನಕ್ಹೊ ಡುಬಿ ಗಯಲ ದಗ್ಡಾವೊಲಿಂಗತ ಛೆ. ತ್ಯುನೆ ಭೆ ನೈಸೊ ತುಮಾರಾ ಕ್ಹಾತೆ ಕವಾಡ್ಯಾಸ. ತ್ಯುನೆ ಖುದ್ದನಾ ಹುತಿಜ಼ ಚಿಂತಾ ಕರಾಲಾ ಕುರಬುರ‍್ಯಾ ಥಯಾಸ. ತ್ಯುನೆ ಪಾನಿ ನೈಸೊ ಮ್ಹಾಡಲಿಂಗತ ಥಯಾಸ. ವಾರೊ ತೆ ಮ್ಹಾಡನೆ ತಿನಾ ಕ್ಹಾತೆ ಲಿನ ಗೈಪಡಸ. ತ್ಯುನೆ ಕಯಾ ಟೈಮ್ಮಾ ಫಲ ದ್ಯು ತೆ ಕಾಲಮಾ ಫಲ ದಿದ್ಯಾವಾಚಿ ಬೆರ ಕ್ಹಮಾತಾಜ಼ ಕಿತೈನ ಪಡಲ ಝಾಡೊಲಿಂಗತ ಛೆ. 13 ಇವ್ನೆ ಸಮುಂದರಮಾ ರ‍್ಹಯಲ ಧಡ್ಕಿಯೊ ಲಿಂಗತ ಛೆ. ಎ ಧಡ್ಕಿಮಾತು ಆವಾನು ಬುರುಕ ಲಿಂಗತ ಇವ್ನೆ ಸರಮ ನೈಸೊ ಕಾಮೊ ಕರಾಡಾಸ. ಎ ಮನಕ್ಹೊ ಹಬಾಳಮಾ ಫರಾನಿಯೊ ಚಿಕ್ಕಿಯೊ ಲಿಂಗತ ಛೆ. ತ್ಯುನಾಹುತಿ ಹಮಾಶಾಬಿ ಅಂದಾರಾ ರ‍್ಹವಾನಿ ಜ಼ಗಾಮಾಜ಼ ರ‍್ಹವಾಲಗಾಡಸ. 14 ಆದಾಮತೊ ಕ್ಹಾತ್ವಾ ಮಾತಾನೊ ರ‍್ಹಯಲ ಹನೊಕ ಎ ಮನಕ್ಹೊನಾ ಹುತಿ ಅಮ್ಮ ಕದ್ಯೊಸ; “ದೆಕೊ, ಲಾಕೊಶಿ ತಿನಾ ಪರಿಶುದ್ಧ ದುತೊನಾ ಕ್ಹಾತೆ ಆವಾಡ್ಯೊಸ. 15 ಪ್ರಭು ಹರಿಯಕ್ಲಾನೆ ಫೈಸಲೊ ಕರಸ. ಭಕ್ತಿಮಾ ಕಮಿ ರ‍್ಹಯಲವಾಲಾ ತಿನಾ ವಿರುದ್ದ ಕರಲ ಕ್ಹಾರಾ ಕೆಟ್ಟ ಕಾಮೊ ವರಿ ಪಾಪಿಯೊ ತಿನಾ ವಿರುದ್ದ ಬೊಲಲ ಕ್ಹಾರಿ ವಾತೊ ಖಂಡ್ಸಾನೆ ತೆ ಆವಾಡ್ಯೊಸ. 16 ಎ ದುರ್ಭೊದಕೊ ಗುಣ ಗುಟ್ಟಾಲಾ ತಪ್ಪ ಹುಡ್ಕಾಲಾ ಕೆಟ್ಟ ಆಸಮಾ ಪಡಲವಾಲಾ ಮಿ ವ್ಹೈ ಕೈನ ಕವಾಲಾ ಮ್ಹೊಡು ದೆಕಿನ ಬೊಲಾಲಾ ಥಯಾಸ. 17 ಮಯಾನಾ ದೊಸ್ತೊ, ಅಪ್ನಾ ಪ್ರಭು ಯೆಸು ಕ್ರಿಸ್ತನಾ ಅಪೊಸ್ತಲೊ ಪೈಲಾ ಸು ಕದ್ಯಾತಾ ಕೈನ ಶೆ ಕರಿಲಿವೊ. 18 ಅಪೊಸ್ತಲೊ ತುಮೊನೆ, ಅಂತ್ಯಕಾಲಮಾ ಕ್ಹುದಾನಾ ಹುತಿ ಅಕ್ಹಾಲಾ ಮನಕ್ಹೊ ರ‍್ಹವಸ ಕೈನ ಕದ್ಯಾ ಎ ಮನಕ್ಹೊ ತ್ಯುನಾ ಮನಸೆ ಆಯಲ ತಿಮ್ಮಜ ವರಿ ಕ್ಹುದಾನಾ ವಿರುದ್ದ ರ‍್ಹಯಲ ಕರಾಲಾ ಥಯಾಸ. 19 ಎ ಮನಕ್ಹೊ ತುಮೊಮಾ ಭೆದ ಹುಟ್ಸಾವಸ.ಎ ಮನಕ್ಹೊ ತ್ಯುನಿಯೊ ಪಾಪನಿಯೊ ಚಾಳಿಯೊ ನಿಂಗತ ಯಕ್ಕಜ಼ ಕರಸ.ತ್ಯುನೊಮಾ ಪವಿತ್ರ ಆತ್ಮಾ ನತ್ತಿ. 20 ತೆ ನೈಸೊ ಮಯಾನಾ ಭಾಯೊ, ತುಮೊಮಾ ರ‍್ಹಯಲ ಪರಿಶುದ್ದ ಬರೊಕ್ಹಾನಾ ಮುಲಕ ಪವಿತ್ರ ಆತ್ಮಾ ಭರಿತ ಥೈನ ಪ್ರಾಥನಾ ಕರೊ. 21 ಹಮೆಶಾನಾ ಜ಼ಲಮನಾ ಹುತಿ ಅಪ್ನೊ ಕರ್ತಾ ಥಯಲ ಯೆಸು ಕ್ರಿಸ್ತನಿ ಮರ್ಗಾ ದೆಕ್ತಾ ತುಮೊನೆ ಕ್ಹುದಾನಿ ಮಯಾಮಾ ವಚಾಡಿಲಿವೊ. 22 ಶಕ್ಕ ರ‍್ಹಯಲ ಮನಕ್ಹೊನೆ ಮರ್ಗೊ. 23 ಬಿಜಾ಼ ಮನಕ್ಹೊನೆ ವಚಾ಼ಡೊ. ತೆ ಮನಕ್ಹೊನೆ ಆಗಮಾತಾ ಭಾರಾ ಲಾವೊ. ತುಮೆ ದಕ್ಹಾ ಮನಕ್ಹೊನೆ ಮರ್ಗಾ ದೆಕಡತಾಮಾ ಹುಷಾರಕ್ಹು ಪಾಪೊಕ್ಹು ರಾಡಿ ಥಯಲ ತ್ಯುನಾ ವಣ್ಣಾವೊನೆಬಿ ದುಶ್ಮನಿ ಕರೊ. 24 ತೆ ತಾಕತವರ ಥಯೊಸ. ತುಮೆ ಪಡೆನೈಸೊ ತೆ ತುಮೊನೆ ಮದದತ ಕರಸ. ತೆ ತುಮೊಮಾ ಸುಜ಼ ತಪ್ಪ ನೈಸೊ ಕರಿನ ತಿನಿ ಮಹಿಮಾನಿ ಸನ್ನಿಧಿಮಾ ಲಾವಾನೆ ತುಮೊನೆ ಘನ್ನಿ ಮ್ಹೊಟಿ ಖುಶಿ ದಿವಾನೆ ಶಕ್ತ ಥಯೊಸ. 25 ತೆಜ಼ ಯಕ್ಲೊ ಕ್ಹುದಾ ವ್ಹೈ. ಅಪೊನೆ ವಚಾ಼ಡಾಲೊ ವ್ಹೈ. ಆದಿಮಾ ರ‍್ಹಯಲ ಲಿಂಗತಜ಼ ಹಮ್ನಾಬಿ ವರಿ ಅಗೊಬಿ ಹಮೆಶಾಬಿ ಅಪ್ನೊ ಪ್ರಭು ಥಯಲ ಯೆಸು ಕ್ರಿಸ್ತನಾ ಮುಲಕ ತಿನೆ ಪ್ರಭಾವ, ಮಹತ್ವ, ಆಧಿಪತ್ಯ ವರಿ ಅದಿಕಾರೊ ರ‍್ಹವಾದೆ. ಆಮೆನ.