JONÁS 2

1 Jatianra yapan poko meranxon Jonassen jawen Ibo Dios orana iki, 2 oranira neskata iki: “Ibó, masá tenekinra en mia saí akin yokata iki, jatianra ea min akinna iki. Kikinbires chichó mawá meran ixon en mia kenaara, min ea ninkata iki. 3 Aniparo kikin nemin ikain min ea potaara, baikan ea mapoa iki, ja min raana ani bechónbaonra ea mapoa iki. 4 Miibakea, moa min ea potaara, en shinanna iki; min jakon xobo moa oinwetsatima. 5 Akonbireskin ea jenen mapoara; aniparo neminhain ea iketian; jene meranoa xobi algas nishibaon ea mapoa iki. 6 Ani xanken xamanko kamanra ea nokota iki; ¡jatíbitian jainoax pikótimaakin min xepoara en shinanna iki! Ikaxbi mia nokon Ibo Diossenra, mawáinoa min ea pikómaa iki. 7 Eara moa jayamai ixon onanxonra, en mia shinanna iki Ibó; en mia yokata joira mia iboamaa xobonko, miiba nokota iki. 8 Jatonbi ikonma dios axon rabiaibaonra, moa mia ikon akin jenekanai; 9 ikaxbi enra mia rabiti iki, jainoax raroira ea miki bewati iki; ja en mia axonti yoiabora, en mia senenhaxonti iki. ¡Ibó, minbichoresa jato jamati atipanke!” akinra aká iki. 10 Jatianra Ibon amaa aniyapan, maioriakin Jonás kinana iki.