ಕೊಲೆಸ್ಸೆ 1

1 ಕ್ಹುದಾ ತಿನಾ ಚಿತ್ತಾನಾ ಅನುಸಾರ ಯೆಸುಕ್ರಿಸ್ತನೊ ಅಪೊಸ್ತಲ ಥಯಲ ಪೌಲಾ ವರಿ ಭೈ ಥಯಲ ತಿತಾ ಬರ್ದಲ ಪತ್ರ. 2 ಕೊಲೆಸ್ಸಮಾ ರ‍್ಹಯಲ ಕ್ಹುದಾನಾ ಮನಕ್ಹೊನೆ ಕದ್ಯಾಮ ಕ್ರಿಸ್ತಮಾ ಬರೊಕ್ಹೊವಾಲಾ ವರಿ ಪವಿತ್ರ ಥಯಲ ಭಾಯೊ, ಭೆನೊನೆ ಮಿ ಎ ಪತ್ರ ಮಾರೊ ಭಯ ಥಯಲ ತಿಮೊಥಿನಾ ಕ್ಹಾತೆ ಮಳಿನ ಬರ್ದಾಡ್ಯೊಸ. ಮಾರೊ ಬಾ ಥಯಲ ಕ್ಹುದಾಕ್ಹು ತಮೊನೆ ಮರಗಾ,ಶಾಂತಿ ಮಳಾದೆ. 3 ಹಮೆ ಪ್ರಾರ್ಥನಾ ಕರ್ತಾಮ್ಮಾ ತಮಾರಾ ವಿಷಯಮ್ಮಾ ಕ್ಹುದಾನೆ ಸ್ತೊತ್ರ ಕೈಯೆಸ. ಮಾರೊ ಪ್ರಭು ಥಯಲ ಯೆಸು ಕ್ರಿಸ್ತ ಬಾ ಥಯಲ ಕ್ಹುದಾ 4 ಹಮೆ ಕ್ಹುದಾನೆ ಸ್ತೊತ್ರ ಕರಾನೆ ಕಾರಣ ಸುವೈ ಕದ್ಯಾಮ ಕ್ರಿಸ್ತಮಾ ಯೆಸುಮಾ ರ‍್ಹಯಲ ತಮೊನೆ ರ‍್ಹಯಲ ಬರೊಕ್ಹಾನಾ ಹುತಿ, ಕ್ಹುದಾ ಮನಕ್ಹೊ ಪರ ತಮೊನೆ ರ‍್ಹಯಲ ಮಯಾನಾಹುತಿ ಪುಚ್ಯೊಸ. 5 ತಮೊನೆ ನಿರಿಕ್ಷೆ ರ‍್ಹಯಲನಾಹುತಿ ಕ್ರಿಸ್ತನಾ ಪರ ಬರೊಕ್ಹೊ ಮ್ಹೆಲ್ಯಾ ವರಿ ಕ್ಹುದಾನಾ ಮನಕ್ಹೊನೆ ಮಯಾ ಕರ‍್ಯೊ. ತಮೆ ನಿರಿಕ್ಷೆ ಕರಾನು ತಮಾರಾಹುತಿ ಸ್ವರ್ಗಲೊಕಮಾ ತಯಾರ ಕರ‍್ಯಾಸ ಕವಾನು ತಮೊನೆ ತಿಳ್ದಾಸ. ತಮೊನೆ ತಿಳ್ಸಾಯೆಲ ಕ್ಹರಿ ವಾಕ್ಯ ಕದ್ಯಾಮ ಸುವಾರ್ತೆನೆ ತಮೆ ಪುಚತ್ತಾಮ್ಮಾ ತೆ ನಿರಿಕ್ಷೆನಾಹುತಿ ತಿಳದಿಲಿದ್ಯಾಸ. 6 ತಮೆ ಸುವಾರ್ತೆ ಐಕಿ ಕ್ಹುದಾನಿ ಮರಗಾನಿ ಕ್ಹರಿ ತಿಳ್ದಿಲಿದಲಕ್ಹು ಸುವಾರ್ತೆ ತುಮೊಮ್ಮಾ ಘನಿ ಥಾವಾಡಿಸ ವರಿ ಮನಕ್ಹೊನೆ ಆಶಿರ್ವಾದ ಥೈನ ರ‍್ಹೈಯುಸ. ತಿನಾಲಿಂಗತಜ಼ ದುನಿಯಾಮಾ ಕ್ಹಾರಿ ಜ಼ಗಾಬಿ ಸುವಾರ್ತೆ ಘನಿ ಥಾವಾಡಿಸ ವರಿ ಆಶಿರ್ವಾದ ಥೈನ ರ‍್ಹವಸ. 7 ತಮೆ ಎಪಫ್ರದಿಕ್ಹು ಕ್ಹುದಾನಿ ವರಗಾ ತಿಳ್ದಿಲಿದ್ಯಾಸ. ತೆ ಹಮಾರಾ ಕ್ಹಾತೆ ಸೆವೆ ಕರಾಡ್ಯೊಸ. ಹಮೆ ತಿನೆ ಮಯಾ ಕರೆಯೆಸ. ತೆ ಹಮಾರಾಹುತಿ ಕ್ರಿಸ್ತನೊ ಬರೊಕ್ಹೊವಾಲೊ ಸೆವಕ ಥಯೊಸ. 8 ಪವಿತ್ರ ಆತ್ಮಾನೆ ಪ್ರೆರಿತ ಥಯಲ ತುಮಾರಿ ಮಯಾನಾ ಹುತಿ ರ‍್ಹಯಲ ವಿಷಯ ಮನೆ ಕೈನ ದಿದಲ ತೆಜ಼ ವ್ಹೈ. 9 ಇಮ್ಮ ರ‍್ಹಯಲ ಹುತಿ ಎ ತುಮಾರಿ ಮಯಾನಾ ಹುತಿ ಹಮೆ ಐಕಲ ದಿಂತಾ ತುಮಾರಾ ಹುತಿ ಇಕ್ಹರ‍್ಯಾವಾಚಿ ತುಮೆ ಕ್ಹಾರಿ ತರಾನಿ ಆತ್ಮಿಕನಿ ವಿಷಯನಾ ಹುತಿ ಗ್ಯಾನಕ್ಹು ಕ್ಹುದಾನಿ ಚಿತ್ತ ತಿಳದಿಲಿವಾನಾಹುತಿ 10 ಕ್ಹುದಾನಿ ಪಸಂಪ ಡೊಳಾ ದಿಕ್ಹಾವರಕ್ಹಾ ತುಮೆ ಚೊ಼ಕಾ ಥಛ ಕೈನ ಕ್ಹಾರಿ ತರಾನಾ ಚ಼ೊಕಾ ಫಲ ದಿವಾಲಾ ಥೌ ಕೈನ ಬೆಳತ್ತಾ ರ‍್ಹೌ ಕೈನ 11 ತಿನಿ ಮಹಿಮಾನಿ ತಾಕತ ಲಿಂಗತ ಕ್ಹಾರಿ ತರಾಮಾ ತಾಕತ ಹೊಂದಿನ ಕ್ಹಾರಿ ರಾಕ್ಹು ತಡ್ಇಲಿವಾನು ಶಾಂತಿ ಸಮಾಧನಕ್ಹು ತಡ್ದಿಲ್ಯು ಕೈನ, 12 ಕ್ಹುದಾನಾ ಭಕ್ತೊ ಕ್ಹುದಾನಾ ಉಜಾಲಾಮಾ ರ‍್ಹಯಲ ವಾಟೊ ಲಿವಾನಾ ಹುತಿ ಅಪೊನೆ ಯೊಗ್ಯ ಕರಿನ 13 ಕ್ಹುದಾ ಅಪೊನೆ ಅಂದಕಾರನೊ ಅದಿಕಾರಮತೊ ಛೊಡೈನ ತಿನಾ ಮಯಾನಾ ದಿಕ್ರಾನಾ ರಾಜ್ಯಮಾ ಮಳಾಯೊ. 14 ಎ ದಿಕ್ರಾಮಾ ಅಪ್ನಾ ಪಾಪೊ ಮಾಫಕರಿನ ಅಪೊನೆ ಬಿಡುಗಡೆ ಥೈ. 15 ಕ್ರಿಸ್ತ ನೈ ದಿಕ್ಹಾನು ಕ್ಹುದಾನು ರೊಪ ವ್ಹೈ. ಕ್ಹಾ ಸೃಷ್ಠಿನೆ ತೆಜ಼ ಮ್ಹೊಟೊ ವ್ಹೈ. 16 ಭುಪರ ಲೊಕಮಾ ರ‍್ಹಯಲ ದಿಕ್ಹಾನಿ ನೈ ದಿಕ್ಹಾನು ಕ್ಹಾರುಜ಼ ಸಿಂಹಾಸನ್ನ ರ‍್ಹೈನೆಕಾ ಕ್ಹಾರವೊಪರ ಅದಿಕಾರ ರ‍್ಹೈನೆಕಾ ತಿನಾಕ್ಹುಜ಼ ತಯ್ಯಾರ ಥಯು. ಕ್ಹಾರುಜ಼ ತಿನಾಕ್ಹುಜ಼ ವರಿ ತಿನಾಹುತಿಜ಼ ತಯ್ಯಾರ ಥಯು. 17 ತೆ ಕ್ಹಾರಾವೊತಿ ಪೈಲಾಜ಼ ರ‍್ಹಯಲವಾಲೊ ವ್ಹೈ. ತಿಮಾ ಕ್ಹಾರುಜ಼ ಯಕ್ಕ ಥಯುಸ. 18 ಸಬೆ ಕವಾನು ಅಂಗನೆ ತೆ ಮಾತು ಥಯೊಸ. ಕ್ಹಾರಾವೊಮಾ ತೆಜ಼ ಪೈಲಾ ವ್ಹೈ. ಮರಲವಾಲಾವೊಮಾತೊ ತೆಜ಼ ಜಿವ್ತೊ ಥೈನ ಉಟಿನ ಆಯಲವಾಲೊ ತೆಜ಼ ವ್ಹೈ. 19 ಕಾಕದ್ಯಾಮ ತಿಮಾಜ಼ 20 ವರಿ ತೆ ಶಿಲುಬಿಪರ ಚುವಾಯಲ ರಗತಕ್ಹು ತಿಕ್ಹು ಸಮಾಧಾನ ಹುಟ್ಸಿನ ವರಿ ಭುಪರಲೊಕಪರ ರ‍್ಹಯಲ ಕ್ಹಾರುಜ಼ ತಿನಾ ದಿಕ್ರಾನಾ ಮುಲಕ ಸಮಾಧಾನ ಕರಿಲ್ಯು ಕೈನ ಬಾ ಥಯಲ ಕ್ಹುದಾ ಆಸ ಕರ‍್ಯೊ. 21 ಎನೈಸೊ ಪೈಲಾನ ಕಾಲ್ಮಾ ರ‍್ಹಯಲ ಬಿಜಾ಼ ಮನಕ್ಹೊ ಕೆಟ್ಟ ಕಾಮೊಕ್ಹು ಮನಸ್ಮಾ ಶಿಟ್ಟ ಮ್ಹೆಲ್ಲಿನ ತಿನಾ ವಿರೊದಿಯೊ ಥಯಾತಾ. 22 ಹಮ್ನಾತೊ ಕ್ಹುದಾ ತುಮೊನೆ ಯೆಸು ಕ್ರಿಸ್ತನಾ ಅಂಗನಾ ಮರಣನಾ ಮುಲಕ ವಪ್ಪಂದ ಕರಿಲಿದ್ಯೊಸ. ಕ್ಹುದಾ ತಿನಿ ಸನ್ನಿಧಿಮಾ ತುಮೊನೆ ಪರಿಶುದ್ಧ ಕರಿನ, ತುಮೊಮಾ ಸುಜ಼ ತಪ್ಪ ನೈಸೊ ಕರಿನ ಹುಬ್ರಾಡು ಕೈನ ಕ್ಹುದಾ ಇಮ್ಮ ಕರ‍್ಯೊ. 23 ಹಬಾಳನಾ ಹೆಟು ರ‍್ಹಯಲ ಕ್ಹಾರಿ ಸೃಷ್ಟಿನೆ ಕದಲ ಸುವಾರ್ತೆಕ್ಹು ಹುಟ್ಟಲ ಆಸಕ್ಹು ಹಲ್ಲು ನೈ ಕೈನ ಬರೊಕ್ಹಾಮಾ ಘಟ್ಟ್ಟ ಹುಬ್ರಯಲ ರ‍್ಹಯಾಮ 24 ಮಿ ಹಮ್ನಾ ತುಮಾರಾ ಹುತಿ ಅನುಭವಿಸ್ತೊ ರ‍್ಹಯಲ ತ್ರಾಸಮಾ ಖುಶಿ ರ‍್ಹೈನ ಕ್ರಿಸ್ತನಾ ತ್ರಾಸಮಾ ಹಜುಸನ ಉಗ್ರಲ ಸಭೆ ಕವಾನಿ ತಿನಾ ಅಂಗನಾ ಹುತಿ 25 ಕ್ಹುದಾನಾ ಮನಸ ಲಿಂಗತ ತುಮಾರಾ ಚೊ಼ಕಾನಾ ಹುತಿ ಮಿ ತುಮಾರಿ ಸಭೆನೆ ಸೆವಕ ಥಹಯೊ. 26 ಎ ದಡಿ ರ‍್ಹಯಲ ಕ್ಹರಿನಿ ವಾಕ್ಯಾ ಪಾಚ಼ಲ್ಯಾ ಯುಗತು ಮಾತಾ ಮಾತಾತು ದಡಿನ ವ್ಹತ್ತು. ತೆ ವಾಕ್ಯಾ ಕ್ಹುದಾ ಹಮ್ನಾ ತುಮಾರಾ ಕ್ಹಾಮಾ ಲಾಯೊಸ. 27 ಎ ಮರ್ಮಾನಿ ಮಹಿಮಾ ಕೆಕ್ಲು ಛೆ ಕವಾನು ಬಿಜಾ಼ ಮನಕ್ಹೊನೆ ಕವಾನಾ ಹುತಿ ಕ್ಹುದಾ ಮನಸ ಕರ‍್ಯೊ. 28 ಅಪೆ ತಿನೆ ಕತಛೆ, ಕ್ಹಾರಾವೊನೆಬಿ ಗ್ಯಾನ ಕತಾ ವರಿ ಕ್ಹಾರಾವೊನೆ ರ‍್ಹಯಲ ಕ್ಹಾರುಜ಼ ಗ್ಯಾನ ಕತಾ 29 ಮಾರಾಮಾ ಕಾಮಾ ಪುರಾ ಕರಾನು ಕ್ಹುದಾನಿ ತಾಕತಕ್ಹು ಇನಾಹುತಿಜ಼ ರಾಬುಸ.